Pa tym, jakija mahčymaści dla atrymańnia viedaŭ i raźvićcia prafiesijnych navykaŭ isnujuć u toj ci inšaj krainie, možna pradkazać jaje dalejšaje ekanamičnaje raźvićcio, zdolnaść stvarać inavacyi i kankuravać na suśvietnym rynku ŭ budučyni. Analityki Suśvietnaha ekanamičnaha forumu daśledavali situacyju ŭ 130 krainach śvietu i skłali novy rejtynh pa ŭzroŭni raźvićcia čałaviečaha kapitału — Human Capital Report.
Inviestycyi ŭ piersanał
Dastupnaść adukacyi — adzin z hałoŭnych kryteryjaŭ, jakija byli ŭličanyja ŭ paraŭnalnym analizie. Taksama važnuju rolu adyhrali takija faktary, jak zaniataść nasielnictva, mahčymaść nazapasić dośvied pracy, a taksama vałodańnie nou-chau i miery pa pavyšeńni kvalifikacyi supracoŭnikaŭ.
Vyniki daśledavańnia śviedčać ab tym, što lepš za ŭsio padrychtoŭka kadraŭ dajecca Narviehii, Finlandyi i Šviejcaryi, ZŠA i Danii. U hetych krainach nie tolki možna atrymać dobruju adukacyju, tut stvoranyja aptymalnyja ŭmovy dla prafiesijnaha rostu i samarealizacyi asoby.
Šosty radok zajmaje Hiermanija. Vysokaj acenki zasłužyła pierš za ŭsio mocnaja tearetyčnaja i praktyčnaja padrychtoŭka da prafiesijnaj žyćcia. Krychu horš situacyja ź inviestycyjami ŭ piersanał — ŭ hetaj «dyscyplinie» Hiermanija apynułasia na 12-m miescy.
Postsavieckija krainy — lidary pa ŭzroŭni adukacyi
Ź jeŭrapiejskich krain u top-20 ŭvajšli Šviecyja, Słavienija, Aŭstryja, Estonija, Niderłandy, Bielhija i Irłandyja. Rasija ździejśniła vialiki skačok, padniaŭšysia za dva apošnija hady z 26-ha na 16-y radok. Vysokim bałam była adznačanaja dastupnaść adukacyi: pa hetym krytery Rasija ŭvachodzić u pieršuju piaciorku razam ź inšymi postsavieckimi krainami — Kyrhyzstanam, Kazachstanam, Armienijaj i Ukrainaj. Zatoje pa mahčymaściach pavyšeńnia kvalifikacyi i ŭzroŭniu viedaŭ, jakija ŭ pierśpiektyvie buduć asabliva zapatrabavanyja ekanomikaj, Rasija značna adstaje ad lidaraŭ rejtynhu.
Pry hetym u raźvićci talentaŭ Rasija apiaredžvaje inšyja krainy BRIKS. Kitaj, da prykładu, zajmaje 34-y radok. Analityki stanoŭča adznačyli inviestycyi Kitaja ŭ padrychtoŭku budučych śpiecyjalistaŭ.
Ukraina (24 miesca ŭ rejtynhu) idzie za Vialikabrytanijaj i abhaniaje Litvu i Francyju. Horš za ŭsio da kankurencyi na rynku pracy padrychtavanyja žychary krain Afryki, Paŭdniovaj Azii i Blizkaha Uschodu. Śpis krain pa ŭzroŭni raźvićcia čałaviečaha kapitału zamykajuć Maŭrytanija i Jemien.
Industryja 4.0 vykliča kryzis talentaŭ
U hłabalnym vymiareńni, pa vynikach daśledavańnia, na dadzieny momant čałaviečy kapitał vykarystoŭvajecca nieefiektyŭna — tolki na 62%. U hetaj suviazi ekśpierty papiaredžvajuć ab niebiaśpiecy.
«Novaja pramysłovaja revalucyja — Industryja 4.0 — nie tolki stvaraje novyja ŭmovy na rynku pracy, jana patrabuje zusim novych viedaŭ i navykaŭ. Pry takim stanoviščy spraŭ hłabalnaha kryzisu talentaŭ nie paźbiehnuć», — praročyć zasnavalnik Suśvietnaha ekanamičnaha forumu, prafiesar Kłaŭs Švab. Na jaho dumku, mnohim krainam nieabchodna kardynalna pierahledzieć padychod u padrychtoŭcy śpiecyjalistaŭ i nadać naležnuju ŭvahu kampietencyjam, nieabchodnym rynku pracy ŭ budučyni.
Što tyčycca Biełarusi, to jaje ŭ svaim rejtynhu daśledčyki nie pradstavili.
