Jak budzie vyhladać arabski kompleks, jaki pabudujuć na miescy «Biełekspa» FOTY
U 2021 hodzie na miescy NVC «Biełekspa» i byłoj druhoj balnicy pavinien źjavicca šmatfunkcyjanalny kompleks, jaki pabuduje inviestar z AAE. Na resursie skyscrapercity.com užo źjavilisia rendarnyja vyjavy novaha abjekta, paviedamlaje Relax.by.
Pa słovach hałoŭnaha architektara Minska Paŭła Łučynoviča, jašče da zaklučeńnia inviestdamovy byŭ vyznačany dapuščalny abjom budučaj pabudovy. Paśla hetaha arabskaja kampanija prapanavała horadu niekalki varyjantaŭ afarmleńnia fasada abjekta. Siarod ich fihuravaŭ i fasad u arabskim styli. «Ale my zmahli dakazać, što heta nie najlepšy varyjant dla miesca, jakoje raźmieščanaje pa susiedstvie z histaryčnym centram, dzie šmat kultavych chryścijanskich pomnikaŭ architektury», — kaža Łučynovič. U vyniku baki spynilisia na bolš jeŭrapiejskim fasadzie, jaki «ŭpisvajecca ŭ kantekst miesca».
Varyjant zabudovy padrychtavała kampanija «Varabjoŭ i partniory», viadomaja pa takich abjektach, jak katarski «Sokał» na pr-cie Pieramožcaŭ i ofis Biełaruskaj kalijnaj kampanii na pr-cie Mašerava. «I heta pośpiech architektara, što budynak narmalna sadzicca pa vyšyni, nie daminuje i nie pieravyšaje Opierny teatr», — dadaje Łučynovič.
U kampanii adznačajuć, što «maštab budynka humanny ŭ adnosinach da prylehłaj histaryčnaj zabudovy. Jon nie vyklikaje pačućcia adčužeńnia, a arhanična ŭpisvajecca ŭ strukturu haradskoha centra».
Sam kompleks umoŭna možna padzialić na dźvie častki. Pieršaja — novyja budynki na miescy «Biełekspa», siarod jakich źjaviacca piacizorkavy hatel sietki Viceroy i roznyja hramadskija abjekty: handlovy kompleks, kazino, spa-kompleks z basiejnam, kafe i inšyja. Haściničnyja numary raźmieściacca na 3-7 pavierchach budynka. Na vierchnim paviersie buduć luksavyja numary i skaj-bar. «Architekturnaja kancepcyja haścinicy pabudavanaja pa pryncypie centralnaj šmatśvietłavoj atryumnaj prastory ź vierchnim bakavym śviatłom, što aśviatlaje zimovy sad na pieršym paviersie», — raspaviadajuć prajekciroŭščyki. Pobač z haścinicaj znachodzicca restaran, jaki navisaje nad rakoj. Mahčyma, navat padłoha hetaj ustanovy budzie prazrystaj.
Druhoj častkaj šmatfunkcyjanalnaha kompleksu možna nazvać rekanstrujavanyja histaryčnyja budynki byłoha Trajeckaha manastyra bazyljanak, jakija znachodziacca bližej da vulicy Bahdanoviča. U ich raźmieściacca miedycynski i dziciačy centry, handlovyja kropki, kafe i apartamienty haściničnaha typu. Takim čynam, pa zadumcy prajekciroŭščykaŭ, kompleks pavinien harmaniravać nie tolki ź Vierchnim horadam, ale i z Trajeckim pradmieściem i Opiernym teatram.
U płanie ž kompleksnaha padychodu da farmavańnia haradskoha asiarodździa, abjekt stanie suviaznym źvianom pamiž Vierchnim horadam i Opiernym teatram. U tym liku dla hetaha inviestar pabuduje novy most praź Śvisłač, pa jakim svabodna zmohuć chadzić usie žadajučyja. «Možna ličyć, što naša piešachodnaja zona takim čynam praciahniecca da Opiernaha», — dadaje Łučynovič.
Sam novy abjekt taksama pavinien stać paŭnavartasnym centram dla adpačynku haradžan i turystaŭ. Inviestar uładkuje nabiarežnuju i zialonuju zonu, a taksama zachavaje aleju Hierojaŭ uzdoŭž vulicy Kupały.
Jak miarkujecca, kančatkovy prajekt kompleksu budzie hatovy da kanca 2017 hoda.
Darečy, jak paviedamlaje Tut.by, siońnia SU-21 pačało raźbirać škleńnie ŭ NVC «Biełekspa».
«Da vieraśnia 2017 hoda płanujem zdać placoŭku pad budaŭnictva kompleksa, — raspaviali ŭ SU-21. — Siońnia pačali raźbirać škleńnie, korpus pakul nie čapali. Usie pracy tam miechanizavanyja».
Ciapier čytajuć
Žonka Arcioma, jaki emihravaŭ u Ispaniju ź siamjoj i zastaŭsia tam adzin, adkazała, čamu ŭ Baranavičach lepš, čym u Barsiełonie6
Kamientary