U Kamiennaj Horcy ŭ Minsku chłopčyka ŭkusiła hadziuka FOTY
«Majho syna Jana ŭkusiła źmiaja», — paviedamiŭ «Našaj Nivie» jaho baćka Daniła Lach.
Niaščasny vypadak zdaryŭsia ŭ sieradu, i ciapier, kali žyćciu chłopčyka ničoha nie pahražaje, baćka vyrašyŭ paviedamić pra heta ŚMI.
Janu 10 hadoŭ, jon navučeniec 23-j himnazii. U aŭtorak dniom chłopiec vyjšaŭ z padjezda ŭ dvor vulicy Kuncaŭščyna, i adrazu ŭbačyŭ dziaciej, jakija zhurtavalisia ŭ adnym miescy i niešta razhladajuć. Jon taksama zacikaviŭsia, padyšoŭ — prosta pierad padjezdam lažała źmiaja. Dzieci jaje šturchali, hulalisia. Janka taksama pryniaŭ udzieł u ahulnaj zabavie, adnak jak tolki padnios da źmiai palec, taja jaho ŭdžaliła.
Chłopčyk vielmi pierapałochaŭsia, prybieh damoŭ, płakaŭ: z ukazalnaha palca sačyłasia kroŭ. Spačatku maci vyrašyła dziažurna advieści jaho ŭ palikliniku, ale pa darozie tudy jamu stała drenna: Jan źbialeŭ i pierastaŭ bačyć. Tady ŭžo baćki vyklikali chutkuju i MNS.
«Nichto nie čakaje sustreć hadziuku na prystupkach svajho doma ŭ horadzie. Heta ž nie les. Tamu dla nas heta byŭ fors-mažor, a Janka nie viedaŭ, jak treba siabie pavodzić sa źmiajoj», — kamientuje zdareńnie baćka.
Chłopčyka pryvieźli ŭ reanimacyju 3-j haradskoj dziciačaj balnicy, daktary jakoj spačatku sumniavalisia, što ŭkusić małoha ŭ horadzie mahła hadziuka, maŭlaŭ, adkul jana ŭziałasia ŭ Minsku? Usie byli ŭpeŭnienyja, što heta miadzianka. I tolki kali MNS vynieśli vierdykt — heta hadziuka zvyčajnaja, bo vočy ŭ jaje ź viertykalnym razrezam, sprečka spyniłasia.
Janu ŭviali syvaratku-supraćjadździe, niekalki dzion jon pravioŭ u reanimacyi. Ciapier jaho stan stabilny, chłopčyk adčuvaje siabie dobra. Praŭda, da hetaha času udžalenaja ruka zastajecca ŭ aciokach i hiematomach. U balnicy jon praviadzie jašče minimum tydzień. Baćki raskazali «Našaj Nivie», što jany vielmi ŭdziačnyja daktaram i spadziajucca, što nijakich nastupstvaŭ dla arhanizma atruta mieć nie budzie.
Vinoŭnicu ž zdareńnia amal adrazu adłavili supracoŭniki MNS, chacia jana sprabavała źbiehčy, źmiaścili ŭ słoik i izalavali.
Nahadajem, 3 žniŭnia supracoŭniki MNS likvidavali hadziuku ŭ staličnaj kvatery na vulicy Łandara: taja zataiłasia ŭ plicie. U červieni źmiaja taksama ŭkusiła mužčynu kala Drazdoŭ. Mahčyma, takaja hipieraktyŭnaść źmiej u stalicy nazirajecca ŭ suviazi z mokrym letam.
«A što ŭ vas za prablemy? Daloka da Minska ci niama kamu padvieźci?» Publičnaja pikiroŭka Łukašenki i Pašyniana10
Kamientary