Milinkievič: Patrebnaja novaja darožnaja karta

Takoje mierkavańnie vykazaŭ u intervju BiełaPAN lider arhkamiteta pa stvareńni Ruchu za Svabodu, eks-kandydat u prezidenty Alaksandr Milinkievič.

Temie narmalizacyi adnosinaŭ Biełarusi i ES było pryśviečana vystupleńnie Milinkieviča na mižnarodnaj kanfierencyi «Jeŭrapiejskaja palityka dobrasusiedstva: ci buduć parłamienckija vybary ŭ Biełarusi demakratyčnym vybaram?». Kanfierencyja prachodziła 5—8 vieraśnia ŭ Vilni.

«Nieabchodnaja paśladoŭnaść vykanańnia ŭzajemnych krokaŭ i zabaviazańniaŭ abodvuch bakoŭ», — miarkuje A. Milinkievič. Jon padkreśliŭ, što 12 umoŭ ES pa narmalizacyi adnosinaŭ «jak byli, tak i pavinny zastacca». «Hetyja ŭmovy pravilnyja, ich vykanańnia nieabchodna dabivacca, — zajaviŭ palityk. — Ale biełaruskaja ŭłada nie ŭ stanie vykanać ich usie adnačasova, tamu pačynać treba z troch asnoŭnych».

U liku takich asnoŭnych umoŭ A.Milinkievič nazvaŭ vyzvaleńnie palitźniavolenych, svabodu ŚMI i praviadzieńnie demakratyčnych vybaraŭ. «Palitźniavolenyja ŭžo vyzvaleny, ale ŭsio jašče jość «sprava čatyrnaccaci». Pa situacyi ź miedyjami jašče ničoha nie rabiłasia. U vybarčym pracesie jość kaśmietyčnyja źmieny, ale vybary, pa sutnaści, buduć raniejšymi, tamu što va ŭčastkovyja kamisii praktyčna nie ŭklučany pradstaŭniki demakratyčnych kandydataŭ», — zaznačyŭ palityk.

Jak ličyć A. Milinkievič, naładžvać adnosiny Biełarusi i ES treba jak maha chutčej. «Zaležnaść našaj krainy ad Rasii vielmi chutka raście. Hetyja niebiaśpiečnyja kredyty, jakija my biarem, praz paru hadoŭ mohuć pryvieści da katastrafičnaj situacyi, kali ŭ nas nie budzie ekanamičnaj svabody, kali my budziem u poŭnaj zaležnaści ad Rasii», — zaŭvažyŭ palityk.

Narmalizavać adnosiny ź Jeŭropaj nieabchodna jašče i tamu, što, pavodle słoŭ Milinkieviča, «ES moža surjozna dapamahčy ŭ refarmavańni našaj ekanomiki». «Pry vykanańni Biełaruśsiu 12 umoŭ Jeŭrasajuz u stanie dapamahać madernizacyi našaj krainy i, tym samym, umacavańniu niezaležnaści krainy», — skazaŭ eks-kandydat u prezidenty.

Na dumku A.Milinkieviča, u jakaści zaachvočvańnia biełaruskich uładaŭ da dalejšych pieraŭtvareńniaŭ ES moža «častkova abo poŭnaściu admianić sankcyi, pastupova viarnuć prefierencyi, dapamahać u praviadzieńni reformaŭ». «A ludziam, jakija vystupajuć suprać admieny sankcyj, pabojvajučysia taho, što na hetym pracesy demakratyzacyi mohuć zakončycca, ja vielmi spakojna skažu: sankcyi možna viarnuć znoŭ za adzin dzień. ES važna prademanstravać surjoznaść svaich namieraŭ, kab u biełaruskich uładaŭ niedavier źmianiŭsia na vieru ŭ toje, što hety praces źjaŭlajecca pazityŭnym dla našaj krainy», — zajaviŭ Alaksandr Milinkievič.

• 0
• 0
• 0
• 0
• 0
• 0
• 0
• 0