Śledčaje ŭpraŭleńnie USK pa Homielskaj vobłaści zaviaršyła rasśledavańnie kryminalnaj spravy ŭ dačynieńni da pradprymalnika ź Italii, jaki abvinavačvajecca ŭ machlarstvie ŭ asabliva bujnym pamiery, paviedamiła aficyjny pradstaŭnik USK pa Homielskaj vobłaści Maryja Kryvanohava.
Abvinavačany, jaki doŭhi čas pražyvaŭ u Biełarusi, pierakanaŭ svajho suajčyńnika ŭkłaści bujnuju sumu hrošaj u stvareńnie zamiežnaha tavarystva ŭ śfiery restarannaha biźniesu na terytoryi Biełarusi. Jon uhavaryŭ uklučyć u skład zasnavalnikaŭ svajho syna biez faktyčnaha ŭniasieńnia im doli statutnaha fondu, pryznačyć jaho dyrektaram arhanizacyi.
Na raźlikovy rachunak stvoranaha tavarystva suajčyńnik u niekalki etapaŭ pierakłaŭ zvyš 100 tysiač jeŭra, čakajučy ad «kampańjonaŭ» vykanańnia dahavornych abaviazacielstvaŭ. Adnak abvinavačany i jaho syn zavałodali hrašyma i rasparadzilisia imi pa ŭłasnym mierkavańni.
«U chodzie papiaredniaha rasśledavańnia śledčyja praanalizavali vialiki abjom finansavych dakumientaŭ, vyvučyli zaklučeńni ekśpiertyz, nakiravali zapyt ab akazańni pravavoj dapamohi kampietentnym orhanam Italii. Ustalavany fakt prysvajeńnia hrašovych srodkaŭ paciarpiełaha pad padstavaj uziaćcia ŭ doŭh dla finansavaj padtrymki svajho biźniesu na ahulnuju sumu bolš za 44 tysiač jeŭra», — raspaviała Maryja Kryvanohava.
Dziejańni abvinavačanaha kvalifikavanyja pa č. 4 art. 209 (machlarstva, ździejśnienaje ŭ asabliva bujnym pamiery) KK Biełarusi. Kryminalnaja sprava vyvučanaja prakuroram i nakiravana dla razhladu ŭ sud Centralnaha rajona Homiela.
U asobnuju vytvorčaść vydzielenaja kryminalnaja sprava ŭ dačynieńni da syna abvinavačanaha, jaki paśla zvarotu paciarpiełaha ŭ pravaachoŭnyja orhany schavaŭsia ŭ Italii. Vyrašajecca pytańnie ab pieradačy materyjałaŭ spravy ŭ Italiju dla ažyćciaŭleńnia kryminalnaha pieraśledu na terytoryi zamiežnaj dziaržavy.
