Dla praviadzieńnia apytańnia słužby Hełapa respandenty ŭ Biełarusi ŭ pieravažnaj bolšaści vybrali rasiejskuju movu (92 adsotki apytanych).
Apytańni, praviedzienyja Hełapam, suśvietna viadomaj słužbaj daśledavańnia hramadzkaj dumki, na postsavieckaj terytoryi pakazvajuć, što ŭ byłych savieckich respublikach raście cikavaść da vyvučeńnia rasiejskaj movy.
U 2006 i 2007 hh. Hełap pastaviŭ respandentam u postsavieckich krainach nastupnaje pytańnie: «Nakolki važnaje dla vas toje, kab vašy dzieci ŭ hetaj krainie vyvučali rasiejskuju movu?» Možna było vybrać adzin ź piaci varyjantaŭ adkazu: 1) nia viedaju/nie chaču adkazvać; 2) zusim niavažnaje; 3) nia vielmi važnaje; 4) davoli važnaje; 5) vielmi važnaje.
Vyniki akazalisia davoli cikavyja. Naprykład, niahledziačy na praciahłuju napružanaść u stasunkach pamiž Hruzijaj i Rasiejaj, 64 adsotki hruzinskich respandentaŭ adkazali, što «vielmi važna» (hod tamu takich respandentaŭ nabrałasia 43 adsotki).
Pavyšanuju cikavaść da vyvučeńnia rasiejskaj movy Hełap adznačyŭ taksama ŭ Małdovie i Armienii. U 2007 h. 39 adsotkaŭ madłavanaŭ i 75 adsotkaŭ armianaŭ paličyli vyvučeńnie rasiejskaj movy svaimi dziećmi «vielmi važnym» (adpaviednyja pakaźniki dla hetych krainaŭ u 2006 h. byli 27 adsotkaŭ i 73 adsotki).
Adnačasova apytańnie Hełapa vyjaviła, što ŭ balšyni krainaŭ respandenty karystajucca nacyjanalnaj movaj achvotniej, čym rasiejskaj. Dla praviadzieńnia samoha apytańnia tolki respandenty ŭ Biełarusi, Ukrainie i Kazachstanie ŭ pieravažnaj bolšaści vybrali rasiejskuju (Biełaruś — 92 adsotki rasiejskuju i 8 adsotkaŭ biełaruskuju; Ukraina — 83 adsotki rasiejskuju i 17 adsotkaŭ ukrainskuju; Kazachstan — 68 adsotkaŭ rasiejskuju i 32 adsotki kazachskuju). U padsumavańni hetych vynikaŭ Hełap pryhadvaje, što na byłoj savieckaj terytoryi rasiejskaja mova pa-za Rasiejaj maje aficyjny status u Biełarusi, Kazachstanie i Kirhyzstanie. U Małdovie, Ukrainie i Tadžykistanie rasiejskaja maje status «movy mižetničnych znosin».
Apytańni Hełapa ŭ 2006 i 2007 hh. pravodzilisia siarod pryblizna 1000 respandentaŭ, starejšych za 15 hadoŭ, u kožnaj krainie.
