U Miensku adbyŭsia źjezd Abjadnanaj hramadzianskaj partyi. Delehaty źjezdu AHP paličyli, što abjaŭleńnie bajkotu vybaram u dadzieny čas budzie zaŭčasnym.
Spačatku kiraŭniki abłasnych arhanizacyjaŭ partyi dali svaju acenku vybarčaj kampanii. Tut dumki syšlisia — adrozna ad minułych parlamenckich vybaraŭ ułady pavodziać siabie bolš liberalna. Praŭda, pakul niama dakładnaha adkazu na pytańnie: čamu jany tak robiać? Heta sapraŭdy niejkaje źmiakčeńnie albo hulnia? I ci treba ŭ takoj sytuacyi bajkatavać vybary?
Tolki Ŭładzimier Šancaŭ z Mahileŭščyny prapanavaŭ užo siońnia źniać z vybarčaj honki partyjnych kandydataŭ. Svaju pazycyju jon tłumačyć ciskam, jaki idzie na ich u rehijonie. Inšyja rehijanalnyja kiraŭniki kazali pra toje, što pakul bajkot treba trymać, jak apošni arhument. Ich pazycyju padtrymaŭ i lider partyi Anatol Labiedźka:
«Bajkot va ŭmovach Biełarusi aznačaje adsutnaść usiakaj pracy. Heta mahło b źvieścisia da niekalkich pijar‑kampanij — zrabić raściažki, vyjści, kab zatrymali i dali 10‑15 sutak. Paśla vyjechać u Varšavu ci ŭ Brusel i skazać, jakija my vielizarnyja zmahary. Tamu ja liču, što rašeńnie ADS udzielničać u kampanii, jakija b prablemy nie ŭźnikali, absalutna pravilnaje.
Praktyka dakazvaje, što stratehična hetaje rašeńnie pravilnaje. Tamu što sam bajkot, kali jaho realizoŭvać, aznačaje pastanoŭku pierad uładaj tolki adnoj prablemy — prablema jaŭki vybarnikaŭ. Patencyjał, jakim vałodaje dziaržava, śviedčyć, što arhanizujuć jaŭku — navat i 70%, i 80».
Źjezd vyłučyŭ 13 partyjcaŭ u jakaści patencyjnych kandydataŭ u deputaty. Asabliva važnym hetaje rašeńnie było dla Ŭładzimiera Pakłonskaha. Niaśviskaja akruhovaja vybarčaja kamisija nie zarehistravała jaho inicyjatyŭnuju hrupu. I ŭ spadara Pakłonskaha siońniašni źjezd zastavaŭsia apošnim šancam, kab pazmahacca za deputacki mandat. Astatnija partyjnyja vyłučency ŭžo viaduć zbor podpisaŭ na svaju karyść.
Bajkot va ŭmovach Biełarusi aznačaje adsutnaść usiakaj pracy
Kandydat u deputaty pa Žodzinskaj vybarčaj akruzie Alaksandar Vaŭčanin prapanavaŭ kiraŭniku partyi prajechacca pa tych rehijonach, dzie vyłučajucca siabry AHP:
«Vam patrebna ŭsio ž prajechać pa haradach, sustrecca sa staršyniami savietaŭ, z kiraŭnikami akruhovych vybarčych kamisijaŭ, kab jany adčuvali, što za nami partyja. Usio ž jany adčuvajuć, kali ŭźnikaje hramadzki rezanans.
Ja spačatku dumaŭ, što ludzi pabajacca padpisvacca za mianie. Ale pačali padpisvacca. I ŭ harvykankamie načalstva ŭbačyła, što nieadnaznačnaja sytuacyja, što za apazycyjaneram iduć».
