14—20 vieraśnia na terytoryi Rasiei i Biełarusi projduć maštabnyja aperatyŭna-stratehičnyja vučeńni «Zachad-2017». Čakajecca, što ŭ ich buduć udzielničać kala 13 tysiač vajskoŭcaŭ i da 680 adzinak bajavoj techniki.
Minabarony Biełarusi paviedamiła radyjo «Svaboda», što na vučeńni zaprošana kala 80 mižnarodnych naziralnikaŭ:
«Dla nazirańnia za vučeńniami zaprošanyja pradstaŭniki mižnarodnych arhanizacyj: AAN, NATO, ADKB, SND, Mižnarodnaha Čyrvonaha Kryža. Taksama pradstaŭniki vajskova-dyplamatyčnaha korpusu, akredytavanaha pry Ministerstvie abarony, zaprošanyja ŭ jakaści naziralnikaŭ za vučeńniami «Zachad-2017».
U miežach realizacyi rehijanalnych zachadaŭ davieru i biaśpieki, a taksama dvuchbakovych damoŭlenaściaŭ na mierapryjemstvy zaprošanyja pradstaŭniki vajskovych viedamstvaŭ Ukrainy, Polščy, Litvy, Łatvii, Estonii, Švecyi, Narvehii. Usiaho čakajecca bolš za 80 čałaviek», — paviedamili Svabodzie ŭ presavaj słužbie Ministerstva abarony Biełarusi.
Vučeńni projduć na šaści palihonach u Biełarusi: Lepielskim, Barysaŭskim, Łośvidzie, Asipovickim, palihonach VPS i vojskaŭ SPA Ružanskim i Damanaŭskim, a taksama pablizu vioski Dretuń.
Da ŭdziełu ŭ vučeńniach planujecca pryciahnuć da 12 700 vajskoŭcaŭ. Na terytoryi Biełarusi ŭdzieł u vučeńniach buduć brać 10 200 vajskoŭcaŭ, u tym liku kala 7200 ad Uzbrojenych sił Biełarusi i kala 3000 — ad Uzbrojenych sił Rasiejskaj Federacyi. Usiaho ŭ vučeńni budzie zadziejničana da 680 adzinak bajavoj techniki.
Kiraŭnik vojskaŭ ZŠA ŭ Eŭropie hienerał Ben Hodžes 20 lipienia zajaviŭ Reuters, što sajuźniki Štataŭ va Ŭschodniaj Eŭropie i Ŭkrainie turbujucca nakont biełaruska-rasiejskich vučeńniaŭ «Zachad-2017».
Pavodle Hodžesa, vučeńni mohuć być «trajanskim kaniom», nacelenym na toje, kab pakinuć u Biełarusi vajskovuju techniku.
