U Dzień rodnaj movy biełarusa zatrymali na miažy za knihi na biełaruskaj movie
21 lutaha prykładna a 15 hadzinie na pamiežnym pierachodzie Damačava pamiežniki zatrymali Alaksandra, siabra historyka Viktara Korbuta, jaki, siarod inšaha, vioz knihi z seryi «Biblijateka Svabody»: try knihi Siarhieja Navumčyka, «Majstroŭnia» Siarhieja Dubaŭca, «Žyvaja mova» Jurasia Bušlakova, «Viartańnie nacyjanalista» Alaksandra Łukašuka.
Pamiežniki skazali Alaksandru, što ŭ ichnim śpisie takich knih niama.
«Ale pamiežniki skazali: heta nie aznačaje, što hety śpis poŭny. Kab vyznačyć, ci jość u ich ekstremizm, hetyja knihi zabirajuć dla ekspertyzy. Potym hetaja ekspertyza pračytaje hetyja knihi i zrobić zaklučeńnie. Na miažy skłali pratakoł i zatrymali siabra na 24 hadziny dla vyśviatleńnia, ci majuć knihi ekstremiscki źmiest. Siabru jašče jak minimum 6 hadzin treba znachodzicca na miažy. Jaho mašynu pastavili na aharodžanuju stajanku», — skazaŭ Viktar Korbut.
Pavodle Viktara Korbuta, u Alaksandra było kala 15 roznych knih: padručnik biełaruskaj movy, knihi pa historyi Biełarusi, vydańni «Arche», knihi Siarhieja Navumčyka i Siarhieja Dubaŭca ź «Biblijateki Svabody».
«Kožnaja kniha ŭ adnym ekzemplary. Na kožnaj ź ich piačatka «Knihazbor Viktara Korbuta». Hetyja knihi naležać mnie. Ja časta prašu pryvieźci mnie ź Biełarusi knihi ŭ Varšavu i pieradaju štości ŭ Biełaruś: biełaruskija, polskija, litoŭskija, rasiejskija knihi. Ja daktarant Varšaŭskaha ŭniversytetu. Ja pieradaŭ siabru hetyja knihi, viedajučy, što jon ich nia zhubić i pieradaść maim svajakam. U knihach niama ekstremizmu: heta navukovyja vydańni, memuarnaja litaratura», — kaža Viktar.
Viktar Korbut skazaŭ, što jamu jak navukoŭcu takaja sytuacyja stvaraje niepieraadolnyja ciažkaści dla pracy.
«Bo faktyčna ja mušu aścierahacca, što lubaja kniha, jakuju ja pieradam u Biełaruś abo paprašu pryvieźci ź Biełarusi, budzie padpadać pad padazreńnie ŭ ekstremiźmie. Cikava, što na miažy skazali, što knih niama ŭ śpisie ekstremisckaj litaratury, ale ich buduć praviarać. Takim čynam, farmalna knihi pavinny byli viarnuć i paprasić prabačeńnia za zatrymańnie».
Kamientary