35 maładych biełarusaŭ i biełarusak, za jakimi varta sačyć: apublikavany pieršy śpis Next 35
Ad zasnavalnikaŭ startapaŭ i navukoŭcaŭ da muzykaŭ, režysioraŭ i aŭtaraŭ miedyjaprajektaŭ — u pieršy Next 35 uvajšli biełarusy i biełaruski da 35 hadoŭ, jakija budujuć karjeru i stvarajuć prajekty mižnarodnaha maštabu. Raskazvajem, jak z amal 300 kandydataŭ vybrali 35 imionaŭ i chto ŭ vyniku trapiŭ u śpis.
Next 35 — novy štohadovy śpis 35 biełarusaŭ i biełarusak z usiaho śvietu, jakim jašče nie spoŭniłasia 35 hadoŭ i jakija raźvivajuć karjeru, biznes, navukovyja, kulturnyja i hramadskija prajekty na mižnarodnym uzroŭni.
Prajekt zapuścili dźvie biełaruskija inicyjatyvy — Škoła kampietencyj (Competence School) i Belarus Future Leadership Award (BFLA).
Aŭtary Next 35 adrazu robiać važnuju ahavorku: heta nie konkurs i nie rejtynh «35 najlepšych biełarusaŭ». Jany apisvajuć prajekt chutčej jak sprobu zafiksavać pakaleńnie ŭ peŭny momant — zaŭvažyć ludziej, jakija ciapier rastuć, zapuskajuć niešta novaje i stanoviacca častkaj mižnarodnych prafiesijnych supolnaściaŭ.
Kandydataŭ šukali ŭ siami katehoryjach: Rising Stars (Uzychodziačyja zorki), Impact (Upłyŭ), Builders (Stvaralniki), Creators (Kreatary), Artists (Mastaki), Innovators (Navatary) i Science & Thinkers (Navuka i myślary). Heta značyć, u adnym śpisie vyrašyli sabrać ludziej ź vielmi roznych śfier — ad pradprymalnictva i technałohij da navuki, miedyja i mastactva.
Jak vybirali 35 čałaviek
Padavacca možna było nie tolki samomu: udzielnikaŭ mahli naminavać inšyja ludzi.
U vyniku ŭ łonh-list Next 35 trapili 288 čałaviek z 28 krain i 79 haradoŭ. Zajaŭki razhladali advajziery Next 35 — ekśpierty ź biznesu, technałohij, navuki, kultury i inšych śfier.
U kožnaj ź siami katehoryj pracavała niekalki takich ekśpiertaŭ. Jany praviarali zajaŭki i dasiahnieńni kandydataŭ i vystaŭlali im bały pa čatyroch kryteryjach. Spačatku z ahulnaha puła sfarmiravali łonh-list, zatym — šort-list, a ź jaho — finalnuju 35-ku.
Pry hetym arhanizatary kažuć, što hladzieli nie tolki na toje, čaho čałaviek užo dasiahnuŭ. Dla Next 35 važnaja i trajektoryja: kudy čałaviek ruchajecca, nakolki maštabnyja zadačy pierad saboj stavić i ci vychodzić jaho praca za miežy adnoj krainy.
I voś chto ŭ vyniku trapiŭ u pieršy Next 35.
Rising Stars (Uzychodziačyja zorki)
Jeva Vołkava — kancertnaja skrypačka
Jeva — biełaruskaja skrypačka, jakaja ŭpieršyniu vystupiła solna ź Biełaruskim dziaržaŭnym simfaničnym arkiestram u 11 hadoŭ. Jana skončyła Hiłdchołskuju škołu muzyki i teatra, a ciapier na poŭnaj stypiendyi atrymlivaje mahistarskuju stupień u Karaleŭskim kaledžy muzyki u Łondanie. Jeva pieramahała na mižnarodnych konkursach u Tokia i na Malcie, atrymała Hran-pry konkursu «Akordy Chorcicy», a siońnia vystupaje na viadomych suśvietnych scenach — ad Karniehi-choła da łondanskaha Barbikan-centra.
Maćviej Jakubovič — student i raspracoŭščyk ŠI-prajektaŭ
Maćviej — student Univiersiteta Fłarydy i raspracoŭščyk prajektaŭ na asnovie štučnaha intelektu. Jon vyras u Łunincy, atrymaŭ poŭnuju stypiendyju na navučańnie ŭ Kaledžy abjadnanaha śvietu ŭ Dyližanie (UWC Dilijan), a zatym pastupiŭ va Univiersitet Fłarydy.
Ciapier junak pracuje ŭ daśledčaj łabaratoryi nad MolCrystalFlow — sistemaj hienieratyŭnaha ŠI, jakaja pradkazvaje strukturu malekularnych kryštalaŭ. Paralelna jon stvaraje ŭłasnyja pradukty: LegalAlien, źviazany sa studenckimi vizami i dedłajnami, i Icarus — nosnuju pryładu, jakaja papiaredžvaje pra ryzyku pierahrevu ludziej, što pracujuć na adkrytym pavietry. Apošni prajekt užo trapiŭ u startap-inkubatar univiersiteta.
Raman Śmicijenka — student i kiraŭnik adukacyjnaha prajekta
Raman jašče ŭ škole pačaŭ udzielničać u kiejs-čempijanatach: zaniaŭ druhoje miesca na nacyjanalnym spabornictvie i pradstaŭlaŭ Biełaruś na mižnarodnym uzroŭni. Paźniej jon pierajechaŭ z Bresta ŭ Vilniu, dzie ciapier vyvučaje ekanomiku i analiz danych va Univiersitecie mieniedžmientu i ekanomiki ISM.
Tam junak staŭ prajektnym dyrektaram IGB — adukacyjnaj płatformy, jakaja daje studentam mahčymaść pracavać z realnymi biznes-zadačami i atrymlivać praktyčny dośvied. Pieršy čempijanat IGB, na jaki raźličvali pryciahnuć 20 čałaviek, sabraŭ 80 udzielnikaŭ z šaści krain. A padčas druhoha studenty ŭžo pracavali z kiejsami biełaruskaj kampanii i jeŭrapiejskaha startapa.
Lilija Bohdan — daśledčyca i zasnavalnica VirtuGlow
Lilija — 20‑hadovaja daśledčyca i zasnavalnica startapa VirtuGlow. Jana zajmałasia daśledavańniami ŭ halinie bijainfarmatyki skury, vyvučała inžyniernyja technałohii ŭ Lovienskim katalickim univiersitecie (Bielhija) i vučyłasia ŭ Nańjanskim technałahičnym univiersitecie ŭ Sinhapury.
Ciapier Lilija śpiecyjalizujecca na bijatechnałohijach u Edynburhskim univiersitecie i paralelna raźvivaje VirtuGlow — technałohiju, jakaja karektuje vyjavu čałavieka padčas videazvankoŭ, kab kampiensavać skažeńni kamiery i aśviatleńnia. Kamanda płanuje vypuścić beta-viersiju praduktu ŭ vieraśni 2026 hoda.
Andrej Kahalonak — akcior i režysior
Andrej — biełaruski akcior i režysior, jaki ŭ 17 hadoŭ pierajechaŭ ź Minska ŭ ZŠA. Jon syhraŭ u šaści poŭnamietražnych filmach, sieryjałach, karotkim mietry i teatralnych pastanoŭkach, u tym liku ŭ filmie «Kaladny list» (The Christmas Letter) razam z Čevi Čejzam i sieryjale Fox Nation pra Džordža Vašynhtona. Ciapier Andrej taksama zajmajecca režysuraj: jaho debiutnuju karotkamietražku «Dla ich» (For Them), dla jakoj jon napisaŭ scenar i dzie syhraŭ hałoŭnuju rolu, pakazvali na kinafiestyvali Northern Lights («Paŭnočnaje źziańnie»).
Impact (Upłyŭ)
Hanna Karniej — strateh u śfiery čystaj enierhietyki
Hanna — ekśpiertka ŭ śfiery enierhietyki i staršaja kansultantka S&P Global u Ńju-Jorku. Jana dapamahaje enierhietyčnym i technałahičnym kampanijam adaptavacca da źmien na rynku, madernizavać elektrasietki i pierachodzić na čystuju enierhiju. Adzin z aktualnych napramkaŭ jaje pracy — padrychtoŭka amierykanskaj enierhasistemy da rostu nahruzki, źviazanaha ŭ tym liku z raźvićciom štučnaha intelektu.
U 18 hadoŭ dziaŭčyna źjechała ź Biełarusi i stała pieršaj biełaruskaj, jakaja atrymała poŭnuju stypiendyju na navučańnie ŭ United World College u Armienii. Paźniej jana vykładała anhlijskuju movu ŭ sielskaj miascovaści Ekvadora, čatyry miesiacy praviała na karabli ŭ kruhaśvietnym padarožžy, vučyłasia ŭ Viermoncie i Paŭnočnaj Karalinie, a dva hady tamu atrymała stupień mahistra pa enierhietyčnych sistemach va Univiersitecie Dziuka. U 2021—2023 hadach Karniej taksama ŭznačalvała radu UWC Belarus. Pry jaje ŭdziele bolš za 20 biełaruskich studentaŭ prajšli adbor, a na ich navučańnie ŭdałosia pryciahnuć bolš za 1 miljon dalaraŭ.
Jeva Piatrušyna — hiejmdyzajnierka Minecraft
Jeva — hiejmdyzajnierka ŭ šviedskaj studyi Mojang, dzie pracuje nad Minecraft, adnoj z samych paśpiachovych videahulniaŭ u historyi. Jana vyvučała matematyku i infarmatyku, a ŭ 2019 hodzie prajšła kurs pa hiejmdyzajnie, paśla jakoha atrymała stažyroŭku, a zatym i pieršuju pastajannuju pracu ŭ industryi.
Akramia pracy nad Minecraft, Jeva raźvivaje GameDev Bookshelf — prafiesijnuju supolnaść, dzie ładzić sustrečy z aŭtarami knih pra hulniavuju industryju. Jana taksama źjaŭlajecca ambasadarkaj Women in Games, uvachodzić u Creator Circle hetaj arhanizacyi i dapamahaje maładym hiejmdyzajnieram jak mientarka. Płatforma Favikon uklučyła Jevu ŭ suśvietny top-50 aŭtaraŭ kantentu pra videahulni ŭ LinkedIn.
Ahata Łaska — zasnavalnica AGLA Education.USA
Ahata dapamahaje studentam ź Biełarusi i inšych krain rehijona pastupać va ŭniviersitety ZŠA. Jana sama atrymała poŭnaje finansavańnie na navučańnie ŭ Kaledžy Chobarta i Uiljama Śmita ŭ štacie Ńju-Jork, a paźniej pieratvaryła ŭłasny dośvied pastupleńnia ŭ adukacyjny prajekt AGLA Education.USA. Jaho kamanda supravadžaje abituryjentaŭ na ŭsich etapach — ad padrychtoŭki zajavak, ese i intervju da atrymańnia vizy i pošuku finansavańnia.
Iryna Paniadzielnik — kaardynatarka klimatyčnaj sietki CAN EECCA
Iryna — śpiecyjalistka pa klimatyčnych kamunikacyjach i prajektnaja mieniedžarka z Marjinaj Horki, jakaja ciapier žyvie ŭ Bierlinie. Jana kaardynuje CAN EECCA — najbujniejšuju sietku klimatyčnych NDA va Uschodniaj Jeŭropie, na Kaŭkazie i ŭ Centralnaj Azii, a taksama kiruje prajektam pa klimatyčnaj žurnalistycy dla hetaha rehijona.
Maryna Rybakova — pradprymalnica ŭ śfiery mastactva
Maryna — pradprymalnica ź Viciebska i suzasnavalnica ReA! Art Fair u Miłanie — kirmašu, dzie maładyja mastaki mohuć pradavać svaje pracy biez pasiarednictva halerej. Jana taksama suzasnavała art-markietpłejs Artsted, jaki pryciahnuŭ 500 tysiač dalaraŭ inviestycyj. U 2025 hodzie Forbes uklučyŭ Marynu ŭ jeŭrapiejski śpis 30 Under 30. Ciapier jana žyvie ŭ San-Francyska i raźvivaje prajekty na styku technałohij i mastactva.
Innovators (Navatary)
Hanna Płatnickaja — piedyjatarka i suzasnavalnica miedycynskaj ŠI-płatformy Doctorina
Hanna skončyła Biełaruski dziaržaŭny miedycynski ŭniviersitet pa śpiecyjalnaści «piedyjatryja», a paśla piać hadoŭ pracavała ŭ Hvatemale. Tam jana kiravała miascovym adździaleńniem Health & Help, jakoje akazvała miedycynskuju dapamohu supolnaści z bolš jak 25 tysiač čałaviek. Za hetuju pracu ŭ 2023 hodzie dziaŭčyna atrymała premiju Dyjany (Diana Award). Ciapier jana — suzasnavalnica i miedycynskaja dyrektarka Doctorina, AI-płatformy dla ludziej z chraničnymi zachvorvańniami, jakoj karystajucca bolš čym u 60 krainach.
Aleks Suvoraŭ — suzasnavalnik błokčejn-płatformy RedStone
Aleks vyvučaŭ infarmatyku ŭ Varšaŭskim univiersitecie, a ŭ 2021 hodzie staŭ suzasnavalnikam RedStone — decentralizavanaj sietki arakułaŭ, jakaja pieradaje aktualnyja źniešnija danyja błokčejn-prahramam. Siońnia RedStone zabiaśpiečvaje bolš za 1100 patokaŭ danych u bolš čym 30 błokčejn-sietkach, siarod jakich Ethereum, Polygon, Avalanche i Arbitrum; jaje technałohii vykarystoŭvaje ŭ tym liku fond BlackRock. Akramia technałahičnaha biznesu, Alaksiej staŭ suzasnavalnikam varšaŭskaha Stand Up Local Comedy Club, dzie sam vystupaje jak komik i viadoŭca.
Bahram Ismaiłaŭ i Pavieł Rudkoŭski — suzasnavalniki Yope
Bahram i Pavieł paznajomilisia padčas vučoby ŭ Biełaruskim dziaržaŭnym univiersitecie, a ŭ 2021 hodzie zapuścili Yope — zakrytuju sacyjalnuju sietku dla blizkaha koła biez rekłamy, ałharytmaŭ i publičnaj stužki. Siońnia servis maje bolš za 15 miljonaŭ zarehistravanych karystalnikaŭ i pryciahnuŭ 20 miljonaŭ dalaraŭ inviestycyj. Bahram kiruje kampanijaj jak hienieralny dyrektar, a Pavieł adkazvaje za techničnaje raźvićcio jak techničny dyrektar, a ich kamanda pracuje ŭ Łondanie, Lisabonie i San-Francyska.
Maks i Vieranika Pryłuckija — suzasnavalniki Lingo.dev
Maks i Vieranika pačynali ŭ Minsku: jon vyvučaŭ kampjutarnyja sistemy i sietki ŭ BDUIR, jana — prykładnuju matematyku i infarmatyku ŭ BDU. Paśla adjezdu ź Biełarusi jany stvaryli svoj pieršy startap Notionlytics.
Pradaŭšy kampaniju, Maks i Vieranika raspracavali pratatyp Lingo.dev — płatformy, jakaja z dapamohaj vialikich moŭnych madelaŭ (LLM) dapamahaje kampanijam pierakładać i adaptavać svaje ličbavyja pradukty dla roznych krain i moŭ. U kancy 2024 hoda prajekt trapiŭ u aksieleratar Y Combinator, paśla čaho kamanda pierajechała ŭ San-Francyska. Lingo.dev užo pryciahnuŭ $4,2 miljona inviestycyj.
Siarhiej Budkoŭski — zasnavalnik alternatyŭnaj kramy mabilnych hulniaŭ Skich
Siarhiej žyvie ŭ Varšavie i raźvivaje Skich — adnu ź pieršych alternatyŭnych kram mabilnych hulniaŭ dla iOS i Android. Jaje časam nazyvajuć «Steam dla mabilnych hulniaŭ»: płatforma raźmiarkoŭvaje hulni pa bolš čym 280 žanrach, prapanuje piersanalnyja rekamiendacyi i sacyjalnyja funkcyi. Prajekt atrymaŭ padtrymku kampanii Xsolla, a jaho asnoŭnymi rynkami stali ZŠA i Brazilija.
Builders (Stvaralniki)
Illa Lasun — suzasnavalnik ŠI-startapa GRAI
Illa vučyŭsia ŭ BDUIR, a ŭ 2019 hodzie razam z kamandaj zapuściŭ Vochi — dadatak dla apracoŭki videa, jaki praz dva hady nabyła kampanija Pinterest. Paśla hetaha jon uznačalvaŭ kirunak štučnaha intelektu ŭ polskim ofisie Pinterest, a ciapier raźvivaje svoj čaćviorty startap — GRAI. Kampanija stvaraje instrumienty na asnovie ŠI, z dapamohaj jakich karystalniki mohuć rabić remiksy sa zhody muzykantaŭ.
Niadaŭna GRAI pryciahnuŭ $9 miljonaŭ inviestycyj. Akramia hetaha, Illa — suzasnavalnik varšaŭskaha servisu pa čystcy i ramoncie abutku i adzieńnia Remaster, a taksama zajmajecca inviestycyjami.
Mikita Maničaŭ — dyrektar pa raspracoŭcy ŭ Deel
Mikita paśla mahistratury ŭ BDU pracavaŭ u EPAM, zasnavaŭ dva startapy i dvojčy sprabavaŭ trapić u Y Combinator, a paźniej dałučyŭsia da Deel — mižnarodnaj HR-płatformy, jakuju aceńvajuć na $17 miljardaŭ. U kampanii jon z nula stvaryŭ servis, jaki dapamahaje ź imihracyjaj supracoŭnikaŭ i ciapier pracuje bolš čym u 70 krainach. Hety napramak vyras da $50 miljonaŭ hadavoj vyručki. Ciapier Mikita pracuje nad zapuskam novaha praduktu Deel Retirement, źviazanaha ź piensijnymi prahramami dla supracoŭnikaŭ.
Ivan Šyła i Illa Šyła — suzasnavalniki servisu CleanWhale
Ivan i Illa — braty z Salihorska, jakija ŭ 2016 hodzie zapuścili CleanWhale — anłajn-servis, što złučaje klijentaŭ sa śpiecyjalistami pa ŭborcy. Ivan adkazvaŭ za raźvićcio biznesu, a Illa — za stvareńnie płatformy. Za dziesiać hadoŭ prajekt bieź vienčurnych inviestycyj vyjšaŭ na rynki piaci jeŭrapiejskich krain i šmatmiljonnuju vyručku. Siońnia z CleanWhale supracoŭničajuć bolš za 700 vykanaŭcaŭ, a nastupnym rynkam dla kampanii pavinny stać ZŠA.
Alesia Ščerbina — zasnavalnica mižnarodnaha digital-ahienctva Fands
Alesia kiruje mižnarodnym ahienctvam Fands, jakoje zajmajecca raźvićciom i prasoŭvańniem brendaŭ. Za niekalki hadoŭ jana sabrała kamandu z bolš jak 20 śpiecyjalistaŭ, jakaja realizavała zvyš 100 prajektaŭ — ad raspracoŭki stratehii i dyzajnu da rekłamy i pracy ź influjensierami. Ciapier na bazie ahienctva Alesia stvaraje ŭłasny pradukt Jenzi — dadatak dla vyvučeńnia moŭ, pabudavany vakoł farmiravańnia zvyčki rehularna zajmacca. Jaho raspracoŭku jana finansuje z dachodaŭ Fands, a jašče da aficyjnaha zapusku prajekt sabraŭ pieršuju aŭdytoryju i płatnych karystalnikaŭ.
Met Hramovič — suzasnavalnik CPTN Limited i Capitaliply
Met — pradprymalnik ź Minska, jaki ciapier žyvie ŭ Varšavie. Raniej jon zasnavaŭ piać kampanij, u tym liku dadatak dla znajomstvaŭ Zodier, jaki sabraŭ bolš za 4 miljony karystalnikaŭ. Ciapier Met kiruje praduktovaj kampanijaj CPTN Limited i źjaŭlajecca hienieralnym partnioram amierykanskaha fondu Capitaliply, jaki nabyvaje i raźvivaje B2B-servisy dla ekasistemy Shopify. Razam jany sfarmiravali chołdynh z šaści nabytych kampanij i dvuch ułasnych praduktaŭ, jaki absłuhoŭvaje bolš za 10 tysiač biznesaŭ pa ŭsim śviecie. Siarod ich klijentaŭ — Avon, Sony i Centralny bank Malty.
Creators (Kreatary)
Toni Łašden — piśmieńnica i daśledčyca
Toni — piśmieńnica i dekałanijalnaja daśledčyca ź Minska, jakaja ciapier žyvie ŭ Stakholmie i pracuje z temami biełaruskaj pamiaci, identyčnaści i dośviedu Biełarusi ŭ SSSR. Za apošnija dva hady vyjšli dva zborniki jaje karotkaj prozy — «Čorny les» i «Na rahu Niezaležnaści», pieršy ź jakich pierakładajuć na francuzskuju i niamieckuju movy.
Toni taksama sukiruje fieminisckim archivam i piśmieńnickaj łabaratoryjaj Rastsiazhenne, praz prahramy jakoj prajšli 55 biełaruskich aŭtaraŭ z roznych krain. Ciapier jana pracuje nad debiutnym ramanam pa-biełarusku i knihaj na anhlijskaj movie pra mihracyju i sacyjalny kłas.
Emil Ziańko — mastak i muzykant
Emil vyvučaŭ žyvapis u Hrodnie, paśla žyŭ u Bierlinie, Stakholmie i Polščy, a ciapier — u Paryžy. Jon pracuje adrazu ŭ niekalkich kirunkach — stvaraje muzyku, videa i hrafiku, a siarod brendaŭ, ź jakimi supracoŭničaŭ, — Prada, Hugo Boss, Lacoste i Walter Van Beirendonck. Jaho treki nabrali sotni tysiač prasłuchoŭvańniaŭ na Spotify.
Uład Halon — videohraf i aŭtar miedyjaprajekta Barcelona Local
Uład — videohraf i stvaralnik kantentu z Naračy, jaki ciapier žyvie ŭ Barsiełonie. U Biełarusi jon vioŭ błoh i pracavaŭ u 21vek.by, dzie zdymaŭ aŭtarskuju sieryju pra biełaruskija vioski i ich žycharoŭ. Paśla pierajezdu ŭ Barsiełonu Uład zasiarodziŭsia na haradskoj kultury: stvaraje videa i muzyčnyja roliki dla artystaŭ, u tym liku Łuny i ooes, jakija nabirajuć miljony prahladaŭ u Instagram. Tam ža jon zapuściŭ Barcelona Local — ułasny miedyjaprajekt pra horad.
Darja Zahorskaja — režysiorka muzyčnych klipaŭ
Darja — režysiorka z Navapołacka, jakaja pracuje pad psieŭdanimam Madsangria i ciapier žyvie ŭ Varšavie. Jana pačynała z fatahrafii i pracy ŭ miedyja, a paśla pierajezdu ŭ Polšču supracoŭničała z Sony Music Poland i pastupova całkam pierajšła ŭ režysuru. Za niekalki hadoŭ Darja źniała kala 30 muzyčnych klipaŭ dla biełaruskich, rasijskich i polskich artystaŭ, siarod jakich Naviband, Manietačka i Anastasija Rydleŭskaja. Jaje pracy nabirajuć miljony prahladaŭ, a sama Darja była naminavanaja na Fryderyk — adnu z hałoŭnych muzyčnych premij Polščy.
Idrak Mirzalizade — stendap-komik
Idrak naradziŭsia ŭ Azierbajdžanie ŭ tałyšskaj siamji, a ŭ 12 hadoŭ pierajechaŭ u Minsk i paźniej atrymaŭ biełaruskaje hramadzianstva. Svaju karjeru jon pačynaŭ u biełaruskim KVZ, a šyrokuju viadomaść atrymaŭ dziakujučy teleprajektam «Adkryty mikrafon» i Stand Up na TNT.
Ciapier Idrak žyvie ŭ Varšavie, vystupaje sa stendapam, raźvivaje YouTube-kanał i razam ź inšymi komikami pracuje nad Stand Up Lokal. Jon zastajecca adnym z najbolš viadomych pradstaŭnikoŭ biełaruskaha i ruskamoŭnaha stendapu.
Kiejt Kiško — videohrafka i stvaralnica kantentu
Kiejt — videohrafka z Homiela, jakaja pracuje pad psieŭdanimam Kaytie i ciapier žyvie ŭ Paryžy. Jana pačynała z SMM-prajektaŭ dla restaranaŭ i hatelaŭ u Minsku, a paśla pierajezdu ŭ Francyju stała raźvivać ułasny Instagram, dzie sabrała bolš za 100 tysiač padpisčykaŭ, a jaje videa nabirajuć miljony prahladaŭ. Dziaŭčyna stvaraje karotkija siužetnyja roliki pra kachańnie, čas i pošuk siabie, spałučajučy pryjomy kino z farmatam viertykalnych videa dla sacsietak.
Artists (Mastaki)
Vital Aleksiajonak — dyryžor
Vital naradziŭsia ŭ Vilejcy, vučyŭsia ihry na trambonie ŭ Minsku, a paźniej — dyryžyravańniu ŭ Sankt-Pieciarburhu i Viejmary. U 2021 hodzie jon pieramoh na mižnarodnym konkursie dyryžoraŭ imia Artura Taskanini ŭ Parmie, a z 2024 hoda źjaŭlajecca hałoŭnym dyryžoram Niamieckaj opiery na Rejnie ŭ Dziusieldorfie i Dujsburhu.
Vital taksama vystupaŭ u Ła Skała i na Zalcburhskim fiestyvali, dyryžyravaŭ suśvietnaj premjeraj opiery Volhi Padhajskaj «Dzikaje palavańnie karala Stacha» ŭ łondanskim Barbikanie. Z 2021 hoda jon taksama kiruje Charkaŭskim muzyčnym fiestyvalem, jaki va ŭmovach vajny ładzić kancerty ŭ bambaschoviščach i mietro.
Saša Vialička — fotamastačka
Saša naradziłasia ŭ Słonimie i atrymała stupień mahistra pa kvantavaj radyjofizicy, ale z 2023 hoda całkam pryśviaciła siabie mastactvu. Ciapier jana žyvie ŭ Varšavie i pracuje z fatahrafijaj, archivami, instalacyjami i novymi miedyja, daśledujučy prapahandu, postpraŭdu, manipulacyi i traŭmu.
Jaje prajekt «Stan admaŭleńnia» (State of Denial) uvajšoŭ u prahramu Talent 2026 amsterdamskaha muzieja fatahrafii Foam, kudy adabrali 15 aŭtaraŭ z usiaho śvietu. Raboty Sašy pakazvali ŭ 11 krainach Jeŭropy i Azii, a jaje prajekt «Vyklikali na dyvan» (Called to the Carpet) atrymaŭ hrant polskaha fiestyvalu Fotofestiwal u Łodzi.
Arciom Šałak — mastak i dyzajnier adzieńnia
Arciom naradziŭsia ŭ Žodzinie i pačynaŭ z hrafici, paśla vyvučaŭ žurnalistyku ŭ BDU i pisaŭ pra muzyku, a z časam całkam pierajšoŭ u mastactva i modu. Jon pracuje pad psieŭdanimam Acid Topser i raźvivaje ŭłasny brend adzieńnia Random Rebels. Junak supracoŭničaŭ z Vivienne Westwood, Billionaire Boys Club, Nike, Puma i Adidas, a padčas Tydnia mody ŭ Paryžy ŭ 2024 hodzie afarmlaŭ vitryny paviljona Vivienne Westwood, pakinuŭšy siarod nadpisaŭ nazvu rodnaha horada — Zhodzina. U svaich pracach jon ekśpierymientuje ź niestandartnym krojem i formami, vykarystoŭvajučy ŭ tym liku vobrazy i dośvied dziacinstva ŭ Biełarusi.
Anastasija Vasiučenka — dyzajnierka i zasnavalnica KANVA
Anastasija vučyłasia na mastačku pa kaściumach u Biełaruskaj dziaržaŭnaj akademii mastactvaŭ, a ŭ 2018 hodzie zasnavała ŭ Minsku brend KANVA. U svaich pracach jana pieraasensoŭvaje biełaruskuju tradycyjnuju kulturu: naprykład, sałamianaha «pavuka» — abiareh, jaki padviešvali ŭ chatach, — pieratvaryła ŭ sučasnyja ŭpryhažeńni.
Z 2022‑ha dziaŭčyna raźvivaje brend u Varšavie, a jaje pracy pakazvali na Miłanskim tydni dyzajnu. Niadaŭna jana taksama viarnułasia da stvareńnia adzieńnia ŭ miežach prahramy Refashioned, a kalekcyja była apublikavanaja ŭ drukavanym vydańni Vogue Polska.
Mikita Iljinčyk — dramaturh i režysior
Mikita naradziŭsia ŭ Navahrudku, vučyŭsia na režysiora ŭ Rasijskim instytucie teatralnaha mastactva (HITIS) u Maskvie, a ŭ Biełarusi pracavaŭ ź niezaležnym teatram, u tym liku ź minskaj kulturnaj placoŭkaj OK16. Ciapier jon žyvie ŭ Poznani, a adnymi z hałoŭnych tem jaho śpiektaklaŭ stali mihracyja, miežy i žyćcio pamiž roznymi krainami i identyčnaściami. Jaho pjesa «Vitaj, Abdo» (Witaj, Abdo) pryśviečana humanitarnamu kryzisu na biełaruska-polskaj miažy. U 2026 hodzie Mikitu naminavali na Paszporty Polityki — prestyžnuju polskuju kulturnuju premiju — u katehoryi sceničnych mastactvaŭ.
Science & Thinkers (Navuka i myślary)
Dźmitryj Bahdanaŭ — navukoviec, jaki stajaŭ la vytokaŭ sučasnaha ŠI
Dźmitryj — daśledčyk u halinie štučnaha intelektu rodam z Homiela. Padčas pracy nad doktarskaj dysiertacyjaj pad kiraŭnictvam adnaho ź pijanieraŭ ŠI Jošua Biendžya jon u 2014 hodzie staŭ adnym z aŭtaraŭ miechanizmu ŭvahi (attention mechanism) — padychodu, jaki dazvalaje niejrasietkam zasiarodžvacca na najbolš važnych častkach infarmacyi i staŭ adnoj z asnoŭ dla raźvićcia sučasnych moŭnych madelaŭ.
Jaho navukovuju pracu na hetuju temu pracytavali bolš za 50 tysiač razoŭ. Ciapier Dźmitryj pracuje ŭ daśledčym instytucie Mila ŭ Manreali i vykładaje va Univiersitecie Makhiła, a taksama staŭ adnym z zasnavalnikaŭ Periodic Labs — kampanii, jakaja raspracoŭvaje aŭtanomnych ŠI-navukoŭcaŭ dla daśledavańniaŭ u fizicy i materyjałaznaŭstvie.
Uład Ciareščanka — chirurh i daśledčyk niejratechnałohij
Uład pracuje na styku chirurhii i niejrainžynieryi. Ciapier jon prachodzić padrychtoŭku pa płastyčnaj i rekanstruktyŭnaj chirurhii ŭ Vienskim miedycynskim univiersitecie, a raniej zajmaŭsia daśledavańniami ŭ Harvardskaj miedycynskaj škole i Masačusieckaj balnicy ahulnaha profilu. Jaho navukovaja praca pryśviečana niejrainterfiejsam, jakija dapamahajuć viartać ruch i adčuvalnaść ludziam z pratezami. U pryvatnaści, Uład udzielničaŭ u raspracoŭcy technałohii, jakaja dazvalaje bijaničnym kaniečnaściam pieradavać adčuvańnie dotyku. Za daśledavańni bolu, źviazanaha ź nieŭromami, Uład pieršym atrymaŭ premiju Young Investigator Award ad Global Nerve Foundation.
Darja Minina — ekanamistka Mižnarodnaha valutnaha fondu
Darja pačynała karjeru ŭ Ministerstvie ekanomiki Biełarusi, a paśla pierajechała ŭ Amsterdam, dzie vyvučała ekanomiku ŭ Amsterdamskim univiersitecie i Instytucie Cinbierhiena, a zatym atrymała doktarskuju stupień. U svaich daśledavańniach jana vyvučaje, jak ludzi i biznes farmirujuć čakańni adnosna inflacyi i jak na ich mohuć upłyvać centralnyja banki. Pracy Darji publikavalisia ŭ viadučych ekanamičnych časopisach, a jaje daśledavańni vykarystoŭvali centralnyja banki Hiermanii i Niderłandaŭ. Ciapier jana pracuje ekanamistkaj u Mižnarodnym valutnym fondzie (MVF) u Vašynhtonie.
Ryta Kurban — daśledčyca ŭ halinie miedycynskaha ŠI
Ryta pracuje inžynierkaj-daśledčycaj u Instytucie technałohij Elisana ŭ Oksfardzie, dzie raspracoŭvaje madeli mašynnaha navučańnia na asnovie miedycynskich danych miljonaŭ pacyjentaŭ. Jana atrymała mahistarskuju stupień pa vykarystańni štučnaha intelektu ŭ achovie zdaroŭja va Univiersiteckim kaledžy Łondana (UCL). Ciapier dziaŭčyna pracuje nad technałohijami, jakija dapamahajuć analizavać vialikija abjomy kliničnych danych i znachodzić u ich zakanamiernaści, karysnyja dla miedycyny.
Ciapier čytajuć
«Na takuju ch**niu paviałasia». Rasijanka pryjechała ź Sibiry ŭ Biełaruś i ciapier z maciukami raskazvaje, jak tut składana žyć21
Kamientary
-> Heta raśpił hrantaŭ na čarhovuju bzduru, na handlaroŭ pavietram kštałtu Zareckaj. Chacia kolki vypadkovych imionaŭ cikavych ludziej sapraŭdy jość.