Hałoŭny ideołah Minabarony raskrytykavaŭ adnačasova i rusafobaŭ, i «psieŭdaimpiercaŭ ruskaha śvietu»
Hałoŭny ideołah Ministerstva abarony, pamočnik ministra Alaksandr Hura vystupiŭ z prahramnym artykułam na staronkach časopisa «Biełaruskaja dumka». Publikacyja maje nazvu «Asnovy kansalidacyi hramadstva». Vialikaja častka publikacyi pryśviečanaja patryjatyzmu, a taksama niezaležnaści Biełarusi.
«U Kancepcyi nacyjanalnaj biaśpieki i ŭ Vajennaj daktrynie siarod unutranych krynic pahroz u vajennaj śfiery, vajennych niebiaśpiek na ŭzroŭni ryzyk i vyklikaŭ Biełarusi źviernuta ŭvaha na pasłableńnie ŭ hramadstvie pačućcia patryjatyzmu, hatoŭnaści hramadzian da ŭzbrojenaj abarony svajoj krainy. Heta značyć na toje, čaho nielha dapuścić ni pry jakich umovach», — adznačaje Hura ŭ pačatku publikacyi.
Jon piša, što Biełaruś užo skłałasia jak niezaležnaja dziaržava i jana maje svaje nacyjalnyja intaresy. «Nacyjanalnyja, a nie nacyjanalistyčnyja».
Siarod nacyjanalnych intaresaŭ ideołah nazyvaje ŭzmacnieńnie vajskovaha i vajskova-techničnaha supracoŭnictva z Rasijaj, a taksama pavyšeńnie efiektyŭnaści ADKB.
Pry hetym Hura adznačaje, što lubyja dziejańni, jakija supiarečać nacyjanalnym intaresam Biełarusi, buduć paryravacca. U jakaści prykłada jon pryvodzić zabaronu ŭ Rasii niekatorych biełaruskich tavaraŭ pa «nadumanych pryčynach».
«Adstojvańnie Respublikaj Biełaruś svaich nacyjanalnych intaresaŭ zadavalniaje nie ŭsich», — ličyć ideołah.
«Z adnaho boku, pad łozunham «Biełaruś — u Jeŭropu» maje miesca sproba rastvareńnia nacyjanalna-kulturnych identyčnaściaŭ šlacham prapahandy nibyta jeŭrapiejskich kaštoŭnaściaŭ. Ź inšaha, sinchronna ździajśniajucca ŭkidy pravakacyjnaj infarmacyi najbolš destruktyŭnymi psieŭdapatryjatyčnymi siłami ŭ Rasii, u pryvatnaści ab štučnaści biełaruskaj dziaržavy», — voś tak u adzin šerah Hura pastaviŭ tych, chto vystupaje za intehracyju Biełarusi ź Jeŭropaj, i rasijskich šavinistaŭ.
«U suviazi z hetym maje miesca dyfierencyjavanaje ŭździejańnie na roznyja sacyjalnyja hrupy z metaj farmavańnia hramadskaj dumki: u biełaruskich hramadzian — pra nibyta isnuju pahrozu suvierenitetu Biełarusi z boku Rasii; u nasielnictva Rasijskaj Fiederacyi — pra nibyta hieapalityčny pavarot Biełarusi ŭ bok Zachadu. I toje, i inšaje nakiravana nie na kansalidacyju hramadstva, a na jaho razbałansavańnie», — ličyć ideołah Minabarony.
Alaksandr Hura piša pra toje, što niekatoryja «ŭpłyvovyja rasijskija subjekty» pryncypova nie pryznajuć niezaležnaść Biełarusi — Vyšejšaja škoła ekanomiki, «Rehnum», «Impieryja».
«Tym samym u častki hramadstva farmujecca prymityŭnaje alternatyŭnaje dualistyčnaje razumieńnie patryjatyzmu (albo rusafobija, albo «rasijskaja» samaidentyfikacyja z absalutnym niepryniaćciem faktu suvierennaści i niezaležnaści ŭłasnaj dziaržavy)».
Supracoŭnik Minabarony pryznaje, što ŭ hramadskim usprymańni niama poŭnaha razumieńnia niezaležnaści Biełarusi. «Kožny viedaje, što Respublika Biełaruś — suvierennaja, niezaležnaja dziaržava. Ale ad viedaŭ da razumieńnia, jak toj kazaŭ, «dystancyja vializnaha pamieru», — miarkuje spadar Hura.
Jakija rečy i padziei, na dumku ideołaha, sadziejničajuć umacavańniu kansalidacyi biełaruskaha hramadstva? «Vialikaja Pieramoha, ideja sacyjalnaj spraviadlivaści, bazavyja kaštoŭnaści cyvilizacyi». Hura piša pra radykałaŭ, jakija imknucca razburyć «tradycyjnyja kaštoŭnaści, jakija cemientujuć hramadstva».
«Na sučasnym etapie vastryjo raskołu nakiravanaje na ŭkaranieńnie ŭ śviadomaść ludziej, pierš za ŭsio moładzi, prymityŭnaha razumieńnia patryjatyzmu, padavanaha albo pad rusafobijaj, albo pad idejaj psieŭdaimpierskich ambicyj, schavanych pad formaj «ruskaha śvietu».
«Praces farmavańnia nacyjanalnaj idei vyklučna składany. Naprykład, nacyjanalnuju ideju ŭžo na miažy 90-ch hadoŭ minułaha stahodździa mahli zahubić, jak «prafiesijnyja» nacyjanał-radykały, tak i tyja, chto sprabavaŭ pastavić pad sumnieŭ samo isnavańnia biełarusaŭ jak nacyi (takija namiery nieadnarazova vyjaŭlalisia i prajaŭlajucca, až da prapanovaŭ intehravać Biełaruś u skład Rasii ledź nie ŭ jakaści fiederalnaj akruhi)», — ličyć vajskoviec.
Alaksandr Hura naradziŭsia ŭ 1958 hodzie ŭ Žytomiry (Ukraina). Skončyŭ Uljanaŭskaje vyšejšaje vajskova-techničnaje vučylišča, Humanitarnuju akademiju Uzbrojenych siłaŭ Rasii. Ad 1992 — na słužbie ŭ Ministerstvie abarony Biełarusi. Ad 2005 — pamočnik ministra pa ideałahičnaj pracy. Hienierał-major, kandydat psichałahičnych navuk.
Kamientary