Rasijanie adstojvajuć prava biespakarana maciukacca doma

Bolšaść rasijan vystupaje suprać štrafaŭ i aryštaŭ za łajanku matam doma, vynikaje z vynikaŭ apytańnia, praviedzienaha fondam «Hramadskaja dumka» (FHD). Padtrymali zakonaprajekt mienš za tracinu rasijan (28%), suprać takoj normy vystupili 64% rasijan, jašče 8% nie zmahli vyznačycca z adkazam, piša VVS.

Ideju deputataŭ Dziarždumy pryraŭniać niecenzurnuju łajanku ŭ siamji da drobnaha chulihanstva čaściej za inšych nie ŭchvalajuć maładyja ludzi va ŭzroście ad 18 da 30 hadoŭ.

Sacyjołahi FHD paprasili respandentaŭ rastłumačyć, čamu jany ŭchvalajuć inicyjatyvu deputataŭ abo nie padtrymlivajuć jaje. Prychilniki pakarańnia za mat u siamji pieražyvajuć, što niecenzurnyja vyrazy buduć paŭtarać dzieci (jany «chutka drennyja słovy ŭłoŭlivajuć»), i ličać, što «maciukacca — heta drenna».

Praciŭniki adkaznaści za niecenzurnuju łajanku ŭ žyłych pamiaškańniach adznačajuć, što, pa-pieršaje, dom — asabistaja prastora i ŭmiašańnie ŭ jaho niedapuščalnaje, pa-druhoje, zakonaprajekt — «absurd i poŭnaje tryźnieńnie», i, pa-treciaje, vykanańnie hetaj normy «niemahčyma prakantralavać».

U cełym 73% respandentaŭ pryznajucca, što tak ci inakš ŭžyvajuć niecenzurnyja vyrazy — ź ich 57% redka, 16% časta. Tolki 26% apytanych zajavili, što nikoli nie maciukajucca. Pry hetym 62% ličać mat u movie «niedapuščalnym ni pry jakich abstavinach», a 36% miarkujuć, što časam niecenzurna možna vyłajacca.

Vykarystoŭvaje niecenzurnuju łajanku i Uładzimir Pucin — jon pryznaŭsia ŭ hetym u čas «Pramoj linii» ŭ 2016 hodzie. «Tak, ja łajusia. Tolki na siabie. Darma, ja viadoma, heta skazaŭ. Ale ŭ Rasii jość taki hrech. Admolim», — skazaŭ kiraŭnik RF.

Pad zakonaprajektam, jaki robić bolš žorstkimi pakarańnie za drobnaje chulihanstva, uklučajučy niecenzurnuju łajanku ŭ žyłych pamiaškańniach, padpisalisia deputaty-adzinarosy Dźmitryj Viatkin i Valancina Cieraškova, a taksama upaŭnavažany pa pravach čałavieka ŭ Rasii Taćciana Maskalkova.

Jany prapanujuć pierapisać artykuł ab drobnym chulihanstvie ŭ Kodeksie ab administracyjnych pravaparušeńniach, a taksama pavialičyć u dva razy štrafy pa hetym artykule. Za drobnaje chulihanstva hramadzianam budzie pahražać štraf u 1-2 tysiačy rasijskich rubloŭ (kala $17-34) abo aryšt na termin da 15 sutak.

Akramia taho, zakonaprajekt uvodzić adkaznaść za paŭtornaje ŭčynieńnie drobnaha chulihanstva, čaho niama ŭ ciapierašniaj redakcyi kodeksa. Za recydyŭ hramadzianam budzie pahražać štraf u pamiery ad 3 da 5 tysiač rubloŭ abo aryšt na termin da 15 sutak.

Zakonaprajekt parłamientaryi ŭnieśli ŭ Dziarždumu jašče ŭ 2014 hodzie, Maskalkova tady była deputatam ad «Spraviadlivaj Rasiei». Pry hetym razhladać zakanadaŭčuju inicyjatyvu pačali tolki ciapier, u 2017 hodzie. Saaŭtar prajekta Dźmitryj Viatkin padčas abmierkavańnia dakumienta na pasiadžeńni dumskaha kamiteta pa zakanadaŭstvie patłumačyŭ heta prosta: «Tak atrymałasia».

Kamitet u vyniku rekamiendavaŭ pryniać zakonaprajekt u pieršym čytańni. Zrešty, paźniej kiraŭnik kamiteta Pavieł Krašanińnikaŭ skazaŭ, što razhlad dakumienta adkładuć z-za surjoznaha hramadskaha rezanansu.

A ŭ piatnicu śpikier Dziarždumy Viačasłaŭ Vałodzin zajaviŭ, što zakonaprajekt moža pahoršyć «maralny klimat u siamji» i maje patrebu va ŭsiebakovym abmierkavańni pierad razhladam Dziarždumaj. Jon dadaŭ, što sam «chutčej suprać, čym za» štrafy i aryšty za mat doma.

Akramia taho, śpikier miarkuje, što pravaprymianialnaja praktyka hetaha zakonaprajekta moža vyklikać masu pytańniaŭ. Tym nie mienš duma, pa jaho słovach, usio roŭna dojdzie da razhladu zakonaprajekta, bo nie rabić hetaha nielha.

• 0
• 0
• 0
• 0
• 0
• 0
• 0
• 0