Premjer-ministr Kanady Džaścin Trudo ŭpieršyniu sustrakajecca ŭ Vašynhtonie z prezidentam ZŠA Donaldam Trampam. Pierad sustrečaj Trudo abiacaŭ pahavaryć z Trampam ab kanadskich kaštoŭnaściach i pracoŭnych miescach.
Na dumku ahladalnikaŭ, Trudo budzie vymušany vytrymlivać bałans, nie achviaravaŭšy admysłovymi adnosinami z paŭdniovym susiedam, ale ŭ toj ža čas paznačyŭšy pazicyju Kanady pa pytańniach pravoŭ čałavieka.
Džaścin Trudo i Donald Tramp pačali svaju pieršuju sustreču z pocisku ruki i lohkich abdymak pierad pačatkam pieramovaŭ, jakija buduć doŭžycca ŭvieś dzień.
Hałoŭnymi temami stanuć mihracyja i pytańni handlu. Taksama lidary ŭžo abmierkavali prablemy raŭnapraŭja połu na pracoŭnym miescy — u hetaj dyskusii pryniała ŭdzieł dačka Trampa Ivanka.
Libierał Trudo adpraviŭsia na sustreču z prezidentam ZŠA ź misijaj, pra jakuju jon niezadoŭha da vizitu šmat raspaviadaŭ žurnalistam.
Kanadski premjer paabiacaŭ, u pryvatnaści, što budzie «havaryć ab kanadskich kaštoŭnaściach i pryncypach, jakija dajuć siłu našaj krainie».
Adnoj z takich kaštoŭnaściaŭ źjaŭlajecca adkrytaść Kanady dla mihrantaŭ: pakul Tramp padpisvaŭ ukazy ab zabaronie na ŭjezd u ZŠA hramadzian šerahu musulmanskich krain, Trudo ŭsialak padkreślivaŭ, što Kanada adkryta dla hramadzian lubych krain i nie moža aceńvać ludziej pa relihii i nacyjanalnaści.
Tym nie mienš 45-hadovy kanadski premjer taksama skazaŭ, što čakaje «znajści šmat ahulnych tem» z 70-hadovym kaleham z ZŠA.
«Na mnie lažyć adkaznaść — i my heta budziem ščylna abmiarkoŭvać — stvareńnie pracoŭnych miescaŭ i novych mahčymaściaŭ dla kanadcaŭ šlacham praciahu ščylnaj intehracyi pa abodva baki miažy», — skazaŭ Trudo pierad vizitam.
Značnaja častka kanadskaj ekanomiki — da 75% — zaležyć ad ekspartu ŭ ZŠA. Trudo, jak ličać naziralniki, budzie vymušany šukać bałans pamiž zachavańniem handlu i palityčnaj pazicyjaj.
Ciapier čytajuć
Staŭ hierojem Mahiloŭskaha ŭniviera, źbiraŭ falkłor, pracavaŭ na biełarusizacyju sadkoŭ — raskazvajem pra Jaŭhiena Bojku, asudžanaha za salidarnaść z palitviaźniami66
Kamientary