Мінск лічыць вельмі контрпрадуктыўным выбар паміж Расіяй і Еўрасаюзам і не будзе яго рабіць, пра гэта заявіў намеснік міністра замежных спраў Алег Краўчанка, выступаючы на 10-й канферэнцыі «Мінскі дыялог», прысвечанай будучыні Усходняга партнёрства, піша Tut.by.
— Наша саюзніцтва з Расіяй не азначае, што мы не хочам паляпшаць адносіны з ЕС і ЗША. І ў гэтага ёсць шмат прагматычных прычын, але не ў шкоду цесным стратэгічным адносінам з Расіяй. Прагрэс на гэтым шляху не азначае, што мы спрабуем неяк здрадзіць Расіі, перайсці ў іншы блок. Гэта блокавае мысленне павінна сысці ў мінулае.
Любыя думкі, якія гэтаму супярэчаць, намеснік міністра назваў «проста няправільнымі».
«Мы адмаўляемся рабіць выбар», — дадаў Краўчанка, сказаўшы, што Расія заўсёды будзе асаблівым партнёрам Беларусі.
Дыпламат лічыць, што Еўрасаюзу і ЕАЭС трэба пачынаць прамы дыялог паміж сабой, каб у выніку прыйсці да «агульнай эканамічнай прасторы ад Лісабона да Уладзівастока», што знізіць канфліктны патэнцыял у рэгіёне.
Краўчанка прапанаваў пачаць з тэхнічных перамоў паміж Еўракамісіяй і Еўразійскай эканамічнай камісіяй аб гарманізацыі стандартаў, гандлі, мытні і існуючых тэхнічных бар'ерах.
Паводле слоў намесніка міністра, МЗС чакае ад саміта Усходняга партнёрства ў лістападзе ў Брусэлі большай колькасці праектаў, у тым ліку па пашырэнні доступу на еўрапейскі рынак, развіцці інфраструктуры, абмене мытнай інфармацыяй.
Пасля выступу, размаўляючы з журналістамі, Краўчанка дадаў, што Мінск спадзяецца на з'яўленне ва Усходнім партнёрстве ЕС эканамічнага вымярэння.
— На жаль, зараз бачных, адчувальных вынікаў гэтага фармату супрацоўніцтва недастаткова. Я не крытыкую яго зараз, гэта наша агульная задача… Мы хочам дасягнуць хоць нейкіх сціплых, але бачных вынікаў у рамках гэтага фармату.
Беларусь таксама спадзяецца, што на саміце ў лістападзе Беларусь і ЕС пачнуць перамовы па заключэнні базавага пагаднення. Каментуючы гэтае пытанне пасля свайго выступу, Краўчанка дадаў, што пакуль няма гатоўнасці з боку ЕС абмяркоўваць гэтае пытанне.
— Калі мы зможам у агляднай перспектыве падысці да заключэння гэтага пагаднення, гэта будзе адным з найважнейшых дасягненняў. Гэта наша стратэгічная мэта ў адносінах з ЕС.
Намеснік міністра таксама адзначыў, што ў Мінску не чакаюць, што пагадненне аб спрашчэнні візавага рэжыму з ЕС будзе парафіравана на лістападаўскім саміце Усходняга партнёрства ў Брусэлі. Перамовы, па яго словах, знаходзяцца «на этапе перамоваў».
- Я не сыходжу ад адказу, але гэта тэхнічны працэс, у якім чакаць нейкіх сенсацыйных прарываў я б не стаў. Не чакайце праблем палітычнага характару, час сыходзіць на ўзгадненне дэталяў.
Беларусь пакуль не вызначалася, хто ўзначаліць яе дэлегацыю на саміце, бо яшчэ не паступілі запрашэнні ад ЕС, дадаў Краўчанка.
Топавы перакладчык паехаў у Беларусь мяняць пашпарт — і сеў за данаты. «КДБ паглядзеў на суму і вырашыў, што ніхто ў здаровым розуме не можа выдаткаваць столькі ўласных грошай»1313
Каментары