Realizacyja norm abnoŭlenaha dekreta numar 3 «Ab papiaredžańni sacyjalnaha ŭtrymanstva» budzie ŭ kampietencyi miascovych orhanaŭ ułady. Pra heta paviedamiła žurnalistam ministr pracy i sacyjalnaj abarony Iryna Kaścievič pa vynikach narady ŭ Alaksandra Łukašenki, pieradaje BIEŁTA.
«Dekret numar 3 nie admianiajecca, pry hetym urad prapanuje novyja padychody pa stymulavańni zaniataści nasielnictva. Akcent robicca na orhanach vykanaŭčaj ułady na miescach. Pierš za ŭsio jany pracujuć z pracazdolnymi hramadzianami ŭ płanie aktyvizacyi stymulavańnia i sadziejničańnia zaniataści. Usim, chto choča i moža pracavać, orhany vykanaŭčaj ułady pavinny pradastavić hetu mahčymaść i akazać sadziejničańnie ŭ pracaŭładkavańni», — skazała Iryna Kaścievič.
Urad taksama prapanuje realizavać pryncyp «nie pracuješ — płaciš za pasłuhi». «Heta pasłuhi, jakija siońnia subsidzirujucca ź dziaržaŭnaha biudžetu. Pieralik budzie vyznačać urad, ciapier jon pracuje ŭ hetym napramku», — adznačyła ministr.
Inakš kažučy, płanujecca, što pracazdolnyja hramadzianie, jakija nie zaniaty ŭ ekanomicy, buduć apłačvać subsidavanyja za košt dziaržbiudžetu pasłuhi pa košcie, jaki zabiaśpiečvaje kampiensacyju za ich akazańnie. Adnak usie varyjanty, jak budzie budavacca rabota ŭ hetym kirunku, jašče vyvučajucca.
Da raspracoŭki hetaha pieraliku pasłuh padklučacca i miascovyja orhany ŭłady. Mahčyma, jany kankretyzujuć ahulny pieralik, prapanavany ŭradam, dla svaich rehijonaŭ.
Dla realizacyi takoha padychodu da stymulavańnia zaniataści nasielnictva buduć stvaracca bazy danych ź infarmacyjaj ab rodzie dziejnaści kožnaha hramadzianina.
«Vy viedajecie, što da kanca 2018 hoda staić zadača stvaryć Biełaruskuju intehravanuju servisna-raźlikovuju sistemu — ID-kartku. Atrymańnie hetaj ID-kartki i spałučeńnie praz ahulnadziaržaŭnuju aŭtamatyzavanuju infarmacyjnuju sistemu ź viedamasnymi bazami danych daść mahčymaść ubačyć čałavieka: pracuje jon siońnia ci nie. Kali nie pracuje, to dziaržava budzie ŭžo zusim inakš pradastaŭlać pasłuhi», — rastłumačyła jana.
