 |
U internecie pačałasia akcyja «Zapali śviečku za Tybet». Jaje inicyjatary zaklikajuć vykazać salidarnaść z Tybetam, zapaliŭšy śviečku 7 žniŭnia a 21:00 (pa miascovym časie). Takaja akcyja prymierkavanaja da pačatku 29-ych letnich Alimpijskich hulniaŭ, što projduć u Pekinie.
«My prosim usich achvočych dałučycca da nas, – pišuć inicyjatary prajektu www.candle4tibet.org. – U dzień adkryćcia Alimpijady zapalicie śviečku ŭ svaim domie, na pracy ci ŭ inšym hramadzkim miescy. Pastaŭcie śviečku na padvakońnik, na stoł... tudy, dzie inšyja zmohuć pabačyć jaje źziańnie. Naša akcyja – heta nie pratest suprać Alimpijady, heta padtrymka svabody!»
8 žniŭnia arhanizatary akcyi nakirujuć listy kiraŭnikam dziaržavaŭ śvietu z padrabiaznaj infarmacyjaj pra toje, kolki žycharoŭ ich krainy chočuć, kab Tybet staŭ volnym.
Dla taho, kab pryniać udzieł u akcyi, vam nieabchodna zarehistravać svaju śviečku na sajcie www.candle4tibet.org. Dla rehistracyi nieabchodna ŭkazać svajo imia, proźvišča, elektronny adras i krainu.
Taksama źviarnicie ŭvahu na kartu ŭnizie hałoŭnaj staronki sajtu. Kliknuŭšy na knopku Join!, vy zmožacie dadać svoj horad na suśvietnuju kartu prychilnikaŭ svabodnaha Tybetu. Ad vas budzie patrabavacca karcinka i zyčeńnie.
Tybet — heta kraina, zabranaja kamunistyčnym Kitajem. Tybet užo 60 hadoŭ zmahajecca za nacyjanalnuju niezaležnaść. Duchoŭnym lideram tybetcaŭ zastajecca Dałaj-Łama, jaki znajchodzicca ŭ vyhnańni.
