Palicyja Małajzii zajaviła, što śmierć brata lidara KNDR nastupiła ŭ vyniku atručvańnia taksinam, jaki ŭvachodzić u katehoryju bajavych atrutnych rečyvaŭ, piša Bi-bi-si.
Zhodna z papiarednim zaklučeńniem, Kim Čon Nam byŭ atručany chimikatam, viadomym jak VX.
Da takoj vysnovy ekśpierty pryjšli, praanalizavaŭšy rečyva, jakoje zastałosia na tvary i vačach zahinułaha.
VX — heta rečyva, jakoje vałodaje mocnym niervova-paralityčnym dziejańniem. Jaho nazyvajuć samym taksičnym z usich štučna sintezavanych čałaviekam.
Haz VX pryličany AAN da chimičnaj zbroi masavaha paražeńnia. Zhodna z najaŭnaj infarmacyjaj, na dadzieny momant zapasami VCh vałodaje tolki abmiežavanaja kolkaść krain, siarod jakich ZŠA, Rasija i Siryja.
***
Brat paŭnočnakarejskaha lidara pamior na minułym tydni, nieŭzabavie paśla taho jak u aeraporcie Kaała-Łumpura jamu nakinuli na hałavu chustku, prapitanuju atrutnym rečyvam.
U zabojstvie ŭdzielničali dźvie žančyny. Adna adciahnuła ŭvahu Kim Čon Nama, a druhaja ŭ hety čas zzadu nakinuła jamu na tvar atručanuju chustku.
Dźviuch žančyn (z pašpartami Indaniezii i Vjetnama) śledčyja zatrymali adrazu. U palicyi paviedamili taksama pra zatrymańnie 46-hadovaha žychara Paŭnočnaj Karei pa imieni Ry Čon Čchol.
Siarod padazravanych taksama paŭnočnakarejski dypłamat i supracoŭnik avijakampanii z KNDR.
Akramia taho, u vyšuk abjaŭleny čaćviora mužčyn, jakich padazrajuć u datyčnaści da hetaha zabojstva, adnak jany, imavierna, užo pakinuli Małajziju.
Ułady Małajzii nie śćviardžajuć, što KNDR ažyćciaviła heta zabojstva, adnak, pa ich słovach, za im stajać hramadzianie Paŭnočnaj Karei.