U sudzie Maskoŭskaha rajona Minska praciahvajecca sud nad 28-hadovym Andrejam Haŭrošam. Mužčynu, u jakoha ŭ navahodniuju noč try razy streliŭ milicyjant, vinavaciać u supracivie milicyi, jamu pahražaje da 5 hadoŭ turmy.
Andrej Haŭroš.
Na pieršym pasiadžeńni pakazańni daŭ paciarpieły — 24-hadovy milicyjant Rusłan Sałaŭjoŭ. Pavodle jaho viersii, u adkaz na zaŭvahu Haŭroš pačaŭ bojku. Rusłan zaŭvažyŭ, što kabura rasšpiliłasia, vyrašyŭ, što ŭ jaho chočuć adabrać pistalet i streliŭ u mužčynu.
Rusłan Sałaŭjoŭ.
28 lipienia svaju viersiju raspavioŭ abvinavačany Andrej Haŭroš.
Pa jaho słovach, kampanijaj u jaho kvatery, adznačali Novy hod, pili harełku. Kali pryjšoŭ susied i paskardziŭsia na šum, Haŭroš kaža, što nie kanfliktavaŭ, viarnuŭsia ŭ kvateru i zrabiŭ muzyku cišej.
«Praź niekatory čas pazvanili ŭ damafon. Ja adkryŭ i vyjšaŭ u «tambur». Tam byŭ supracoŭnik milicyi. Jon pradstaviŭsia, skazaŭ, što na mianie pastupiła skarha ad susiedziaŭ — šumna, - uzhadaŭ Haŭroš. — Ja skazaŭ, što ŭ nas šumu anijakaha niama. Chto skardziŭsia milicyjant admoviŭsia skazać.
Zatym ja zrabiŭ krok da jaho, levaj rukoj pakazaŭ navierch — na susiedziaŭ źvierchu — i palez pa telefon.
U hety momant milicyjant udaryŭ mianie rukoj pa tułavu. Ja pačaŭ padać u tambur, sprabavaŭ utrymacca na nahach i schapiŭsia za supracoŭnika milicyi.
Zatym, spyniajučy ahresiju, ja jaho vyšturchnuŭ z «tambura». My akazalisia za paroham — jon kala lifta, ja na paŭkroka za paroham».
Pa słovach abvinavačanaha, milicyjant nie prapanoŭvaŭ jamu prajechać u adździaleńnie. A sam jon zabrać pistalet nie namahaŭsia, «uvohule jaho nie bačyŭ», zapeŭniŭ Haŭroš.
«Ja znoŭ palez u kišeniu pa telefon. U hety momant ja pačuŭ chłapok. Što heta było ja nie zrazumieŭ. Dalej ciažka skazać: padkasilisia nohi, ja pačaŭ padać. Lažaŭ la lifta. Milicyjant byŭ na leśvicy z vyciahnutaj rukoj u kirunku maich dźviarej. Paśla ja pačuŭ žanočy hołas, jaki kazaŭ, što treba vyklikać chutkuju… Dalej nie pamiataju», - raspavioŭ Andrej Haŭroš.
Mužčyna kaža, što vypiŭ mienš za butelku harełki. U kryvi jaho znajšli 1,88 pramile ałkaholu, ale mužčyna śćviardžaje, što byŭ adekvatny.
Muzyka hrała nie nadta hučna, zapeŭniŭ Haŭroš. Ci śpiavali pieśni, jak kazali susiedzi, — jon nie pamiataje.
Cikava, što kali Andrej Haŭroš paśla reanimacyi lažaŭ u špitali, prajšoŭ sud pa administratyŭnaj spravie za toj šum na Novy hod. Mužčynu pryznali vinavatym u parušeńni paradku. Dali štraf.
«350 rubloŭ, zdajecca», — skazaŭ Haŭroš.
Prakuror spytała ŭ abvinavačanaha, jak jon stavicca da pazova paciarpiełaha milicyjanta (toj paprasiŭ spahnać z Haŭroša 87 rubloŭ za paškodžanuju formu).
«Ja hetaha nie rabiŭ, - adkazaŭ Andrej Haŭroš. - Ale apłacić hatovy».
Nahadajem, kanflikt adbyŭsia 1 studzienia kala 7 ranicy. Svajaki Haŭroša nie bačyli bojku, jany vyskačyli z kvatery ŭžo paśla strełaŭ. Pa viersii milicyi, pravaachoŭnik, jakoha vyklikali susiedzi, paprasiŭ Andreja zrabić muzyku ŭ kvatery cišejšaj, paśla čaho toj kinuŭsia na jaho. Milicyjant streliŭ, kab spynić pjanaha mužčynu.
Paśla Andrej trapiŭ u balnicu. Pa słovach milicyi, lačyŭsia i toj supracoŭnik MUS, jaki stralaŭ — u jaho nibyta dyjahnastavali čerapna-mazhavuju traŭmu.
Haŭroša paśla reanimacyi adrazu pieraviali ŭ SIZA. Dalejšy jaho los vyrašyć sud.
Paśla zdareńnia MUS pravodziła pravierku pavodzinaŭ supracoŭnika, ale parušeńniaŭ nie znajšli. Heta padkreślivaŭ i ministr MUS Ihar Šunievič, adznačyŭšy, što maładomu milicyjantu chiba «trochi nie chapiła prafiesijanalizmu».
Dajšła hetaja historyja navat da Łukašenki. Jon taksama padtrymaŭ milicyjanta.
![Клас Клас](https://nashaniva.com/images/reactions/reaction-like.png)
![Панылы сорам Панылы сорам](https://nashaniva.com/images/reactions/reaction-facepalm.png)
![Ха-ха Ха-ха](https://nashaniva.com/images/reactions/reaction-smile.png)
![Ого Ого](https://nashaniva.com/images/reactions/reaction-omg.png)
![Сумна Сумна](https://nashaniva.com/images/reactions/reaction-sad.png)
![Абуральна Абуральна](https://nashaniva.com/images/reactions/reaction-anger.png)