Paru miesiacaŭ zastałosia da Jeŭrabačańnia, dzie našuju krainu pradstavić biełaruskamoŭny hurt NaVi, jaki vybuchnuŭ na ŭsiu Biełaruś sa svajoj pieśniaj «Historyja majho žyćcia».
Ale ŭ internecie šyracca mierkavańni, što fajnaja pieśnia — heta tolki pałova spravy. Dla Jeŭrabačańnia, maŭlaŭ, treba arhanizavać i šou.
Što b paraiła «Navi» Alena Łanskaja, kolišniaja ŭdzielnica konkursa?
«Ja asabista dumaju, što hurt i tak małady i viasioły. Cudoŭna hladzicca na scenie. Ale jość niekatoryja niuansy, jakija mianie trochi pałochajuć. Tak, mnie daviałosia vystupać u Malmio pierad 40-tysiačnaj załaj. A kali niama hastrolnaj praktyki, to ŭ takoj situacyi moža stać strašna. Druhi momant — pieśnia pa-biełarusku. Heta cudoŭna nasamreč, — my niasiem našuju kulturu ŭsioj Jeŭropie. Ale pa statystycy pieśni na nacyjanalnaj movie vyjhrajuć vielmi redka. Ja kažu heta nie tamu, što nie chaču, kab jany pieramahli, nie. Ja zaŭsiody za našych pradstaŭnikoŭ. Ale ŭzhadvaju słovy pradziusaraŭ i śpiecyjalistaŭ, jakija byli ŭ moj čas, i słovy tych ža hrečaskich śpiecyjalistaŭ, jakija kožny hod supracoŭničajuć z toj ci inšaj kamandaj na Jeŭrabačańni, jany zaŭsiody apieravali tym, što musić być anhlijskaja mova, kab tvor byŭ zrazumieły dla ŭsich vykanaŭcaŭ i słuchačoŭ», — skazała Łanskaja.
«Kirkoraŭ, ź jakim ja mieła mahčymaść papracavać, kazaŭ, što numar pavinien być jaskravym. Jeŭrabačańnie — heta načny konkurs. Ludzi chočuć spać, paziachajuć. Mohuć adyjści. A kali numar budzie paśla rekłamy, to mohuć uvohule nie paśpieć pahladzieć tvoj numar. To bok jość šmat niuansaŭ. Znoŭ ža, kali nie skažu pra palityku, to pakryŭlu dušoj. Tut usio ŭ kompleksie — acenka vystupu, vakału i palityčnaja situacyja. Sioleta za nas dobra prahałasuje Ukraina, mnie zdajecca. Mahčyma, Rasija. Ale nie fakt — padčas majho vystupleńnia Rasija nie dała nivodnaha bała», — dadała śpiavačka.
«Letaś Jeŭrabačańnie padałosia mnie słabym, nielha było vyłučyć jaskravy niejki numar i styl. Ja za indyvidualizm! I tut u pradstaŭnikoŭ našaj krainy ŭsio dobra. Ja im zyču pośpiechaŭ, zaŭzieju za «Navi» i ščyra chaču, kab my ŭrešcie pieramahli i pryvieźli konkurs u Biełaruś», — reziumavała Łanskaja.
Ciapier čytajuć
Jak žyvie prosty minski zvarščyk, jaki vyjhraŭ try miljony rubloŭ1
Kamientary