Za dva hady kolkaść biełarusaŭ z dazvołam na žycharstva ŭ Litvie skaraciłasia na 20%. Kolki ž zastałosia?
Kolkaść hramadzian Biełarusi z DNŽ u Litvie praciahvaje stabilna źmianšacca.
Pa stanie na 1 sakavika 2026 hoda dziejny DNŽ u Litvie (lubych typaŭ) majuć 49 778 hramadzian Biełarusi. Maksimum biełarusaŭ ź litoŭskim dazvołam na žycharstva było 1 krasavika 2024 hoda — 62 844 čałaviek.
Takim čynam, za niapoŭnyja dva hady biełarusaŭ u Litvie pamienieła na 13 066 čałaviek, što składaje bolš za 20% ad pakazčykaŭ viasny 2024 hoda. Za minuły hod skaračeńnie skłała 7 225 čałaviek.
Pry hetym varta adznačyć, što z hetych amal 50 tysiač hramadzian Biełarusi ź litoŭskimi DNŽ de-fakta pražyvaje ŭ Litvie našmat mienš. Reč u tym, što biełarusy ŭ Litvie čaściej za ŭsio pracujuć dalnabojščykami.
Tak, naprykład, pa stanie na 2024 hod amal 25 tysiač hramadzian Biełarusi pracavali tam kiroŭcami-mižnarodnikami. Naturalna, što sa skaračeńniem ahulnaj ličby kolkaść dalnabojščykaŭ taksama moža źmianšacca, ale ŭ pracentach jany ŭsio adno mohuć zajmać kala 40-45% ad usich biełarusaŭ z DNŽ u Litvie. Tady na dalnabojščykaŭ prychodziłasia kala 72% ad usich pracaŭładkavanych biełarusaŭ u Litvie.
Śpiecyfika pracy ŭ ich takaja, što choć farmalna jany pracujuć u Litvie i majuć tam rehistracyju, u samoj krainie dalnabojščyki byvajuć vielmi redka. Kiroŭcy, jak praviła, vykonvajuć rejsy pa inšych krainach Jeŭropy, a pa viartańni z kadencyi jeduć adpačyvać dadomu ŭ Biełaruś.
Pry hetym krychu raście kolkaść biełarusaŭ z pastajannym dazvołam na žycharstva. Kali hod tamu ŭ Litvie było 3822 biełarusy z nacyjanalnym PMŽ i 75 z PMŽ inšych krain Jeŭrasajuza, to ciapier takich 3996 i 77 adpaviedna (ahułam plus 176 čałaviek)
* * *
Kali vy žyviacie ŭ Litvie, to možacie padtrymać «Našu Nivu» častkaj vašaha padachodnaha padatku. Heta nie budzie kaštavać vam ani centa.
Vy prosta pieranakirujecie 1,2% ad užo spłačanaha vami padatku pry padačy štohadovaj dekłaracyi.
Voś padrabiaznaja instrukcyja, ja heta zrabić, kali vy pracujecie ŭ Litvie.
Kali vy pracujecie ŭ Polščy — to vam siudy.
Kamientary
Biednaja Litva s takoj mihracionnoj politikoj