Vosień u našych šyrotach — para «pieraabuvańnia» dla aŭto. Sotni tysiač aŭtamabilistaŭ manitorać infarmacyju: dzie i jak kupić zimovyja šyny aptymalnaj cany i jakaści. Jašče niekalki hadoŭ tamu było vyhadna vazić ich z-za miažy — z toj ža Litvy. Ja sam mieŭ supiarečlivy dośvied, kali da 4-j ranicy stajaŭ u čarzie z raztamožkaj na pamiežnym pierachodzie Katłoŭka. Ale rynak stanovicca bolš cyvilizavanym: navošta nakručvać 340 km, kali toje ž možna kupić u Minsku — navat nie vychodziačy z haraža, praź internet, z dastaŭkaj?
Zručna? Tak. Ale prychod vialikaha hulca internet-handlu ŭ šynny biznes nie prajšoŭ hładka. Pierapadzieł rynku vyklikaŭ niezadavolenaść u dyleraŭ, jakija pryvykli pracavać pa-staromu. Skandał vybuchnuŭ u vieraśni 2016-ha, kali anłajn-hipiermarkiet 21vek.by, nasupierak papiarednim damoŭlenaściam, nie atrymaŭ ad pastaŭščykoŭ dastatkovuju kolkaść šyn.
U šynach kampanija ŭbačyła pierśpiektyvu jašče ŭ 2013 hodzie, ale prodažy pačali tolki ŭ 2016, kali vyrašyli, što syšlisia nieabchodnyja faktary. Bieź istotnych inviestycyj u markietynh kampanija pradała 10 000 šyn viasnoj 2016-ha. Da asieńniaha siezona rychtavalisia surjozna: reziervavać miescy na składach, źbirali asartymient. Ale kali pryjšoŭ čas adhruzki, najbujniejšy dyler šyn marki Goodyear, a śledam za im i drabniejšyja dylery, pačali sabatavać pastaŭki.
Tłumačeńni byli roznyja: niechta spasyłaŭsia na rašeńnie kiraŭnictva, chtości na niezacikaŭlenaść, a niekatoryja prosta «źnikli».
Ź jurydyčnaha punktu hledžańnia aptovyja kampanii — kamiercyjnyja arhanizacyi, jakija sami vyrašajuć, z kim im zaklučać kantrakty. I nichto nie kazaŭ naŭprost, što jość niejkaje kalektyŭnaje rašeńnie pra bajkot 21vek.by. Ale supadzieńnie było nastolki vidavočnym, što nahadvała tendencyju.
«My sprabavali havaryć z pradstaŭnikom GoodYear ŭ Biełarusi, ale parazumieńnia nie znajšli, — raspaviadaje namieśnik kiraŭnika 21vek.by Siarhiej Stajuničaŭ. — Nam zajavili, što ničoha nie straciać, kali nie buduć z nami pracavać».
Goodyear — brend znakamity. Heta amierykanskaja kampanija, jakaja zajmajecca vytvorčaściu šyn užo bolš za sto hadoŭ i sama nazva jakoj pachodzić ad imia Čarlza Hudyjera, jaki vynajšaŭ praces vułkanizacyi. «Heta nie samy vialiki siehmient pa kolkaści, ale istotny pa hrošach, bo ich šyny niatannyja, — kaža Siarhiej. — I sama situacyja była dziŭnaja. Naprykład u ZŠA Amazon pradaje hetyja šyny, u Rasii Ulmart.ru i Ozon.ru taksama, a nam — nielha?
Daviałosia źviarnucca ŭ maskoŭski ofis kampanii. U vyniku, pierad pačatkam viasnovaha «pieraabuvańnia» aŭto adbyłasia trochbakovaja sustreča: my, pradstaŭnik GoodYear ŭ Biełarusi i pradstaŭniki maskoŭskaha ofisa. U vyniku my abrali dystrybutara, ź jakim nam było b kamfortna mieć spravu, i pracujem».
U siezonie-2017 21vek.by raźličvaje pradać 70 000 šyn.
Situacyja, jakaja nahadvała zmovu, była adzinaj za ŭsiu 13-hadovuju historyju 21vek.by, padkreślivaje Siarhiej.
«Naohuł šynny siehmient nas ździviŭ nie adzin raz. U siehmiencie bytavoj techniki našymi pastaŭščykami źjaŭlajucca ŭ tym liku viadučyja roźničnyja sietki, choć my kankurenty. Naš aptovy adździeł pracuje ź inšymi internet-kramami, jakija taksama dla nas kankurenty. I my ŭsie ličym, što heta narmalna. Just business. Tolki ŭ šynach my sutyknulisia z tym, što najbujniejšy dystrybjutar prosta admoviŭsia zaklučać damovu. Skazać, što my byli ździŭleny padychodam - heta mocna pieramienšyć. Ale mnie zdajecca efiekt atrymaŭsia advarotnym. Heta tolki dadało matyvacyi. Adznaču, što byvajuć inšyja vypadki - naprykład, pastaŭščyk admoviŭsia pracavać z nami, kali ich pradukcyja budzie pradavacca tolki praź internet, biez roźničnaj kramy. Ale heta suśvietny brend, jany pačynali jak siamiejny biznes i dla ich važna, kab klijent prychodziŭ mienavita ŭ realnuju kramu. I nam heta cikava, my hatovyja pracavać i takim čynam, adkryvać šou-rum dla hetaha. Ale tut usio prazrysta: jość patrabavańnie, kali jano vykonvajecca — prablem z supracoŭnictvam niama».
Padčas kanfliktu dystrybjutary stavili pytańnie: ci mohuć mieniedžary internet-kramy takoha šyrokaha profilu, jak 21vek.by, dać pa šynach prafiesijnuju kansultacyju? A to klijent, maŭlaŭ, spačatku kansultujecca ŭ prafiesijanałaŭ, a potym «sychodzić padumać u internet» i nabyvaje šyny na 21vek.by, pakidajučy prafiesijanałaŭ biez prybytku…
«Biezumoŭna, našy kansultanty dajuć nieabchodnuju infarmacyju klijentu. Apieratary koł-centra prachodziać dadatkovaje navučańnie i atrymlivajuć śpiecyjalizacyju ŭ kankretnych śpiecyfičnych katehoryjach, naprykład šynach, santechnicy abo IT - kaža Siarhiej Stajuničaŭ. — Ale treba pamiatać, što ŭ kłasičnaj internet-kramie klijent naohuł nie telefanuje, a robić vybar na padstavie infarmacyi ŭ internecie, vodhukaŭ, ahladaŭ, testaŭ u śpiecyjalizavanych vydańniach, potym znachodzić tavar na sajcie, afarmlaje zamovu praz košyk, płacić kartaj u momant zamovy i atrymlivaje dastaŭku. Biełaruski rynak ruchajecca ŭ hetym kirunku, ale pakul nie tak chutka.
My bujny hulec na rynku, naprykład u nas kuplajuć kožnuju 6-ju pralnuju mašynu i chaładzilnik u Biełarusi.
I dzika było b sabie ŭjavić, kali b, naprykład, minski zavod «Atłant», ź jakim u nas padpisanaja damova, vystaviŭ pretenziju, što pakupniki prychodziać da ich u firmovy mahazin, hladziać chaładzilniki, adčyniajuć dźviercy, aceńvajuć pradukcyju, a paśla nabyvajuć hetyja madeli ŭ nas. U cyvilizavanym biznesie kožny pradaviec maje svaje plusy. Dzieści heta cana, dzieści — zručnaść, dastaŭka».
Niekatoryja šyny ŭ 21vek.by kaštujuć krychu bolš, čym u śpiecyjalizavanych kramach ci ŭ drobnych internet-pradaŭcoŭ. «Ale my aktyŭna pracujem z bankami. U nas šmat partniorskich prahram, skiravanych na stymulacyju pakupak — pa kredytnych kartach, rasterminoŭcy, bonusach. Kožny pavinien raźvivacca, kab pryciahvać klijenta, a nie prosta rabić sproby błakavać kankurentaŭ. Kankuravać tolki canoj — bieśpierśpiektyŭna».
Šyny — tavar niaprosty. Ad mnohich faktaraŭ zaležyć, kolki jany prasłužać. Što adbyvajecca, kali klijent zajaŭlaje pra brak?
«Kožny naš pakupnik maje ček, i ŭ vypadku ŭźniknieńnia prablem moža źviarnucca da nas, — tłumačyć Siarhiej. — My abaviazany pryznačyć i apłacić ekśpiertyzu, kab razabracca, ci pradukt trapiŭsia brakavany, ci była zroblena pamyłka na etapie šynamantažu abo ekspłuatacyi… Praŭda, ni razu takoj situacyi nie ŭźnikała. My nie zajmajem žorstkaj pazicyi, nam lepš zamianić koła, čym stracić klijenta. Nam važna nie tolki pradać tavar zaraz, ale i zrabić svaju pracu nastolki dobra, kab klijentu ŭsio spadabałasia i jon viarnuŭsia za novymi pakupkami».
Ci apraŭdana stavić univiersalnyja šyny
Kožnamu chočacca aščadzić: niekatoryja aŭtamabilisty staviać univiersalnyja šyny, kab nie mianiać kamplekty vosieńniu i viasnoj. «Heta nie dla našaha klimatu. U nas letam moža być da +30, a zimoj da -20. Niama šyn, efiektyŭnych u takim dyjapazonie - 50 hradusaŭ. Univiersalnyja buduć univiersalna drennyja i ŭletku, i ŭzimku».
Za hod u Biełarusi pradajecca
2 000 000 šyn
Ź ich 500 000 — pradukcyja ajčynnaj «Biełšyny»
100 000 — premium-brendy Goodyear, a taksama Michelin, Continental, Pirelli, Bridgestone.
300 000 — siaredniaj cenavaj katehoryi: Sava, Barum, Matador, Nexen, Hankook, Gislaved, Tigar
Astatnija — rasijskija Cordiant, Kama, Amteli kitajskija Torque i LingLong.
21vek.by u ličbach
13 hadoŭ na rynku
48 młn dalaraŭ vyručki za 2016 hod i rost bolš za 50% u 2017 hodzie
500 supracoŭnikaŭ
40 000 zakazaŭ štomiesiac
130 000 najmieńniaŭ tavaraŭ u katałohu
800 pastaŭščykoŭ
14% usiaho internet-handlu ŭ Biełarusi
TAA «Tryjavist», UNP 190806803
Kamientary