Minsk ličyć vielmi kontrpraduktyŭnym vybar pamiž Rasijaj i Jeŭrasajuzam i nie budzie jaho rabić, pra heta zajaviŭ namieśnik ministra zamiežnych spraŭ Aleh Kraŭčanka, vystupajučy na 10-j kanfierencyi «Minski dyjałoh», pryśviečanaj budučyni Uschodniaha partniorstva, piša Tut.by.
— Naša sajuźnictva z Rasijaj nie aznačaje, što my nie chočam palapšać adnosiny ź ES i ZŠA. I ŭ hetaha jość šmat prahmatyčnych pryčyn, ale nie ŭ škodu ciesnym stratehičnym adnosinam z Rasijaj. Prahres na hetym šlachu nie aznačaje, što my sprabujem niejak zdradzić Rasii, pierajści ŭ inšy błok. Heta błokavaje myśleńnie pavinna syści ŭ minułaje.
Lubyja dumki, jakija hetamu supiarečać, namieśnik ministra nazvaŭ «prosta niapravilnymi».
«My admaŭlajemsia rabić vybar», — dadaŭ Kraŭčanka, skazaŭšy, što Rasija zaŭsiody budzie asablivym partnioram Biełarusi.
Dypłamat ličyć, što Jeŭrasajuzu i JEAES treba pačynać pramy dyjałoh pamiž saboj, kab u vyniku pryjści da «ahulnaj ekanamičnaj prastory ad Lisabona da Uładzivastoka», što źnizić kanfliktny patencyjał u rehijonie.
Kraŭčanka prapanavaŭ pačać z techničnych pieramoŭ pamiž Jeŭrakamisijaj i Jeŭrazijskaj ekanamičnaj kamisijaj ab harmanizacyi standartaŭ, handli, mytni i isnujučych techničnych barjerach.
Pavodle słoŭ namieśnika ministra, MZS čakaje ad samita Uschodniaha partniorstva ŭ listapadzie ŭ Bruseli bolšaj kolkaści prajektaŭ, u tym liku pa pašyreńni dostupu na jeŭrapiejski rynak, raźvićci infrastruktury, abmienie mytnaj infarmacyjaj.
Paśla vystupu, razmaŭlajučy z žurnalistami, Kraŭčanka dadaŭ, što Minsk spadziajecca na źjaŭleńnie va Uschodnim partniorstvie ES ekanamičnaha vymiareńnia.
— Na žal, zaraz bačnych, adčuvalnych vynikaŭ hetaha farmatu supracoŭnictva niedastatkova. Ja nie krytykuju jaho zaraz, heta naša ahulnaja zadača… My chočam dasiahnuć choć niejkich ścipłych, ale bačnych vynikaŭ u ramkach hetaha farmatu.
Biełaruś taksama spadziajecca, što na samicie ŭ listapadzie Biełaruś i ES pačnuć pieramovy pa zaklučeńni bazavaha pahadnieńnia. Kamientujučy hetaje pytańnie paśla svajho vystupu, Kraŭčanka dadaŭ, što pakul niama hatoŭnaści z boku ES abmiarkoŭvać hetaje pytańnie.
— Kali my zmožam u ahladnaj pierśpiektyvie padyści da zaklučeńnia hetaha pahadnieńnia, heta budzie adnym z najvažniejšych dasiahnieńniaŭ. Heta naša stratehičnaja meta ŭ adnosinach ź ES.
Namieśnik ministra taksama adznačyŭ, što ŭ Minsku nie čakajuć, što pahadnieńnie ab spraščeńni vizavaha režymu ź ES budzie parafiravana na listapadaŭskim samicie Uschodniaha partniorstva ŭ Bruseli. Pieramovy, pa jaho słovach, znachodziacca «na etapie pieramovaŭ».
- Ja nie sychodžu ad adkazu, ale heta techničny praces, u jakim čakać niejkich siensacyjnych praryvaŭ ja b nie staŭ. Nie čakajcie prablem palityčnaha charaktaru, čas sychodzić na ŭzhadnieńnie detalaŭ.
Biełaruś pakul nie vyznačałasia, chto ŭznačalić jaje delehacyju na samicie, bo jašče nie pastupili zaprašeńni ad ES, dadaŭ Kraŭčanka.
