Hrodzienskamu hieju pahražaje 4 hady turmy za publikacyju intymnaha sełfi na zakrytym sajcie
47-hadovy hrodzieniec vykłaŭ intymnaje sełfi na zakrytym sajcie dla znajomstvaŭ. Ciapier mužčynu pahražaje da 4 hadoŭ pazbaŭleńnia voli.
— Ja — homaseksuał, — nie chavaje Aleh i raspaviadaje pra toje, što dva hady tamu raźmiaściŭ svaju ankietu na śpiecyjalnym zakrytym sajcie znajomstvaŭ. Siarod inšych fatahrafij byli i dźvie pikantnyja karcinki.
Śpiecyfika sajta takaja, što hetyja eratyčnyja sełfi mohuć bačyć tolki zarehistravanyja karystalniki. Na sajcie jość papiaredžańni ab tym, što tam źmiaščajecca eratyčny kantent i ŭvachod stroha paśla paŭnalećcia.
— Raźmiaściŭ i zabyŭ. Maje fatahrafii byli siarod sotniaŭ i tysiač padobnych. Kožny dzień tam źjaŭlajucca novyja ankiety — sajt siarod hiej-supolnaści karystajecca papularnaściu, - raspaviadaje Aleh, — U kancy studzienia da mianie dadomu pryjšli pravaachoŭniki ź pieratrusam. Kanfiskavali kampjutar i telefon. Praz dva dni mnie skazali, što pa fakcie raźmiaščeńnia ŭ internecie pikantnych fatahrafij raspačata kryminalnaja sprava, i zaraz pravodzicca pravierka. Ja prajšoŭ sudova-psichijatryčnuju ekśpiertyzu, jakaja pakazała, što ja całkam adekvatny. Za jaje mnie daviałosia zapłacić 580 rubloŭ. Ja razumieju, što, napeŭna, nie treba było vykładvać svaje fatahrafii takoha rodu, ale ja i padumać nie moh, što ich znojduć na zakrytym sajcie. Kali b heta było ŭ adkrytym dostupie, to zrazumieła, što tut stopracentnaje raspaŭsiudžvańnie porna, ale tam zakrytaja placoŭka. U takim vypadku treba pradjaŭlać pretenzii nie tolki da mianie, ale i da sajta, na jakim usio heta raźmieščana. Abo błakavać jaho ŭ Biełarusi, naprykład.
Zhodna z častkaj 2 artykuła 343 KK vyrab i raspaŭsiudžvańnie parnahrafičnych materyjałaŭ abo pradmietaŭ parnahrafičnaha charaktaru z vykarystańniem hłabalnaj kampjutarnaj sietki Internet karajucca pazbaŭleńniem voli na termin ad dvuch da čatyroch hadoŭ.
Kamientary