Міністр працы пра дэкрэт №3: Да канца 2018 года на кожнага беларуса завядуць ID-картку
Рэалізацыя норм абноўленага дэкрэта нумар 3 «Аб папярэджанні сацыяльнага ўтрыманства» будзе ў кампетэнцыі мясцовых органаў улады. Пра гэта паведаміла журналістам міністр працы і сацыяльнай абароны Ірына Касцевіч па выніках нарады ў Аляксандра Лукашэнкі, перадае БЕЛТА.
«Дэкрэт нумар 3 не адмяняецца, пры гэтым урад прапануе новыя падыходы па стымуляванні занятасці насельніцтва. Акцэнт робіцца на органах выканаўчай улады на месцах. Перш за ўсё яны працуюць з працаздольнымі грамадзянамі ў плане актывізацыі стымулявання і садзейнічання занятасці. Усім, хто хоча і можа працаваць, органы выканаўчай улады павінны прадаставіць гэту магчымасць і аказаць садзейнічанне ў працаўладкаванні», — сказала Ірына Касцевіч.
Урад таксама прапануе рэалізаваць прынцып «не працуеш — плаціш за паслугі». «Гэта паслугі, якія сёння субсідзіруюцца з дзяржаўнага бюджэту. Пералік будзе вызначаць урад, цяпер ён працуе ў гэтым напрамку», — адзначыла міністр.
Інакш кажучы, плануецца, што працаздольныя грамадзяне, якія не заняты ў эканоміцы, будуць аплачваць субсідаваныя за кошт дзяржбюджэту паслугі па кошце, які забяспечвае кампенсацыю за іх аказанне. Аднак усе варыянты, як будзе будавацца работа ў гэтым кірунку, яшчэ вывучаюцца.
Да распрацоўкі гэтага пераліку паслуг падключацца і мясцовыя органы ўлады. Магчыма, яны канкрэтызуюць агульны пералік, прапанаваны ўрадам, для сваіх рэгіёнаў.
Для рэалізацыі такога падыходу да стымулявання занятасці насельніцтва будуць стварацца базы даных з інфармацыяй аб родзе дзейнасці кожнага грамадзяніна.
«Вы ведаеце, што да канца 2018 года стаіць задача стварыць Беларускую інтэграваную сэрвісна-разліковую сістэму — ID-картку. Атрыманне гэтай ID-карткі і спалучэнне праз агульнадзяржаўную аўтаматызаваную інфармацыйную сістэму з ведамаснымі базамі даных дасць магчымасць убачыць чалавека: працуе ён сёння ці не. Калі не працуе, то дзяржава будзе ўжо зусім інакш прадастаўляць паслугі», — растлумачыла яна.
Цяпер чытаюць
«Дэкаланізацыя — гэта прыйсці і заняць сваё месца». Наста Рагатко будзе ўдзельнічаць у фестывалі расійскай кнігі. Суліма яе асудзіў, яна не змаўчала ў адказ6464
Каментары