30 žniŭnia — 1 vieraśnia ŭ Biełarusi budzie znachodzicca delehacyja polskich parlamentaroŭ na čale ź vice-śpikieram Sejmu Ryšardam Terleckim. Pra heta Svabodzie siońnia skazaŭ staršynia kamisii Pałaty pradstaŭnikoŭ u mižnarodnych spravach Valer Varaniecki:
«Spadar Terlecki byŭ u nas letaś. I voś praz hod novy vizyt. Pieramovy projduć nia tolki ŭ Miensku, ale i ŭ Haradzienskaj vobłaści. Chočam, kab polskija kalehi pakantaktavali z rehijanalnymi ŭładami, ź miascovymi biznesoŭcami. Dumaju, ad hetaha budzie vialikaja karyść».
Kali letašni vizyt prachodziŭ na tle palapšeńnia stasunkaŭ pamiž Mienskam i Varšavaj, to apošnim časam sytuacyja źmianiłasia ŭ horšy bok.
Tydzień tamu ministar zamiežnych spraŭ Polščy Vitald Vaščykoŭski zajaviŭ, što Varšava nia maje namieru zakuplać u budučyni enerhiju ź Biełaruskaj AES i ličyć hety prajekt niebiaśpiečnym.
«My nia źmienim našaj dumki pra kuplu enerhii z hetaj atamnaj stancyi. Ja dumaju, što ŭ asnovie jaje lažać niebiaśpiečnyja technalohii, a adsutnaść biaśpieki pryviała da Čarnobylu. Tamu my suprać hetaj AES, my nie źbirajemsia supracoŭničać i kuplać jaje enerhiju», — skazaŭ ministar.
U adkaz na hetyja vykazvańni MZS Biełarusi vyklikaŭ dla tłumačeńniaŭ ambasadara Polščy.
«Vizyt delehacyi na čale z Ryšardam Terleckim byŭ zaplanavany daŭno, — tłumačyć sytuacyju palitolah Aleś Łahviniec. — I słovy polskaha ministra nie pavinny sarvać pajezdku. Bo ministar moža siońnia skazać adno, a praź niejki čas — inšaje.
Palityka Polščy adnosna Biełarusi idzie zrazumiełym šlacham. Palaki chočuć vykarystać sproby biełaruskich uładaŭ naładzić kantakty z Zachadam. I Polšča tut nia choča niekamu sastupać.
A ŭłady Biełarusi, nie sastupajučy ŭ hałoŭnym, chočuć kamunikavać z krainami Eŭraźviazu. I tut intaresy Miensku i Varšavy supadajuć».
U studzieni-lutym 2017 hodu adbyŭsia aficyjny vizyt biełaruskich parlamentaroŭ na čale z namieśnikam staršyni nižniaj pałaty Nacyjanalnaha schodu Balasłavam Pirštukom. Jon staŭ pieršym na takim roŭni za šmat hadoŭ.
Polska-biełaruskija stasunki doŭhi čas byli zamarožanyja — ad razhonu Płoščy ŭ Miensku ŭ 2010-m da 2016 hodu, kali ŭ sakaviku Biełaruś naviedaŭ ministar zamiežnych spraŭ Polščy Vitald Vaščykoŭski. Letaś Biełaruś naviedali dźvie parlamenckija delehacyi z Polščy: na čale sa śpikieram Senatu Stanisłavam Karčeŭskim u śniežni i na čale ź vice-śpikieram Sejmu Ryšardam Terleckim u žniŭni.
Čamu Cichanoŭskaja nie pajechała na pachavańnie Papy?23
Kamientary