Supracoŭniki Nacyjanalnaha centralnaha biuro Interpała ŭ Biełarusi i ŭpraŭleńnia nahladna-vykanaŭčaj dziejnaści MUS 16 śniežnia ekstradavali z Bałharyi mužčynu, jaki abvinavačvajecca ŭ niesankcyjanavanym dostupie da kampjutarnaj sistemy adnaho ź biełaruskich bankaŭ. Pra heta paviedamlaje pres-słužba MUS.
U viedamstvie raspaviali, što biełaruskaj milicyjaj byŭ inicyjavany vyšuk fihuranta pa linii Interpała ŭ žniŭni 2017 hoda. U tym ža miesiacy jon byŭ zatrymany ŭ Bałharyi.
«Pa infarmacyi pravaachoŭnikaŭ, mužčyna datyčny da kradziažu hrašovych srodkaŭ šlacham vykarystańnia kampjutarnaj techniki letam 2016 hoda. Zhodna z materyjałami spravy, hrupa chakieraŭ uzłamała kampjutarnuju sistemu banka i z dapamohaj škodnasnaha prahramnaha zabieśpiačeńnia atrymała mahčymaść addalenaha kiravańnia bankamatami finansavaj ustanovy», — raspaviali ŭ milicyi.
Za niekalki hadzin mužčyna razam z saŭdzielnikami zavałodaŭ 527 tysiačami dalaraŭ, 67,5 tysiačy jeŭra i amal 109 tysiačami biełaruskich rubloŭ z 27 bankamataŭ, raźmieščanych u Minsku, Mahilovie i Viciebsku.
Pa fakcie kradziažu šlacham vykarystańnia kamputarnaj techniki, ździejśnienaha arhanizavanaj hrupaj u asabliva bujnym pamiery, była zaviedziena kryminalnaja sprava pa č. 4 art. 212 KK Biełarusi. Sankcyi pa hetym artykule praduhledžvajuć da 15 hadoŭ pazbaŭleńnia voli.
Z pačatku hoda heta ŭžo 13 ekstradycyja ŭ Biełaruś.
Tut.by nahadvaje, što ŭ žniŭni 2016 hoda Alfa-Bank raspavioŭ, što adklučyŭ usie svaje bankamaty «z-za chakierskaj ataki na prahramnaje zabieśpiačeńnie bankaŭskaha abstalavańnia i sproby kradziažu najaŭnych hrošaj». Heta pieršy vypadak chakierskaj ataki takoha maštabu na bank u našaj krainie, pra jaki stała viadoma hramadskaści.
Ciapier čytajuć
Staŭ viadomy sens kryminalnaj «spravy strachaŭščykoŭ»11
Kamientary