Alpinist pakinuŭ dziaŭčynu na hary, kab źbiehać pa dapamohu. Ciapier jaho sudziać jak za zabojstva
U Aŭstryi pierad sudom stanie alpinist, jakoha abvinavačvajuć u nienaŭmysnym zabojstvie praz hrubuju nieaściarožnaść paśla hibieli jaho dziaŭčyny padčas uzychodžańnia na Hroshłoknier — najvyšejšuju haru krainy (3798 m), piša The Guardian.
33‑hadovaja Kierstyn zahinuła 19 studzienia 2025 hoda, zamiorzšy prykładna za 50 mietraŭ ad viaršyni. Razam sa svaim 36‑hadovym partnioram Tomasam jana padymałasia bolš za 17 hadzin. Paśla ŭmovy nadvorja rezka pahoršylisia: tempieratura apuściłasia amal da −9°C, z ulikam vietru jana adčuvałasia jak −20°C, a paryvy vietru dasiahali kala 72 km/h.
Kala druhoj hadziny nočy Tomas pakinuŭ Kierstyn u stanie źniasileńnia i pieraachaładžeńnia, kab spuścicca z hary pa dapamohu. Prakurory ličać, što jak bolš daśviedčany ŭdzielnik i faktyčny kiraŭnik uzychodžańnia jon niasie asnoŭnuju adkaznaść za pryniatyja rašeńni.
Abvinavačańnie śćviardžaje, što Tomas dapuściŭ dzieviać surjoznych pamyłak. Siarod ich:
- rašeńnie praciahvać padjom, niahledziačy na niedastatkovy vopyt Kierstyn u składanych alpijskich maršrutach takoj praciahłaści i vyšyni;
- start uzychodžańnia na dźvie hadziny paźniej za rekamiendavany čas;
- niedachop avaryjnaha ryštunku;
- nieadpaviedny abutak u dziaŭčyny;
- adsutnaść svoječasovaha sihnału biedstva i admova ad spynieńnia maršrutu raniej.
Prakurory spasyłajucca na jurydyčnuju kancepcyju, pavodle jakoj čałaviek z bolšym dośviedam i kampietencyjami niasie bolšuju adkaznaść za pryniatyja rašeńni.
U toj ža čas Tomas svaju vinu admaŭlaje. Jahony advakat nazyvaje zdareńnie trahičnaj vypadkovaściu i śćviardžaje, što para sumiesna płanavała maršrut, mieła dastatkovy dośvied, dobruju fizičnuju formu i naležny ryštunak.
Maci zahinułaj taksama nie ličyć Tomasa vinavatym i zajaŭlaje, što suprać jaho razhornutaje «palavańnie na viedźmaŭ». Pa jaje słovach, Kierstyn była ŭ vydatnaj fizičnaj formie i raniej prachodziła jašče bolš składanyja maršruty — jak samastojna, tak i razam z partnioram.
Kali sud pryznaje Tomasa vinavatym, jamu pahražaje da troch hadoŭ pazbaŭleńnia voli.
Niepalec uzyšoŭ na Evierest čatyry razy za 15 dzion
Siem alpinistaŭ zahinuli ŭ Niepale ŭ vyniku schodu łaviny
Alpinist z Polščy staŭ pieršym čałaviekam, jaki spuściŭsia z Evierestu na łyžach biez kisłarodnych bałonaŭ
Ciepłavizar nie vyjaviŭ prykmiet žyćcia ŭ alpinistki, jakaja złamała nahu na vyšyni 7000 mietraŭ
Kamientary