Na ANT zakryli tok-šou Vadzima Hihina «Sprava pryncypu»

Ad novaha televizijnaha siezona na kanale ANT pierastaje vychodzić štotydniovaje šou Vadzima Hihina «Sprava pryncypu». Pieradača ciaham apošnich hadoŭ vychodziła ŭ efir pa paniadziełkach a 21 hadzinie paśla viečarovaha vypusku «Našych navin».

Pavialičyć

«Sprava pryncypu» pryciahvała da siabie ŭvahu tym, što Vadzim Hihin zaprašaŭ na prahramu ludziej roznych palityčnych pohladaŭ. Niaredka haściami tam byli apazicyjnyja palityki, niezaležnyja palitołahi i ekanamisty, žurnalisty niedziaržaŭnych ŚMI. Adnak abaviazkova ŭ pieradačach udzielničali prarasijskija aktyvisty, jak kazacki «ataman» Piatro Šapko, publicysty Alaksiej Dzierman, Piatro Piatroŭski, zachodnierusisty Zielankoŭski i Biendzin. Heta vyklikała abureńnie šmat u kaho.

Pavodle nieaficyjnaj infarmacyi, Vadzimu Hihinu kiraŭnictvam ANT było prapanavana nie artykulavać nastolki vyrazna prarasijskuju pazicyju padčas pieradač. U vypadku ž niazhody, znajści bolš adpaviednuju jahonym pohladam placoŭku. Jość imaviernaść, što tok-šou ź viadučym Vadzimam Hihinym chutka źjavicca na telekanale «Mir».

«Usie pytańni adnosna ANT nakiroŭvajcie ŭ pres-słužbu ANT», — adkazaŭ «NN» Vadzim Hihin. Bolej razmaŭlać jon nie zachacieŭ.

Pres-sakratar ANT da paniadziełka znachodzicca ŭ adpačynku, a bolš na telekanale nichto nie daje kamientaroŭ.

Vadzim Hihin adnačasova źjaŭlajecca dekanam fiłasofskaha fakulteta BDU. Raniej jon byŭ redaktaram časopisa «Biełaruskaja dumka».

Ciapier na ANT pa paniadziełkach budzie vychodzić novaje šou — «Naša žyćcio». Jaho viadučym stanie Dźmitryj Bačkoŭ, jaki da niadaŭniaha času vioŭ anałahičnaje šou na telekanale «Biełaruś-1» «Forum». Nie tak daŭno Bačkoŭ abvieściŭ ab svaim rašeńni syści z BT. Zamienu na «Biełaruś-1» Bačkovu pakul nie znajšli.

Pieršy zapis novaj pieradačy prajšoŭ 8 vieraśnia. Vypusk budzie pryśviečany temie teraryzmu. Ź niedziaržaŭnaha siektara prysutničaŭ tolki lidar kampanii «Havary praŭdu» Andrej Dźmitryjeŭ.

«Bačkoŭ mienš žorstki viadoŭca za Hihina, bolš dalikatny. Ale było b fajna, kab na ANT było dva tok-šou, a nie adno. Jany vielmi roznyja ludzi, ale ŭ kožnaha jość svaje pieravahi», — kaža Dźmitryjeŭ.

Adroźnieńni ad «Spravy pryncypu» ŭ tym, što pieradača Hihina zapisvałasia kala 1 hadziny 5 chvilin, tamu ź jaje amal ničoha nie vyrazałasia, tolki techničnyja ahrechi. Što tyčycca «Našaha žyćcia», to jaje zapis išoŭ kala 2,5 hadzin, u efir ža pojduć standartnyja 45—50 chvilin.

Andrej Dźmitryjeŭ adznačaje, što dla «Našaha žyćcia» zrabili dosyć jakasnuju novuju studyju. «Pastavili ŭtulnyja kresły, bo ŭ «Spravie pryncypu» ty adrazu ŭ ich tapiŭsia, było niazručna siadzieć».

• 0
• 0
• 0
• 0
• 0
• 0