Biaspłatnyja ekskursii pa Biełarusi projduć 22 i 23 krasavika padčas «Festu ekskursavodaŭ-2017». Takaja infarmacyja raźmieščanaz na sajcie Nacyjanalnaha ahienctva pa turyźmie, paviedamlaje BIEŁTA.
Śpis ekskursij budzie apublikavany za tydzień da mierapryjemstva. Tradycyjna arhanizatary pryśviačajuć fiestyval kankretnaj nahodzie abo asobnym katehoryjam pomnikaŭ. Ciapierašniaje mierapryjemstva projdzie pad devizam «Składzi svoj maršrut». Arhanizatary zaklikajuć achvotnych skłaści ŭ bližejšy čas cikavyja maršruty dla svaich padarožžaŭ i ździejśnić ich. Sa svajho boku arhanizatary prapanujuć niezvyčajnyja abjekty, jakija mohuć uvajści ŭ hety pieralik.
Sioleta stvaralniki festu nie staviać za metu pavialičyć kolkaść biaspłatnych ekskursij, ale buduć bolš pilna adsočvać ich jakaść. Tak, płanujecca pravieści maksimalnuju kolkaść aryhinalnych aŭtarskich ekskursij, na jakija možna trapić tolki padčas «Festu ekskursavodaŭ». Płanujecca, što 22 i 23 krasavika taksama adbuducca biaspłatnyja ekskursii pa biełaruskich miaścinach Vilni, Maskvy i ŭpieršyniu — Krakava.
Arhkamitet zaprašaje ekskursavodaŭ, historykaŭ-krajaznaŭcaŭ dałučycca da mierapryjemstva. Dla ŭdziełu nieabchodna padać zajaŭku, bolš padrabiaznuju infarmacyju možna daviedacca, źviazaŭšysia z arhanizatarami pa elektronnaj pošcie [email protected].
«Fest ekskursavodaŭ» pravodzicca ŭ Biełarusi z 2009 hoda. Jon pryśviečany Mižnarodnamu dniu pomnikaŭ i histaryčnych miescaŭ (Dzień suśvietnaj spadčyny), jaki adznačajecca 18 krasavika. Z kožnym hodam jon papaŭniajecca novymi cikavymi maršrutami — padčas fiestyvalu pravodzilisia teatralizavanyja ekskursii, ekskursii ŭ elektryčkach, na ŭsiedarožnikach, pa pramysłovych pradpryjemstvach i šerah inšych. U 2016 hodzie było arhanizavana bolš za 100 ekskursij pa Minsku i bolš za 80 u rehijonach, jakija naviedali zvyš za 4 tysiačy čałaviek. Tradycyjna arhanizoŭvajucca ekskursii na niekalkich movach.
Arhanizatarami mierapryjemstva źjaŭlajucca Biełaruski kamitet mižnarodnaha savieta pa pomnikach i histaryčnych miaścinach (IKAMOS), Biełaruskaje hramadskaje abjadnańnie ekskursavodaŭ i hidaŭ-pierakładčykaŭ, DU «Nacyjanalnaje ahienctva pa turyźmie», hramadskaje abjadnańnie «Biełaruski fond kultury».
