Pieršaje pytańnie było pra kryminalnuju spravu suprać kiraŭnika Raśsielhasnahlada Siarhieja Dankvierta.
«Ciapier MUS pravodzić pravierku faktu, jakuju my kvalifikujem jak parušeńnie dziełavoj reputacyi. Šerahu pradpryjemstvaŭ biełaruskich była naniesienaja škoda pa nadumanych pryčynach. Pravierka ŭ samym razhary», — skazaŭ Šunievič.
Na dadzieny momant MUS nie rychtuje novaj amnistyi.
Ministr kaža, što milicyja inicyjuje ŭzmacnieńnie adkaznaści suprać tak zvanych «złodziejaŭ u zakonie», ale pakul rašeńnie nie pryniataje.
Šunievič padkreślivaje, što kolkaść złačynstvaŭ u sielskaj miascovaści našmat bolšaja za haradskuju.
«My źmienšyli šlacham uździejańnia na tych, chto moh ździejśnić złačynstvy. Naprykład, na pjanstva. Druhi momant — heta chatni hvałt u sielskaj miascovaści». Raście kolkaść zabojstvaŭ, zhvałtavańniaŭ u vioscy.
«Asnoŭnyja pryčyny — pjanstva i darmajedstva. Nizkaja matyvacyja dla svajho raźvićcia. Usio heta ŭ kompleksie dało taki efiekt, da kanca z hetaj prablemaj jašče nie spravilisia».
«Davier da supracoŭnikaŭ MUS letaś nieistotna, ale vyras, da 65% apytanych hramadzian», — kaža ministr Šunievič.
* * *
Pra «DNR» i «ŁNR»
«Ja bačyŭ pašparty «DNR» i «ŁNR» tolki na karcinkach. Nichto z MUSa taksama ŭ rukach nie trymaŭ ich. Davajcie pahladzim na heta z hledzišča zakanadaŭstva. My možam prymać hramadzian Ukrainy biez dakumientaŭ i razhledžvać kožnuju situacyju indyvidualna. Najaŭnaść takoha pašpartu nam nie važnaja. Nam važna, što heta hramadzianin Ukrainy, jaki znachodzicca ŭ Biełarusi z humanitarnymi metami», — tak kiraŭnik MUS prakamientavaŭ situacyju z pašpartami niepryznanych «DNR» i «ŁNR».
Šunievič kaža, što Minsk — heta łakmusavaja papierka pa situacyi z pravaparušeńniami ŭ krainie. «Pa majoj acency, situacyja ŭ Minsku ničym nie adroźnivajecca ad abłasnych centraŭ, tut usio nadziejna».
Ihar Šunievič upeŭnieny, što situacyja ź biaźvizam dla zamiežnikaŭ nijak nie paŭpłyvała na kryminalnaść u stalicy.
* * *
Pra Žadana
«Naša Niva» pacikaviłasia ŭ ministra pra zatrymańnie najlepšaha ŭkrainskaha piśmieńnika sučasnaści Siarhieja Žadana. Čamu jaho zatrymlivali nie pamiežniki, a milicyja, čamu heta adbyvałasia ŭnačy?
«Ja dobra viedaju ŭkrainskuju litaraturu, vyvučaŭ jaje 17 hadoŭ. Piśmieńnika Žadana ja nie viedaju, mahčyma, da svajho soramu. Usiaho ŭ śpisie «niepažadanych» bolš za 1 miljon 700 čałaviek. Ź ich bolš za 500 tysiač hramadzian Ukrainy. Čamu zatrymlivała milicyja? Bo milicyja pracuje dobra. Pa adpaviednych bazach dadzienych atrymali infarmacyju pra znachodžańnie ŭ nasielenym punkcie asoby z afarboŭkaj terarystyčnaj dziejnaści. Adbyłosia nočču, bo my atrymali infarmacyju nočču. My nie zmahli praihnaravać situacyju znachodžańnia na našaj terytoryi asoby z afarboŭkaj terarystyčnaj dziejnaści».
* * *
Pra biełaruskuju movu
«Absalutna salidarny pa papularyzacyi biełaruskaj movy.
Jość upaŭnavažanyja asoby i arhanizacyi, jakija tolki hetym zajmajucca. U haziecie «Na stražie» ź niadaŭniaha času kala 30% materyjałaŭ publikujucca na biełaruskaj movie. Peŭnyja mierapryjemstvy pravodziacca z vykarystańniem biełaruskaj movy», — adkazaŭ Šunievič na pytańnie «Našaj Nivy» pra papularyzacyju biełaruskaj movy siarod milicyi.
* * *
Pra Kurapaty
fota Siarhieja Hudzilina.
«MUS niehatyŭna stavicca. My abaviazanyja reahavać na ŭsie fakty parušeńniaŭ paradku», — adrazu skazaŭ Šunievič.
«Ja viedaju, što isnuje prablema, źviazanaja z tym, što z adnaho boku adbyvajecca lehalnaje budaŭnictva, a z druhoha boku jość asoby, jakija ličać, što tam ničoha budavacca nie pavinna. Ja nie chaču, kab MUS vystupaŭ tut u roli niejkaha traciejskaha sudździ. Budzie pryniataje rašeńnie — [budaŭnictva] budzie spyniena, nie budzie — praciahniecca.
Mnie chaciełasia b, kab hradus vastryni byŭ mienšym. Sprava ŭ tym, što dla niekatorych asob heta mahčymaść, kab u čarhovy raz zajavić pra siabie.
Jość kampietentnyja ludzi, jakija mohuć dać adkazy na pastaŭlenyja pytańni, u tym liku histaryčnyja.
Treba vyrašać situacyju cyvilizavana, biez prykavańnia siabie da mašyn i biez ekstremalizmu. A to adny načujuć, druhija razhaniajuć, trecija budujuć», — skazaŭ Ihar Šunievič.
