«Žurnalisty za talerantnaść» zaklikajuć «Našu Nivu» nie cytavać patryjarcha Kiryła, Trampa i Daškieviča

Biełaruskaja hramadskaja inicyjatyva «Žurnalisty za talerantnaść» uklučyła «Našu Nivu» ŭ śpis ŚMI, jakija, jak śćviardžajecca, vykarystoŭvajuć movu varožaści da ŁHBT-supolnaści. Jakija pretenzii vystaŭlenyja vydańniu?

Pavialičyć

Patłumačym, što «Žurnalisty za talerantnaść» praciahvajuć štohadovyja manitorynhi movy varožaści ŭ adnosinach ŭraźlivych hrup u biełaruskich ŚMI. U adkrytym dostupie źjavilisia vyniki analizu movy varožaści ŭ adnosinach ŁHBTK+. Hetaja abrevijatura tradycyjna aznačała supolnaść leśbijanak, hiejeŭ, biseksuałaŭ, transhiendaraŭ. Ciapier da jaje dałučylisia «kviry» — tyja, chto sumniajecca nakont svajoj hiendarnaj identyčnaści. Pad «+» majucca na ŭvazie ŭsie astatnija — interseksuały, aseksuały, panseksuały.

Mova varožaści — moŭnaje kanstrujavańnie niaroŭnaści, ad prostych zaklikaŭ da hvałtu da prynižalna-iraničnych epitetaŭ. Arhanizatary daśledavańnia zaklikajuć ŚMI paźbiahać takich vyrazaŭ.

Daśledčyki na čale z kaardynataram inicyjatyvy Vijaletaj Jermakovaj praanalizavali 2215 materyjałaŭ «NN» i znajšli ŭ ich vosiem prajavaŭ movy varožaści ŭ adnosinach ŁHBT.

«Asnoŭnaja dola niekarektnych materyjałaŭ — pieradruki ź inšych resursaŭ, siarod ich hamafobnyja cytaty patryjarcha Kiryła, Daškieviča, transfobnyja cytaty Trampa», — taki vierdykt atrymała «Naša Niva» ad «Žurnalistaŭ za talerantnaść».

Pryviadziom frazu Trampa, u jakoj daśledčyki znajšli movu varožaści: «Naša armija pavinna zasiarodzicca na rašučaj i pieravažnaj pieramozie, a nie zajmacca vializnymi miedycynskimi vydatkami i inšymi pieraškodami, jakija ciahnuć za saboj vajskoŭcy-transhiendary. Dziakuj». Heta była prostaja cytata ź jaho tvitara.

A voś inšy prykład «movy varožaści» na staronkach «Našaj Nivy»:

«Zakony ab adnapołych šlubach, jakija prymajucca ŭ šerahu krain, paryvajuć z maralnaj pryrodaj čałavieka i vyklikajuć takoje ž abureńnie ludziej, jak i zakony fašysckaj Hiermanii», — zajaviŭ patryjarch Maskoŭski i ŭsioj Rusi Kirył. Heta cytata z materyjała BBC.

Rejtynh ŚMI pa žorstkaści movy varožaści vyhladaje nastupnym čynam (u dužkach ukazvajecca kankretnyja pretenzii):

1. «Sputnik» — 10,67 (movu varožaści stvarajuć aŭtary materyjałaŭ + tranślujucca hamafobnyja cytaty Pucina»).
2. «Naša Niva» — 9,29 (asnoŭnaja dola niekarektnych materyjałaŭ — pieradruki ź inšych resursaŭ, siarod ich hamafobnyja cytaty patryjarcha Kiryła, Daškieviča, transfobnyja cytaty Trampa».
3. Udf.by — 8,87 (mova varožaści nie stvarajecca aŭtarami materyjału, adnak jaje šmat u artykułach pra čačenskija padziei, infarmacyju pra jakija žurnalisty tranślavali niejtralna, ale padrabiazna).
4. «Kamsamolskaja praŭda» — 8,67 (jak praviła, movu varožaści stvarajuć aŭtary materyjałaŭ)
5. «Biełaruski partyzan» — 8,62 (sajt tranśluje hamafobnyja vykazvańni Paźniaka, Łukašenki, tenisistki Kort + hamafobnyja vykazvańni robiać błohiery na sajcie)

Źviartajuć na siabie ŭvahu pretenzii da niekatorych inšych ŚMI. Naprykład, «Radyjo Svaboda», siarod inšaha, vinavataje ŭ «niejtralnym aśviatleńni čačenskich padziej, dastatkova žorstkich samich pa sabie». Vyklikaje ździŭleńnie, što daśledčyki vystaŭlajuć pretenzii navat «niejtralnamu aśviatleńniu». 

* * *

Jak vy ličycie, ci varta «Našaj Nivie» paźbiahać pramych cytat suśvietnych hramadskich dziejačaŭ, kab palepšyć svaje pazicyi ŭ nastupnych rejtynhach ad «Žurnalistaŭ za talerantnaść»? Abmiarkoŭvajcie!

***

Na telehram-kanał «Našaj Nivy» možna padpisacca tut.

• 0
• 0
• 0
• 0
• 0
• 0
• 0
• 0