U sud pieradali materyjały spravy ab zabojstvie amal trochhadovaj daŭniny.
U vieraśni 2014 hoda ŭ rasijskim Padolsku dvoje biełarusaŭ zabili 56-hadovaha žychara Maskoŭskaj vobłaści.
Na momant złačynstva adnamu z mužčynaŭ było 25 hadoŭ, jaho siabru — 27. Abodva jany rodam z Kosava ŭ Ivacevickim rajonie.
Nočču mužčyny hałasavali na trasie. Ich padabraŭ kiroŭca na «Kia». Biełarusy śpiecyjalna pakazali kiroŭcu maršrut, jaki prachodzić praź biaźludny ŭčastak miascovaści ŭ pryvatnym siektary Padolska.
Tam starejšy mužčyna, jaki znachodziŭsia na zadnim siadzieńni, staŭ dušyć paciarpiełaha, a jaho maładziejšy siabar pačaŭ nanosić udary pa hałavie. Kali paciarpieły pasprabavaŭ uciačy, pasažyry dahnali jaho i pačali bić kamianiami, ad čaho toj pamior na miescy zdareńnia. Cieła zabitaha jany adciahnuli ŭ bok, dzie nakryli draŭlanym ščytom.
Dalej biełarusy zabrali kala 3 000 rasijskich rubloŭ i mabilny telefon. Mašynu jany vyrašyli schavać u rajonie raki Hžać pad Smalenskam.
Pra złačynstva stała viadoma praź niekalki dzion, kali cieła zabitaha znajšoŭ vypadkovy čałaviek. Rasijskija śledčyja praź miesiac vyznačyli asoby padazravanych. 25-hadovy mužčyna na toj momant znachodziŭsia ŭ Maskvie, tam jon i byŭ zatrymany i zaklučany pad vartu. Jaho saŭdzielnik da taho času paśpieŭ viarnucca na radzimu.
Zatrymanaha ŭ Rasii biełarusa pryznali vinavatym i asudzili na 15 hadoŭ. Siońnia jon adbyvaje pakarańnie ŭ rasijskaj kałonii. Paśla taho, jak prysud ustupiŭ u zakonnuju siłu, rasijskija śledčyja nakiravali ŭ Biełaruś materyjały spravy. U mai 2017 hoda ŭ Biełarusi zatrymali druhoha fihuranta spravy, paviedamiła «Našaj Nivie» Maryna Drańkova, aficyjny pradstaŭnik SK pa Bresckaj vobłaści.
Bresckimi śpiecyjalistami dadatkova praviedzieny sudova-hienietyčnyja daśledavańni, jakija paćvierdzili dačynieńnie žychara Kosava da ździajśnieńnia złačynstva. Mužčynu vinavaciać u zabojstvie i rabaŭnictvie.
Materyjały vyvučany prakuroram i nakiravany ŭ brescki abłasny sud dla razhladu.