Pervez Mušaraf razam z svaim hałoŭnym chaŭruśnikam Džordžam Bušam.
Prezydent Pakistanu Pervez Mušaraf 18 žniŭnia padčas žyvoha efiru na nacyjanalnym telebačańni abviaściŭ ab svaim rašeńni syści ŭ adstaŭku. Takoje rašeńnie jon pryniaŭ, kab paźbiehnuć impičmentu, jaki b «nanios udar pa intaresach narodu».
Nahadajem, što akurat u hety samy dzień u parlamencie pavinna było razhladacca pytańnie ab impičmencie Mušarafa. Hetuju praceduru inicyjavała najbolšaje ŭ krainie palityčnaje ŭtvareńnie — Pakistanskaja narodnaja partyja, jakuju ŭznačalvała zabitaja ŭ śniežni 2007 hodu Benazir Bchuta. Ideju impičmentu taksama padtrymała Musulmanskaja liha‑N, jakuju ŭznačalvaje jašče adzin były kiraŭnik uradu Navaz Šaryf.
Paviedamlajecca, što rašeńnie pra adstaŭku Mušaraf pryniaŭ paśla kansultacyj z svaimi prychilnikami i jurystami. Jon dadaŭ, što pakidaje svoj los u ruki narodu. Čutki pra dobraachvotnuju adstaŭku prezydenta Pakistana ŭ abmien na biaśpieku, źjavilisia jašče tydzień tamu.
Na pasadzie prezydenta Pakistanu Pervez Mušaraf znachodziŭsia ad 1999 hodu. Jon pryjšoŭ da ŭłady šlacham biaskroŭnaha dziaržaŭnaha pieravarotu. Na svajoj pasadzie Mušaraf zasłužyŭ słavu adnaho z najbolš viernych sajuźnikaŭ Vašynhtonu ŭ baraćbie ź mižnarodnym teraryzmam. Praz heta ZŠA niaredka zapluščvali vočy na parušeńni pravoŭ čałavieka ŭ samim Pakistanie.
Jahonyja palityčnyja praciŭniki zakidali jamu, adnak, ciesnuju suviaź ź niekatorymi z tych samych terarystaŭ, ź jakimi jon zmahaŭsia, i manipulacyju madžachiedami ŭ svaich metach. Dahetul niajasna, chto zabiŭ Bchuta. Kali toje zrabili isłamskija terarysty, to jak tak? Ichnyja šerahi daŭno i nadziejna infiltravanyja pakistanskaj vyviedkaj.
Pravaabaroncy ŭkazvali na toje, što ślapyja avijaŭdary i karalnyja aperacyi na plamiennych terytoryjach vyklikali žadańnie pomsty, što ŭłada ŭ Pakistanie pierastała padparadkoŭvacca pravu i stała nieefektyŭnaj.
U 2007 hodzie prezydent Pakistanu zvolniŭ kiraŭnika Viarchoŭnaha sudu i 60 sudździa, kab harantavać sabie pieraabrańnie. Adnak u lutym sioleta apazycyja vyjhrała parlamenckija vybary, stvaryŭšy kaalicyjny ŭrad.
