Niadaŭna stała viadoma, što Alaksandr Łukašenka prakaciŭsia na apošniaj madeli elektramabila «Tesła» i daručyŭ ajčynnym raspracoŭščykam imknucca da hetaha ŭzroŭniu. «Naša Niva» vyrašyła vyśvietlić, jakija elektramabili karystajucca papularnaściu siarod biełarusaŭ.
Pavodle danych DAI, aŭtamabili na elektryčnaj ciazie nie vielmi papularnyja: pa stanie na žnivień 2017 hoda ŭ krainie ich zarehistravana kala 100. Ź ich 19 elektramabilaŭ marki Tesla, 43 marki Nissan Leaf i kala 40 — Chevrolet Volt.
Tesla
Kampanija «Tesła» pad kiraŭnictvam Iłana Maska — samy viadomy vytvorca elektramabilaŭ u śviecie. Ichnija ž mašyny i samyja darahija.
Zarada lityj-ijonnaha akumulatara madeli S, jakuju prateściravaŭ kiraŭnik Biełarusi, chapaje na 426 km, što dazvalaje Tesla Model S pieraadolvać najbolšuju adlehłaść z dastupnych na rynku elektramabilaŭ. Bazavaja madel S vykarystoŭvaje vadkasnaje astudžeńnie ruchavika pieramiennaha toku, jaki maje mahutnaść 362 konskich siły.
Ceny na Model S u ZŠA ŭ 2017 hodzie pačynajucca ad 70 tysiač dalaraŭ i dachodziać da 140 tysiač. Samy darahi varyjant — Tesla Model S P100D z zapasam chodu ŭ 507 kiłamietraŭ, zdolny razhaniacca da 100 km/h za 2,7 siekundy. Akurat pra heta skazaŭ Łukašenka: «Startuje jon, jak kaśmičny karabiel, i jašče bolš mahutny. Za dźvie z pałovaj siekundy — 100 km». Adsiul možna zrabić vynik, što prateściravaŭ jon mienavita hetuju madel.
Nissan Leaf
Japonski elektramabil Nissan Leaf sieryjna vypuskajecca ź viasny 2010 hoda. Zborka pieršych sieryjnych asobnikaŭ pačałasia ŭ Japonii, potym z 2012 hoda Nissan razharnuŭ vytvorčaść elektramabilaŭ Leaf na zavodach u ZŠA (štat Teniesi), a z 2013 hoda — u Vialikabrytanii.
Jomistaści akumulatara Nissan Leaf chapaje na 160 km prabiehu, i ŭ hetym jon značna sastupaje Teśle. Nižejšaja i mahutnaść elektraruchavika — 108 konskich siłaŭ.
Pryvad elektramabila — piaredni. Nižniaje raźmiaščeńnie samaha ciažkaha elemienta aŭtamabila — akumulatarnaj batarei — zabiaśpiečvaje lepšuju ŭstojlivaść.
Nissan Motor zajaŭlaje pra madel Leaf jak pra pieršy ŭ śviecie masavy i dastupny na hłabalnym rynku elektramabil. Košt jaho i sapraŭdy adnosna nizki: za madel 2011 hoda ŭ Jeŭropie prosiać kala 30 tysiač jeŭra.
Chevrolet Volt
Chevrolet Volt byŭ prezientavany na Detrojckim aŭtasałonie ŭ studzieni 2007 hoda. Heta hibrydny aŭtamabil. Asnoŭnym źjaŭlajecca ciahavy elektramator na 149 k. s. (što adroźnivaje jaho ad zvyčajnych «hibrydaŭ», dzie asnoŭnym usio ž źjaŭlajecca ruchavik unutranaha zharańnia), i ŭ dadatak da jaho čatyrochcylindravy bienzinavy. Ruchaviki mohuć pracavać razam ci asobna adzin ad adnaho.
Da chutkaści 100 km/h Chevrolet Volt razhonicca za 9 siekund (suprać 2,7 siekundy ŭ Tesla).
Karystalniki kažuć, što kiravalnaść Chevrolet Volt znachodzica na ŭzroŭni zvyčajnaha biudžetnaha aŭto.
Na aficyjnym sajcie Chevrolet ceny na elektramabil pačynajucca ad 34 tysiač dalaraŭ.
Varta adznačyć, što šmat jakija krainy prapanujuć tak zvanuju «ekałahičnuju» kampiensacyju pry nabyćci elektramabilaŭ, jakaja zaležyć ad koštu samoj mašyny. Tak, pry kupli Chevrolet Volt ułady ZŠA dapamahajuć zekanomić kala 8000 dalaraŭ.
Ciapier čytajuć
Čym ciapier zajmajucca dziaŭčaty, jakich letaś nazvali samymi pryhožymi ŭ Biełarusi?9
Čym ciapier zajmajucca dziaŭčaty, jakich letaś nazvali samymi pryhožymi ŭ Biełarusi?
Mistyčnaje koła Vilni: Kalinoŭski byŭ pachavany ź miedaljonam śviatyni, kala jakoj vyras hatyčny pałac doktara z-pad Oršy. Ciapier pareštki Kalinoŭskaha pierapachavali ŭ mahilni taho ž doktara2121
Kamientary