Ukrainskija žaŭniery ŭ zonie bajavych dziejańniaŭ iduć u ataki ŭ poŭny rost i nie padajuć ad kulaŭ, raspavioŭ pradstaŭnik apieratyŭnaha kamandavańnia «DNR» Eduard Basuryn.
«Moža ŭsiu abojmu vypuścić, a jon idzie na ciabie. I voś hetyja vypadki i zaraz adznačali, na Promcy, na poŭdni. U poŭny rost iduć u ataku. Jaho zabivaješ — jon idzie. U jaho stralaješ — jon padaje, ustaje, znoŭ idzie», — skazaŭ prarasijski bajavik u intervju «Iźvieścijam».
«Pakul u hałavu nie patrapiš ci ŭ serca. Nu, kali bronik — u serca ciažka. U hałavu. Moža i biez hałavy namahacca padniacca i iści», — paddaŭ žachu Basuryn.
Pa jahonych słovach tak dziejničajuć psichatropnyja preparaty. jakija dziejničajuć «roŭna 10 dzion».
Basuryn u savieckija časy vučyŭsia na palitruka ŭ Danieckim vyšejšym vajenna-palityčnym vučyliščy inžyniernych vojsk i vojsk suviazi. Pierad vajnoj na ŭschodzie Ukrainy pracavaŭ u firmie, jakaja vyrablała klej.
Raniej pradstaŭniki «DNR» raspaviadali anałahičnyja fantastyčnyja historyi pra toje, što ŭkrainskich žaŭnieraŭ raźbirajuć u špitalach na orhany i zaražajuć virusami. U 2014 hodzie aficer FSB Ihar Hirkin («Strałkoŭ») raspaviadaŭ, što ŭ źbitym nad Danbasam niderłandckim «Boinhu» lacieli ŭžo miortvyja ludzi.
