Padčas rasiejska-biełaruskich vučeńniaŭ «Zachad-2017» viertalot Ka-52 («Alihatar»), ździejśniŭ streł u bok hledačoŭ, a paśla pasadki častkova razburyŭ składskoje pamiaškańnie na aeradromie Puškin, raspaviali RBK dźvie krynicy.
16 vieraśnia — u treci dzień rasijska-biełaruskich vučeńniaŭ «Zachad-2017» — u Leninhradskaj vobłaści adbyłosia nie adno, a dva zdareńni z udziełam viertalota Ka-52. Heta raspaviała RBK krynica, blizkaja da Minabarony, i paćvierdziła krynica z avijacyjnaj haliny. Paśla palotu, padčas jakoha Ka-52 daŭ załp u bok hledačoŭ, adbyŭsia jašče adzin mižvolny streł, raspaviali RBK dvoje surazmoŭcaŭ.
Pieršy niezapłanavany streł adbyŭsia ŭ 14:00 pa maskoŭskim časie: ekipaž Ka-52 — padpałkoŭnik Smachcin A.V. i staršy lejtenant Vaŭčkoŭ A.S. — vykanaŭ uźlot z aeradroma Puškin i ździejśniŭ pieralot na palihon Łužski. U 14:47, paśla atrymańnia dazvołu kiraŭnika palotaŭ palihona, pry vykanańni treciaha zachodu na bajavym kursie na vyšyni 50 m i chutkaści prykładna 200 km/h pry ŭklučeńni hałoŭnaha vyklučalnika ŭzbrajeńnia adbyŭsia samaadvolny schod niekiravalnaj avijacyjnaj rakiety S-8. Paśla hetaha staršy lejtenant Vaŭčkoŭ atrymaŭ kamandu spynić vykanańnie zadačy, źmianiŭ kurs i viarnuŭsia na bazu ŭ Puškin. Z-za niezapłanavanaha pusku rakiet try čałavieki atrymali ranieńni. Minabarony paćvierdziła, što viertalot Ka-52 vykanaŭ vypadkovy pusk rakiety, ale heta «adbyłosia ŭ inšy pieryjad času». Paviedamleńni ab paranienych ludziach pry incydencie ŭ viedamstvie nazvali «hłupstvam».
Druhi incydent z Ka-52 adbyŭsia ŭ 17:12 pa maskoŭskim časie — užo paśla pryziamleńnia viertalota na ŭźlotna-pasadačnuju pałasu, raspaviała krynica RBK, blizkaja da Minabarony. Pavodle jaho słoŭ, kali Smachcin i Vaŭčkoŭ, zahłušyŭšy ruchavik, pakinuli viertalot, pravieści paślapalotny techahlad prybyli dva techničnyja śpiecyjalisty. Pieršy praviaraŭ viertalot na pradmiet paškodžańniaŭ, druhi zajmaŭsia techničnym absłuhoŭvańniem uzbrajeńnia, rastłumačyŭ surazmoŭca RBK.
«Jon raźviarnuŭ viertalot takim čynam, kab pryłada była nakiravana ŭ biaśpiečnym kirunku, a paśla źniaŭ kažuch, za jakim znachodzicca harmata. Zatym jon pačaŭ pravodzić usie standartnyja pracedury, jakija zvyčajna pravodziacca ŭ ramkach techniki biaśpieki paśla kožnaha palotu», — raspaviała krynica RBK, blizkaja da Minabarony. Druhi technik pavinien byŭ adčynić zatvor, a zatym vyrabić kantrolny spusk, kab pierakanacca ŭ adsutnaści snarada ŭ kanale stvała, patłumačyŭ surazmoŭca RBK.
Adnak, pavodle jaho słoŭ, technik zabyŭsia pravieryć zatvor i adrazu nacisnuŭ na knopku elektraspusku. «Kali b usio było vykanana pa instrukcyi, snarad by prosta ŭpaŭ pobač z mašynaj, a tut jon zastaŭsia ŭ stvale. U vyniku adbyŭsia streł, jaki paškodziŭ składskoje pamiaškańnie», — skazaŭ na zakančeńnie jon. Druhi streł adbyŭsia nie avijacyjnaj rakietaj, jak u pieršy raz, a 30-milimietrovym snaradam, adznačyŭ surazmoŭca RBK. Z-za strełu adna ściana składa była častkova razburana, nichto nie paciarpieŭ, paviedamiŭ jon.
Ciapier čytajuć
Maŭrykij, Siejšeły, Šry-Łanka i nie tolki: pahladzieli, kudy źbiehli ad biełaruskich marazoŭ praŭładnyja artysty i viadučyja13
Kamientary