Alena Anisim uznačalić TBM?

Staršynia «Tavarystva biełaruskaj movy» Aleh Trusaŭ, jaki ŭznačalvaŭ arhanizacyju z 1999 hoda, pakidaje svaju pasadu. Novaje kiraŭnictva TBM vybieruć 29 kastryčnika na XIII źjeździe hetaj hramadskaj arhanizacyi.

Pavialičyć

Chutčej za ŭsio, novym kiraŭnikom stanie deputat Pałaty pradstaŭnikoŭ Alena Anisim. Kamu jašče prapanoŭvali vyłučyć svaju kandydaturu na pasadu kiraŭnika TBM? Pra heta i nie tolki Aleh Trusaŭ raspavioŭ «Biełaruskamu partyzanu».

— Aleh Anatoljevič, pytańnie ŭ łob: vy budziecie vyłučać svaju kandydaturu?

— Ja bałatavacca nie budu, i zajaviŭ pra heta jašče try hady tamu. Mnie zdajecca, užo chopić. U luboj spravie hałoŭnaje nie tolki jaje ŭznačalić, ale i svoječasova syści. Heta zakon historyi. I chto jaho nie viedaje, toj drenna kančaje.

Ja 19 hadoŭ kiruju TBM. Pryjšoŭ čas sychodzić.

— Ci nie škada?

— Nie, viadoma. Ja źbiraŭsia heta zrabić jašče na minułym źjeździe, ale mianie ŭhavaryli zastacca na try hady. Ja pakidaju arhanizacyju nie ŭ samym drennym stanie. Naš deputat pracuje ŭ parłamiencie, usim, čym moh, ja joj dapamoh. Zaraz treba mianiać staroje kiraŭnictva arhanizacyi na maładoje.

— Nie strašna pakidać arhanizacyju, jakoj addadziena stolki hadoŭ žyćcia? A raptam zahubiać?

— Dobry kiraŭnik sychodzić, a arhanizacyja paśla jaho sychodu jašče lepšaj stanovicca. I drenny toj, paśla sychodu kaho arhanizacyja razvalvajecca. Byvaje ž i takoje!

Spadziajusia, paśla majho sychodu spravy ŭ TBM nie tolki nie paharšacca, ale i palepšacca!

— Ci možacie nazvać imiony tych, chto pretenduje na vaša ciapierašniaje kresła?

— Asnoŭnaja kandydatura — Alena Anisim. Jaje vyłučyła bolšaść. Jość i inšyja kandydatury — mahčyma, hetyja ludzi zojmuć pasady namieśnikaŭ staršyni TBM. Čakajucca taksama i niekatoryja inšyja kardynalnyja źmieny ŭ kiraŭnictvie TBM. Naprykład, my ŭ dva razy skaračajem radu arhanizacyi.

— Alena Anisim biez rozdumaŭ pahadziłasia ŭznačalić TBM? Pytajusia, tamu što deputackija abaviazki patrabujuć niamała času i sił…

— Naša arhanizacyja dapamahła joj stać deputatam. Jak havorycca, za ŭsio ŭ žyćci treba płacić…

Zaŭvažu, što prapanoŭvalisia i inšyja kandydatury — naprykład, taho ž Lavona Barščeŭskaha, ale jon naadrez admoviŭsia ŭznačalić TBM. Niekatoryja chacieli b bačyć na pasadzie kiraŭnika TBM Uładzimira Kołasa, ale jon taksama skazaŭ, što staršynioj nie budzie, a voś z nahody pasady namieśnika padumaje.

Staršynia arhanizacyi — heta jaje tvar. I ja liču, što Alena Anisim spravicca z hetaj rolaj. Jana davoli niadrenna adpracavała ŭ Pałacie pradstaŭnikoŭ. I ja liču, što, u paraŭnańni z toj ža Hannaj Kanapackaj, Alena Anisim dziejničaje nie horš, a moža być, navat i lepš.

— Aleh Anatoljevič, ale i vy ž biez pracy nie zastaniaciesia? Vy ž ciapier rektar pakul nieisnujučaha Nacyjanalnaha ŭniviersiteta!

— Tak, mnie sapraŭdy jość čym zaniacca. U najbližejšaj budučyni paniasiem statut našaha Nacyjanalnaha ŭniviersiteta na rehistracyju. Jon užo amal hatovy, ale nam pastajanna pastupajuć niejkija prapanovy i dapaŭnieńni. My ich razhladajem i ŭnosim adpaviednyja źmieny ŭ statut. Zaraz hetaja praca nabližajecca da kanca. Tamu ŭniviersitetam ja budu pryncypova zajmacca, skancentruju na im usie svaje siły.

Darečy, u hetym hodzie budzie roŭna 20 hadoŭ, jak TBM upieršyniu padniaŭ pytańnie ab stvareńni Nacyjanalnaha ŭniviersiteta. U 1997 hodzie my sabrali 50 tysiač podpisaŭ hramadzian — i jany ŭ mianie da hetaha času zachoŭvajucca!

A siońnia jość usie šancy stvaryć Nacyjanalny ŭniviersitet. My ciapier pryncypova chočam zrabić pryvatnuju VNU. Kali dziaržava nie idzie nam nasustrač — moža, jano i da lepšaha…

• 0
• 0
• 0
• 0
• 0
• 0
• 0
• 0