1. U płanie infrastruktury situacyja palepšała.
U samim horadzie narmalnyja darohi i adramantavanyja tratuary. Centralnyja rajony horada dahledžanyja i adramantavanyja. Ja b navat skazaŭ, što jany vyhladajuć lepš, čym u Vilni. I nie horš, čym rajony luboha biełaruskaha abłasnoha centra.
2. Aktyŭna budujucca vieładarožki.
Pryčym pieravažna heta sapraŭdnyja vieładarožki, a nie vydzielenyja farbaj pałosy, jak u Minsku ci Vilni. Praŭda, viełasipiedystaŭ mienš, čym u Minsku, i pa dobrych lvoŭskich vieładarožkach spakojna chodziać ludzi.
3. Usie čuli pra prablemy śmiećcia ŭ Lvovie. Ale źniešnie ja hetaha nie pabačyŭ. Horad čysty.
Vulicy Lvova nie brudniejšyja za vulicy Homiela. Za ceły dzień u horadzie nie bačyŭ nivodnaha dvornika.
4. Moładź nie tolki Lvova, ale i ŭsioj Ukrainy bolš mabilnaja, čym biełaruskaja, jana bolš padarožničaje. Uvieś čas zaŭvažaješ ludziej z pałatkami, spalnikami i karymatami.
I tut u mianie dva tłumačeńni. Pa-pieršaje, ukrainskija studenty mohuć padarožničać čyhunkaj pa Ukrainie z 50% źnižkaj. Pa-druhoje, vielizarnym impulsam staŭ biaźvizavy režym dla Ukrainy ŭ zonu Šenhien. Hutaryŭ ź niekalkimi 17-hadovymi školnikami, jakija prosta vyrašyli i pajechali aŭtaspynam pa Jeŭropie. I dla hetaha vizy bolš niepatrebnyja!
5. Ukraina ŭžo nie takaja tannaja dla biełarusaŭ, jak raniej. Ale knihi va Ukrainie niejmavierna tannyja.
Byŭ u horadzie, kali tam adbyvaŭsia «Forum vydaŭcoŭ» sa šmatlikimi knižnymi kirmašami. Knihi paraŭnalna ź Biełaruśsiu kaštujuć kapiejki.
6. Hramadski transpart u Lvovie taki ž žudasny, jak i ŭ 2014 hodzie.
Nievialikaje nazirańnie. Za 26 hadoŭ žyćcia ŭ Biełarusi ja nikoli nie bačyŭ, kab dźviery aŭtobusa adčynialisia jašče da jaho spynieńnia. U Lvovie (dy i inšaj Ukrainie) uvieś čas tak.
