Maksimu Viniarskamu, jaki adbyvaje pakarańnie na Akreścina, dali jašče 10 sutak za Kurapaty
Aktyvist «Eŭrapiejskaj Biełarusi» Maksim Viniarski padčas adbyćcia aryštu za Dzień Voli atrymaŭ jašče 10 sutak za Kurapaty. Pra heta karespandentu Svabody paviedamiła Volha Nikałajčyk, jakaja vyjšła na volu z Akreścina pa abiedzie 4 krasavika.
«Jak mianie vyvodzili, dyk hučała ŭ kalidory majo proźvišča. I tady ja pačuła hołas Maksima Viniarskaha. Jon kryknuŭ, što atrymaŭ jašče 10 dzion za Kurapaty. Što admysłova vyvozili ŭ sud pierad zakančeńniem terminu za Dzień Voli. Pieradavaŭ usim pryvitańnie. Jašče čuła hołas Leanida Kułakova. I jon usim pieradavaŭ pryvitańnie», — kaža Volha Nikałajčyk.
27 sakavika Pieršamajski rajonny sud Miensku asudziŭ Maksima Viniarskaha nibyta za drobnaje chulihanstva i niepadparadkavańnie na 8 sutak aryštu. Maksima Viniarskaha ŭ sudzie abaraniaŭ advakat, praces ciahnuŭsia niekalki hadzin. Aktyvist davodziŭ, što nia braŭ udziełu ŭ akcyi, a milicyjanty schapili jaho preventyŭna. Ale sud da jahonych słovaŭ nie prysłuchaŭsia.
Mienski taksist, hramadzki aktyvist Leanid Kułakoŭ atrymaŭ u Savieckim rajonnym sudzie Miensku najbolšy termin z pryznačanych za Dzień Voli — ažno 25 sutak. Milicyjanty zatrymali jaho na vulicy daloka adtul, dzie miełasia być šeście na Dzień Voli.
Ciapier čytajuć
Ejsmant: Łukašenka nie zmoža palacieć na Samit miru ŭ ZŠA, bo pavietranaja prastora Jeŭropy dla jaho zakrytaja33
Kamientary