Ukraina raspačała spravu suprać biełarusa, jaki vajavaŭ na Danbasie za sieparatystaŭ
Va Ukrainie raspačataja kryminalnaja sprava pa fakcie ŭdziełu hramadzianina Biełarusi ŭ bajavych dziejańniach na baku sieparatystaŭ.
Jak paviedamlaje pres-słužba prakuratury Łuhanskaj vobłaści, Novaajdarskim adździełam Sievieradanieckaj miascovaj prakuratury ažyćciaŭlajecca pracesualnaje kiraŭnictva ŭ kryminalnaj vytvorčaści pa fakcie ŭdziełu hramadzianina Biełarusi ŭ składzie nie praduhledžanych zakonam uzbrojenych farmiravańniaŭ, jaki pryvioŭ da hibieli ludziej (č. 5 art. 260 KK Ukrainy).
«Ciapier pravodziacca śledčyja dziejańni, nakiravanyja na vyśviatleńnie abstavinaŭ i mahčymych vidavočcaŭ zdareńnia. Dasudovaje rasśledavańnie ŭ pakazanaj kryminalnaj vytvorčaści znachodzicca na kantroli prakuratury vobłaści», — adznačana ŭ paviedamleńni.
Abłasnaja prakuratura kaža pra mahčymy ŭdzieł biełaruskaha hramadzianina va ŭzbrojenym kanflikcie ŭ zonie ATA, infarmacyja pra jaki źjaviłasia ŭ ŚMI. «U apublikavanym intervju małady čałaviek raskazaŭ, što ź vieraśnia 2014 hoda pa listapad 2016-ha ŭdzielničaŭ u niezakonnym uzbrojenym farmiravańni ŭ składzie bataljona «Ruś» i niepasredna ŭ bajavych dziejańniach u rajonie horada Ščaście i pasiołka Vialikaja Hara», — paviedamili ŭ prakuratury.
Imia fihuranta nie nazyvajecca. Miarkujučy pa ŭsim, havorka idzie pra 33-hadovaha žychara Viciebska, u minułym aktyvista demakratyčnych sił Siarhieja Trafimava, intervju ź jakim biełaruskaja słužba «Radyjo Svaboda» apublikavała na svaim sajcie 4 studzienia.
U intervju Trafimaŭ, jaki vajavaŭ na baku samaabvieščanaj Łuhanskaj narodnaj respubliki, raspaviadaje pra dośvied udziełu ŭ bajavych dziejańniach, pra toje, što jaho vyklikali na razmovy ŭ biełaruski Kamitet dziaržbiaśpieki ŭ jakaści śviedki pa niejkaj kryminalnaj spravie i jon nibyta prapanoŭvaŭ śpiecsłužbam svajo supracoŭnictva. Sam Trafimaŭ, niahledziačy na najaŭnaść kryminalnaj adkaznaści za ŭdzieł u bajavych dziejańniach za miažoj, da adkaznaści ŭ Biełarusi za heta nie pryciahvaŭsia.
Kamientary