Žychary pasiołka Pradhorny Staŭrapolskaha kraju Rasii znachodziacca ŭ šoku: z samaha pravasłaŭnaha śviata Vadochryšča 19 studzienia jany, a taksama žychary jašče niekalkich nasielenych punktaŭ rehijonu, spažyvali pitnuju vadu, što pastupała z reziervuara, u jakim płavali dva trupy.
Akazałasia, što raniej dvoje rabotnikaŭ pradpryjemstva «Staŭrapalvodakanał» na mocnym padpitku vyrašyli vykanać pravasłaŭnuju tradycyju i vykupacca ŭ reziervuary ź pitnoj vadoj, paviedamlaje miascovaje vydańnie 1777.ru.
Cikava, što ni adnoj skarhi ad nasielnictva na niezvyčajny smak abo pach pitnoj vady pry hetym nie pastupiła. Tapielcaŭ znajšli tolki tady, kali cieła adnaho ź ich apuściłasia na dno reziervuara i pierakryła saboj zabornik, praź jaki pitnaja vada pastupała ŭ mahistral miascovaj vadapravodnaj sietki. Rabočych, jakija vyrašyli razabracca z pryčynaj niepaładki, čakała strašnaja znachodka. U papiarednija try dni jany navat nie sprabavali šukać svaich biasśledna źnikłych kalehaŭ, miarkujučy, što tyja banalna syšli ŭ zapoj.
U ciapierašni čas na pradpryjemstvie «Staŭrapalvodakanał» z pryčyny zdareńnia pravodzicca słužbovaje rasśledavańnie. Paralelna situacyju vyvučajuć miascovyja pravaachoŭnyja orhany, jakija raspačali pa fakcie śmierci dvuch rabotnikaŭ pradpryjemstva daśledčuju pravierku.
«Pavodle papiaredniaj viersii, u noč na Vadochryšča dvoje rabotnikaŭ miascovaj filii pradpryjemstva vyrašyli vykupacca ŭ reziervuary z čystaj vadoj, — raspaviali žurnalistam u pres-słužbie staŭrapolski palicyi. — Skoknuŭšy ŭ ledzianuju vadu pieršym, adzin z mužčyn pačaŭ tanuć. Jaho tavaryš kinuŭsia jamu na dapamohu, ale ŭ vyniku abodvum nie ŭdałosia vybracca, i jany zahinuli».
Užo viadoma, što pitnoj vadoj z reziervuara z trupami amataraŭ pravasłaŭnych abradaŭ siłkavałasia vadapravodnaja sietka nie tolki pasiołka Pradhorny, ale i niekalki viosak Pradhornaha rajona, čyhunačnaja stancyja Jesientukskaja i horad Jasnaja Palana. Pakul nichto ź ich žycharoŭ pa dapamohu da miedykaŭ nie źviartaŭsia. Śpiecyjalisty ličać, što pašancavała ludziam vyklučna dziakujučy chałodnamu nadvorju: tempieratura vady ŭ reziervuary była tolki krychu vyšejšaja za nul, z-za čaho cieły za try dni nie paśpieli dastatkova raskłaścisia, kab vydzielić značnuju kolkaść trupnaha jadu.
Kamientary