Dekret №3 «Ab praduchileńni sacyjalnaha ŭtrymanstva» admianiać nie stanuć, ale na praciahu hoda daručana nie spahaniać adpaviedny zbor.
Adpaviednaje rašeńnie siońnia na naradzie ab aktualnych pytańniach raźvićcia krainy ahučyŭ Alaksandr Łukašenka.
Čytajcie taksama: Tym, chto ŭžo spłaciŭ padatak na darmajedstva, viernuć hrošy. Pry jakoj umovie?
«Na praciahu sakavika, kali treba, nam treba padkarekciravać hety dekret. Ale dekret admianiacca nie budzie. Pieradajcie pierš za ŭsio čynoŭnikam, što jon budzie vykonvacca z tymi karekciroŭkami, pra jakija ja skazaŭ», — zajaviŭ biełaruski lidar.
«Ja, naturalna, naziraju, nakolki heta mahčyma, i adsočvaju ŭsiakuju pisaninu ŭ ŚMI — i apazicyjnych, i praŭładnych. I viedaju zajavy pradstaŭnikoŭ piataj kałony i sioje-toje jašče — toje, čaho hramadstva nie viedaje. Choć namiok u ŚMI na heta byŭ», — zajaviŭ kiraŭnik dziaržavy.
Pavodle jaho słoŭ, hety dekret nie źjaŭlajecca ekanamičnym i finansavym. «Heta ideałahičny, maralny dekret. Nijakich tam vialikich hrošaj dziaržava nie atrymaje. Metaj hetaha dekreta źjaŭlajecca adno — prymusić pracavać tych, chto pavinien i chto moža. Heta — hałoŭnaje», — adznačyŭ jon.
Razam z tym kiraŭnik dziaržavy kanstatavaŭ ahidnaje i biezadkaznaje vykanańnie dekreta z boku adkaznych čynoŭnikaŭ.
«Ci nie znajšli tam [u pracy z nasielnictvam pa vykanańni dekreta — BiełTA] svajo miesca i našy deputaty. Prytym roznych uzroŭniaŭ, asabliva miascovych savietaŭ», — skazaŭ jon.
«Kožny staršynia rajvykankama, kiraŭniki administracyj u haradach, rajonnych administracyj — heta ich pierš za ŭsio praca. A kantrol — za hubiernatarami i meram Minska. U vas tam pavinny być hetyja śpisy hultajoŭ, jakich treba prymusić pracavać.
A sumlennych ludziej nie treba było čapać naohuł. My nie pavinny kryŭdzić ludziej, asabliva ŭ hety čas. I tyja, chto siońnia pa 200—500 čałaviek vychodziać na vulicy i pačynajuć kryčać, heta ž nie tyja darmajedy, jakija sapraŭdy darmajedy.
Heta ŭ asnoŭnym tyja ludzi, jakija pakryŭdžanyja, jakim my ni z taho ni z hetaha pasłali hetyja paviedamleńni», — skazaŭ Alaksandr Łukašenka.
Jon daručyŭ da 1 krasavika vyznačyć śpisy tych, chto pavinien unosić płaciažy na padstavie dekreta №3. «Śpisy pavinny być vyvieranyja. Pryciahnuć treba ŭsich — deputataŭ miascovych savietaŭ, milicyju, učastkovych, śpiecsłužby — usich pryciahnuć, ale skłaści hetyja śpisy.
Jany pavinny być u kožnaha staršyni har- i rajvykankama, kiraŭnikoŭ administracyj u abłasnych centrach i horadzie Minsku. A Administracyja prezidenta razam z uradam pavinna arhanizavać kantrol za vykanańniem hetaha rašeńnia. I nie daj boh vy pakryŭdzicie choć adnaho čałavieka», — zajaviŭ kiraŭnik dziaržavy.
Łukašenka ahučyŭ nastupnaje rašeńnie: na praciahu 2017 hoda nie spahaniać u ramkach dekreta №3 zbor z tych, chto budzie ŭniesieny ŭ adpaviednyja śpisy.
«Chto apłaciŭ ŭ 2016 hodzie, pojdzie ŭ zalik 2017 hoda, kali jon nie budzie pracavać. Kali jon pastupić na pracu, my ź biudžetu pa jaho patrabavańni vierniem hetyja hrošy», — rasparadziŭsia kiraŭnik dziaržavy.
«U 2016 hodzie peŭnaja kolkaść (heta tysiačy ludziej), nie asprečvajučy, unieśli płaciažy. Siońnia ja zdymaju patrabavańnie, kab usie, kaho my vyčlenim za pieršy kvartał, płacili hetyja hrošy. Nie budziem za 2016 hod spahaniać hetyja hrošy z tych, chto pavinien płacić. A tyja, chto zapłaciŭ, tyja ŭ 2017-m nie buduć płacić. Kali jany buduć pracavać u 2017 hodzie, my pavinny pa ich patrabavańni viarnuć hetyja hrošy», — rastłumačyŭ Alaksandr Łukašenka.
Čamu Cichanoŭskaja nie pajechała na pachavańnie Papy?19
Kamientary