U Minpracy raspaviali, jak najmalnikam adpuskać rabotnikaŭ na niekalki hadzin «pa asabistych pytańniach»

U Minpracy rastłumačyli, jak najmalnikam vyzvalać śpiecyjalistaŭ na praciahu źmieny ad pracy na niekalki hadzin dla vyrašeńnia asabistych pytańniaŭ. Da prykładu, na naviedvańnie palikliniki, pachody ŭ dziaržustanovy abo vizity da dziaciej u škoły. U viedamstvie ŭdakładnili, jak pravilna aformić takoje vyzvaleńnie, paviedamlaje Tut.by.

U Minpracy ŭdakładniajuć, što Pracoŭnym kodeksam praduhledžany abaviazak najmalnika vieści ŭlik jaŭki śpiecyjalistaŭ na pracu i sychodu ź jaje.

— Ulik javak na pracu i sychodu ź jaje viadziecca ŭ tabieli vykarystańnia pracoŭnaha času, hadavych tabielnych kartkach i inšych dakumientach z ukazańniem proźvišča, inicyjałaŭ rabotnika, kalandarnych dzion ulikovaha pieryjadu, kolkaści adpracavanaha času, u tym liku ŭ zvyšvyznačany čas, u dziaržaŭnyja śviaty, śviatočnyja i vychadnyja dni, i inšych nieabchodnych źviestak. Formy dakumientaŭ dla ŭliku javak na pracu i sychod ź jaje, a taksama paradak ich zapaŭnieńnia zaćviardžajucca najmalnikam, — tłumačać u viedamstvie.

Najmalnik uličvaje faktyčny pracoŭny čas, jaki składajecca z adpracavanaha i nieadpracavanaha času.

— Pracoŭnym ličycca čas, na praciahu jakoha rabotnik u adpaviednaści z pracoŭnym, kalektyŭnym dahavorami, praviłami ŭnutranaha pracoŭnaha rasparadku abaviazany znachodzicca na pracoŭnym miescy i vykonvać svaje pracoŭnyja abaviazki, — dadajuć śpiecyjalisty viedamstva. — Da pracoŭnaha adnosicca taksama čas raboty, vykananaj pa prapanovie, rasparadžeńni ci ź viedama najmalnika zvyš za ŭstanoŭlenuju praciahłaść pracoŭnaha času (zvyšuročnaja praca, praca ŭ dziaržaŭnyja śviaty, śviatočnyja i vychadnyja dni).

Da adpracavanaha času adnosiacca ŭ tym liku zvyšuročnyja pracy, pahadzinnaja praca ździelščykaŭ, słužbovyja kamandziroŭki i pracy pa sumiaščalnictvie. A da nieadpracavanaha— apłatny i nieapłatny čas, a taksama straty pracoŭnaha času jak pa vinie rabotnika, tak i pry adsutnaści jaho viny, udakładniajuć u Minpracy.

— Faktyčny pracoŭny čas uličvajecca z momantu prychodu rabotnika na miesca vykanańnia pracy zhodna z praviłami ŭnutranaha pracoŭnaha rasparadku, hrafikam rabot (źmiennaści) abo asablivym zahadam najmalnika i da momantu faktyčnaha vyzvaleńnia ad pracy ŭ hety pracoŭny dzień (źmienu), — kažuć u viedamstvie. — Takim čynam, pradastaŭlenyja najmalnikam rabotniku niekalki hadzin na praciahu pracoŭnaha dnia (źmieny) dla vyrašeńnia asabistych pytańniaŭ nie ŭličvajucca ŭ składzie adpracavanaha času, a naležać da nieadpracavanaha i, takim čynam, nieapłatnaha času.

Pry hetym najmalnik moža na ŭzroŭni łakalnaha narmatyŭnaha pravavoha akta (naprykład, u praviłach unutranaha pracoŭnaha rasparadku) dazvolić rabotnikam vykarystoŭvać častku pracoŭnaha času dla asabistych metaŭ. Najmalnik taksama moža prapisać pryčyny, jakija mohuć pryznavacca pavažlivymi (naviedvańnie doktara, inšyja vyklučnyja vypadki asabistaha i siamiejnaha charaktaru), pry hetym ustalavać paradak pradastaŭleńnia i afarmleńnia takoha času.

— U łakalnym narmatyŭnym pravavym akcie taksama varta praduhledzieć apłatu pracy rabotnika ŭ taki dzień praparcyjna adpracavanamu času. Taksama nie vyklučanaja mahčymaść praduhledzieć u łakalnym narmatyŭnym pravavym akcie adpracoŭku adpaviednaj kolkaści hadzin, jakija vykarystoŭvajucca ŭ asabistych intaresach rabotnika, u inšy čas (druhi dzień), — dadajuć u Minpracy.

• 0
• 0
• 0
• 0
• 0
• 0
• 0
• 0