Ministr zamiežnych spraŭ Polščy Vitold Vaščykoŭski ŭ efiry telekanała TVP Info pastaviŭ pad sumnieŭ zakonnaść pahadnieńnia, zaklučanaha ŭ 1953 h. pamiž tahačasnymi polskimi ŭładami ź fiederalnym uradam Hiermanii ab admovie ad reparacyj.
«Z momantu zaviaršeńnia Druhoj suśvietnaj vajny heta pytańnie zastajecca nieŭrehulavanym. Rašeńnie ad 1953 h. možna stavić pad sumnieŭ, bo da kanca nie viadoma ad čaho my admovilisia. Polšča na toj čas nie była niezaležnaj dziaržavaj, kab prymać takija rašeńni. Heta taksama tyčycca i tahačasnaj Hiermanii, jak Uschodniaj tak i Zachodniaj», — skazaŭ kiraŭnik polskaj dypłamatyi.
Pry hetym Vaščykoŭski adznačyŭ, što pytańnie reparacyj nie źjaŭlajecca adnaznačnym i patrabuje jurydyčnaha analizu.
Upieršyniu hetaje pytańnie padniaŭ padčas lipieńskaha źjezda Abjadnanych pravych sił kiraŭnik partyi «Prava i spraviadlivaść» Jarasłaŭ Kačyński. Tydzień tamu deputat hetaj partyi Arkadyuš Mularčyk padaŭ zapyt u Biuro parłamienckaha analizu dla padrychtoŭki ekśpiertnaha zaklučeńnia ab mahčymaści atrymańnia reparacyj ad Niamieččyny za škodu, pryčynienuju padčas Druhoj suśvietnaj vajny.
Pres-sakratar urada Hiermanii Ulryka Demier zajaviła, što ŭłady ŭ Bierlinie adčuvajuć palityčnuju, maralnuju i finansavuju adkaznaść za Druhuju suśvietnuju vajnu, ale pytańnie ab hiermanskich reparacyjach dla Polščy było kančatkova ŭrehulavana.
Pavodle jaje słoŭ, u 1953 hodzie Varšava admoviłasia ad dadatkovych reparacyjnych vypłat i paśla nieadnarazova paćviardžała heta.
Miž tym, zhodna z vynikami apytańnia Ipsos dla telekanała TVP, patrabavańnie reparacyj ad Niamieččyny padtrymali 2/3 apytanych palakaŭ. Tak, 63% respandentaŭ ličać, što Niamieččyna pavinna vypłacić kampiensacyju Polščy «za straty, naniesienyja padčas Druhoj suśvietnaj vajny», a 68% - žadajuć kampiensacyi «za złačynstvy hienacydu, učynienyja suprać polskaha naroda» padčas vajny.
