Staršynia Partyi BNF razam z mastakom Mikołam Kupavam 14 śniežnia mieli sustreču z načalnikam hałoŭnaha ideałahičnaha ŭpraŭleńnia Administracyi prezidenta Alaksandram Iljasievičam. Havorka zajšła ab śviatkavańni 100-hodździa niezaležnaści Biełaruskaj Narodnaj Respubliki.
Ryhor Kastusioŭ. Fota Siarhieja Hudzilina.
Kastusioŭ dabivaŭsia sustrečy ŭžo peŭny čas: pisaŭ elektronnyja listy, telefanavaŭ. «13 śniežnia dzieści a 21-j viečara mnie paviedamili, što sustreča adbudziecca».
My pieradali siem z pałovaj arkušoŭ prapanovaŭ adnosna śviatkavańnia daty 25 Sakavika. Heta i ŭstalavańnie pamiatnych šyldaŭ na damach, źviazanych z BNR, i sumiesnaje śviatkavańnie niezaležnaha hramadstva i ŭładaŭ, i praviadzieńnie supolnaha palitdnia na pradpryjemstvach na temu BNR, i šmat usiaho inšaha», — raskazvaje Kastusioŭ.
Pavodle słovaŭ staršyni Partyi BNF, hałoŭny ideołah Administracyi ŭspryniaŭ sustreču «na pazityvie». «Jon byŭ vielmi zacikaŭleny, zadavaŭ šmat pytańniaŭ pra tyja padziei. Taksama my adznačyli, što nie musić paŭtarycca toj scenar 25 Sakavika, jaki byŭ sioleta, kali demanstrantaŭ razahnali z centru horada. Ahułam sustreča doŭžyłasia kala hadziny», — adznačaje Kastusioŭ.
Prapanovy Kastusiova i Kupavy Iljasievič maje pieradać kiraŭničcy Administracyi Natalli Kačanavaj. Ciaham čatyrnaccaci dzion ułady abiacajuć dać pieršy adkaz adnosna hetych prapanovaŭ.
Taksama Kastusioŭ samastojna siońnia pieradaŭ prapanovy pa adznačeńni 100-hodździa niezaležnaści BNR u Saviet ministraŭ i Minharvykankam. Jon taksama rychtuje prapanovy Ministerstvu zamiežnych spravaŭ, Ministerstvu kultury, Akademii navuk i inšych dziaržaŭnym strukturam.
«Jość spadziavańnie, što niešta atrymajecca», — padvodzić vysnovu Ryhor Kastusioŭ.
***
Na telehram-kanał «Našaj Nivy» možna padpisacca tut.
