1 studzienia 2017 hoda ŭstupiŭ u pasadu dziaviaty hienieralny sakratar AAN Antoniu Huteryš (Partuhalija).
Na hetaj pasadzie jon źmianiŭ Pan Hi Muna (Paŭdniovaja Kareja), jaki ŭznačalvaŭ arhanizacyju dva terminy — na praciahu 10 hadoŭ.
«Hienieralny sakratar, jaki byŭ niepasrednym śviedkam pakut samych abiazdolenych ludziej na našaj płaniecie (u łahierach biežancaŭ i zonach bajavych dziejańniaŭ), poŭny rašučaści zrabić centralnym elemientam svajoj pracy abaronu hodnaści čałaviečaj asoby i zajmacca mirnym pasrednictvam, naviadzieńniem mastoŭ i zaachvočvańniem reformaŭ i inavacyj», — havorycca ŭ paviedamleńni pres-słužby pradstaŭnictva AAN u Biełarusi.
Da svajho abrańnia na pasadu hienieralnaha sakratara Huteryš z červienia 2005 hoda pa śniežań 2015 hoda zajmaŭ pasadu viarchoŭnaha kamisara AAN pa spravach biežancaŭ.
Bolš za 20 hadoŭ prapracavaŭ va ŭradzie i na dziaržaŭnaj słužbie. U 1995—2002 hadach Huteryš zajmaŭ pasadu premjer-ministra Partuhalii.
U jakaści staršyni Jeŭrapiejskaha savieta ŭ pačatku 2000 hoda jon adyhraŭ viadučuju rolu ŭ pryniaćci Lisabonskaj prahramy rostu i zaniataści, a taksama byŭ sustaršynioj pieršaha samitu Jeŭrapiejskaha sajuza i Afryki, adznačaje pres-słužba pradstaŭnictva AAN u Biełarusi.
Antoniu Huteryš naradziŭsia ŭ 1949 hodzie ŭ Lisabonie, skončyŭ Vyšejšy techničny instytut pa śpiecyjalnaści «inžyniernaja sprava». Svabodna vałodaje partuhalskaj, anhlijskaj, ispanskaj i francuzskaj movami.
Žanaty na Katarynie dy Ałmiejda Vaš Pintu, jakaja zajmaje pasadu namieśnika mera Lisabona pa pytańniach kultury, maje dvaich rodnych dziaciej, adnaho pryjomnaha syna i troch unukaŭ.
Kamientary