Pazaletaś ŭ Biełarusi adbyłosia 18 dziciačych suicydaŭ, a letaś — užo 29. Volha Litvinava, namieśnik hałoŭnaha ŭrača pa miedycynskaj častcy Minskaha haradskoha kliničnaha dziciačaha psichijatryčnaha dyspansera, raspaviała deputatam parłamienta ab psichičnym zdaroŭi dziaciej i padletkaŭ, paviedamlaje Tut.by.
Ilustracyjnaje fota
«Na žal, 2016 hod pakazaŭ nam bolšuju kolkaść suicydaŭ siarod niepaŭnaletnich, čym 2015 hod. 2015 hod — heta 18 vypadkaŭ sychodu z žyćcia niepaŭnaletnich, 2016 hod — 29 vypadkaŭ. Dla nas, śpiecyjalistaŭ, heta sihnał da taho, što treba niešta rabić u hetym kirunku, i my nie siadzim na miescy», — skazała psichijatr.
Usiaho za apošnija piać hadoŭ u Biełarusi dobraachvotna syšli z žyćcia 124 dziciaci.
«Tolki vosiem ź ich byli ŭ poli zroku lekara-psichijatra, — patłumačyła Volha Litvinava. — Astatnija dzieci nie źviartalisia pa dapamohu da śpiecyjalistaŭ».
Pavodle jaje danych, u hetaj sumnaj statystycy na adnu dziaŭčynku prychodzicca 2,5 chłopčyka. Ŭzrost — u asnoŭnym, 15-17 hadoŭ. Parasuicydy (sproby samahubstva, jakija nie skančajucca śmierciu), u asnoŭnym, ździajśniajuć dziaŭčynki. U minułym hodzie śpiecyjalisty zafiksavali 244 sproby suicydu siarod niepaŭnaletnich.
«My vielmi akuratna stavimsia da hetaj ličby, heta tyja dzieci, jakich my zmahli vyjavić i ź jakimi tut ža pačali pracavać. Jak na stacyjanarnym etapie, tak i ŭ dalejšym, kali jany sychodziać na ambułatorny etap», — patłumačyła lekarka.
95% tych, jakija pajšli z žyćcia, i tych što zastalisia ŭ žyvych, nie źviartalisia da psichijatraŭ.
«Heta źniapraŭdžvaje adzin ź mifaŭ, jaki, na žal, isnuje ŭ nas — što ŭsie, chto sychodzić z žyćcia ci ździajśniaje sprobu, abaviazkova psichična chvoryja ludzi. Dyk voś nie, jany nie ŭsie psichična chvoryja ludzi. Bolš mahu skazać: siarod pryčyn dziciačych suicydaŭ depresii i reaktyŭnyja depresiŭnyja stany składajuć vielmi maleńkuju častku. Pryčyna, pa jakoj dzieci sprabujuć syści z žyćcia, — heta parušanyja siamiejnyja adnosiny», — ličyć Volha Litvinava.
70% dziaciej, jakija byli apytanyja ŭžo paśla suicydalnaj sproby, kažuć pra toje, što ŭ ich niama daviernych adnosin u siamji, i jany nie mohuć źviarnucca pa dapamohu da svaich baćkoŭ.
Pavodle słovaŭ namieśnika hałoŭnaha ŭrača, u apošni hod była aktualnaj i prablema destruktyŭnych hulniaŭ u internecie. Adnak jana ličyć, što suicydaniebiaśpiečnaja hulnia — heta svajho rodu tryhier, ale heta nie pryčyna sychodu z žyćcia.
«My razumiejem, što my za adzin raz nie adukujem ŭsich baćkoŭ, ale my pavinny padkazać dziciaci, kudy jano moža pryjści pa dapamohu. My zdymajem mif z pytańniaŭ psichijatryi, styhmatyzacyi psichična chvorych, kab dzieci nie bajalisia da nas iści. Čaściakom dzicia prychodzić pieršym i ŭžo za saboj viadzie baćkoŭ», — skazała Volha Litvinava.
Kruhłasutkavy telefon davieru dla dziaciej i padletkaŭ +375 17 263-03-03. Hutarka ananimnaja i kanfidencyjnaja.
