Kiraŭniki i pradstaŭniki dypmisij zamiežnych dziaržaŭ u Biełarusi dałučylisia da biełaruskamoŭnaha paetyčnaha fłešmobu. Pradstaŭniki pasolstvaŭ Šviecyi, Kyrhyzstana, Słavakii, Čechii i Finlandyi pračytali na videa tvory biełaruskich aŭtaraŭ u padtrymku ŭdzielnikaŭ konkursu «Čytajem pa-biełarusku z velcom».
Na prapanovu arhanizataraŭ prajekta adhuknulisia pradstaŭniki šmatlikich dypmisij. Pasły i savietniki pryznalisia, što z zadavalnieńniem padtrymali prajekt, vykazaŭšy svajo pavažlivaje staŭleńnie da biełaruskaj kultury, movy i litaratury.
Nadzvyčajny i Paŭnamocny Pasoł Šviecyi Kryścina Juchaniesan prakamientavała svoj udzieł u prajekcie tak: «Ja z radaściu ŭziała ŭdzieł u inicyjatyvie, jakaja padtrymlivaje biełaruskuju litaraturu. Dla mianie heta była adna ź pieršych sustreč sa spadčynaj biełaruskich paetaŭ i piśmieńnikaŭ. Mahu skazać, što ŭ mianie zastalisia tolki dobryja ŭražańni i sapraŭdnaja cikavaść da prajektu». Kryścina Juchaniesan pračytała adzin z samych viadomych tvoraŭ Maksima Bahdanoviča «Zorka Vieniera».
Da inicyjatyvy dałučyŭsia i Nadzvyčajny i Paŭnamocny Pasoł Kyrhyzskaj Respubliki Kubanyčbiek Kasymavič Amuralijeŭ. Pasoł pračytaŭ vierš Maksima Bahdanoviča «Zimoj». 9 śniežnia adznačałasia 126 hadoŭ z dnia naradžeńnia hetaha kłasika biełaruskaj litaratury.
«Rodnaja mova zakładaje asnovu dla myśleńnia i emocyj čałavieka. Heta nieadjemnaja častka čałaviečaj asoby, jakaja dałučaje nas da našaha kulturnaha asiarodździa. Rodnaja mova — heta taksama važny instrumient dla atrymańnia novych viedaŭ i dla vyvučeńnia inšych moŭ. U nas u Finlandyi taksama dźvie aficyjnyja movy: finskaja i šviedskaja. Ja ŭziaŭ udzieł u hetym prajekcie, bo mianie cikaviać novyja movy, i ja chacieŭ vykazać svaju pavahu da biełaruskaj movy», — prakamientavaŭ padtrymku prajekta Janie Chiejskanien, savietnik-pasłańnik, kiraŭnik Adździaleńnia Pasolstva Finlandyi ŭ Biełarusi. Dypłamat abraŭ dla čytańnia tvor Jakuba Kołasa «Nadychod zimy».
Pasoł Słavackaj Respubliki Jozef Mihaš abraŭ tvor Jakuba Kołasa i pryznaŭsia, što biełaruskaja mova zdajecca jamu vielmi pryhožaj i miłahučnaj.
Udzieł u zimovym paetyčnym fłešmobie taksama pryniaŭ Nadzvyčajny i Paŭnamocny Pasoł Češskaj Respubliki ŭ Respublicy Biełaruś Miłan Ekiert. Pasoł padtrymaŭ prajekt, pračytaŭšy tvor Jakuba Kołasa.
«My ŭdziačnyja pradstaŭnikam dypłamatyčnaha korpusa za padtrymku prajekta i ŭdzieł u našaj inicyjatyvje i z radaściu adznačajem, što biełaruskaja kultura i litaratura cikavyja nie tolki hramadzianam našaj krainy, ale i pradstaŭnikam inšych krain i kultur», — prakamientavaŭ načalnik adździeła karparatyŭnych kamunikacyj kampanii velcom Viačasłaŭ Śmirnoŭ.
Padtrymka prajekta pradstaŭnikami dypłamatyčnaha korpusa ŭ Respublicy Biełaruś — nie adziny prykład udziełu pradstaŭnikoŭ inšych krain u inicyjatyvie. Raniej udzielnikaŭ konkursu «Čytajem pa-biełarusku z velcom» užo padtrymali hienieralny dyrektar i top-mieniedžery velcom. Jany zapisali videa ŭ padtrymku respublikanskaha konkursu junych čytalnikaŭ.
Pieršy etap respublikanskaha konkursu junych čytalnikaŭ «Čytajem pa-biełarusku z velcom» praciahniecca da 20 śniežnia 2017 hoda. Konkurs pravodzicca pry padtrymcy Ministerstva adukacyi Biełarusi siarod navučencaŭ 7 i 8 kłasaŭ. Udzielnikam prapanujecca zapisać videa, na jakim jany čytajuć adzin z tvoraŭ biełaruskaj litaratury. Zatym nieabchodna raźmiaścić videa na asabistaj staroncy ŭ adnoj z sacyjalnych sietak (Vkontaktie, Facebook, Instagram) i paznačyć publikacyju aficyjnym chešteham konkursu — #čytajemzvełkom abo #čytajemzvelcom. Najlepšyja, na dumku žury, kankursanty buduć nazvany da 29 śniežnia 2017 hoda i voźmuć udzieł u rehijanalnych etapach konkursu ŭ 2018 hodzie. Pieramožcy respublikanskaha finału atrymajuć smartfony marki Apple.
Ciapier čytajuć
«Na kancertach niama miesca radykalnamu nacyjanalizmu, ahresii i hvałtu». Maks Korž vykazaŭsia nakont skandału, jaki razhareŭsia paśla jaho vystupu ŭ Varšavie3636
Kamientary