Sud prysudziŭ byłoha dyrektara «Hrodnaabłsajuzdruku» da 8,5 hoda źniavoleńnia: jaho pryznali vinavatym u chabarach i kradziažach. U kałoniju adpravicca i jahony namieśnik. Padrabiaznaści paviedamlaje Tut.by sa spasyłkaj na pres-słužbu UUS Hrodzienskaha abłvykankama.
«U jaho było ŭsio: dobraja pasada, vysoki zarobak, niadrennaja piensija, ale chaciełasia bolšaha. Hrošy dastavalisia lohka: źjeździŭ u Minsk, sabraŭ «daninu», pryvioz za adnu pajezdku 2 zarobki», — raspaviadaje supracoŭnik abłasnoha UBEP Siarhiej Papok.
Fihurantami spravy stali kiraŭnik dziaržustanovy «Hrodnaabłsajuzdruk» 73-hadovy Tadevuš Vałčkievič i jaho namieśnik, 44-hadovaja Ludmiła Savoščyk.
Na praciahu hoda jany byli ŭ apieratyŭnaj raspracoŭcy pravaachoŭnikaŭ, a ŭ 2016 zatrymali. Hałoŭnaja pretenzija - atrymańnie adkataŭ ad partnioraŭ arhanizacyi.
Pa dadzienych śledstva, z 2010 fihuranty atrymlivali chabar ad kiraŭnika pryvatnaha staličnaha pradpryjemstva. Pastaŭščyk tavaru płaciŭ hrošy za padaŭžeńnie dahavoraŭ, pavieličeńnie zakupak ŭ jaho i svoječasovuju apłatu tavaru z boku «Hrodnaabłsajuzdruku». Pamier chabaraŭ składaŭ ad 1,5 da 15 miljonaŭ rubloŭ — usiaho na ahulnuju sumu ŭ 240 młn rubloŭ «starymi».
Časam zamiest hrošaj pieradavalisia bytavyja prybory: ad ačyščalnika pavietra i pyłasosa da skrynki lichtarykaŭ i batarejek.
Adkaty ŭ 10% ad sumy płaciažoŭ pieradavaŭ kiraŭnictvu «Hrodnaabłsajuzdruk» jašče adzin kiraŭnik staličnaha ČUPa — a ŭsiaho 150 miljonaŭ «starymi». Jašče 25 młn pieradali pradstaŭniki dvuch inšych arhanizacyj ź Minska. Paźniej niekatoryja z hetych partnioraŭ aformili jaŭku z pavinnaj.
«Jak vyśvietliłasia, Vałčkievič i Savoščyk časta vyjazdžali ŭ stalicu razam. Dyrektar jechaŭ u ministerstva pa słužbovych spravach, u jaho namieśnika była nie mienš adkaznaja misija - zbor «daniny», — kanstatuje jašče adzin supracoŭnik UBEZ Michaił Tatarevič.
Pry hetym milicyjanty znajšli čałavieka, jaki pryncypova nie pahadziŭsia rabić adkaty — za što straciŭ kantakt z UP «Hrodnabłsajuzdruk».
Akramia chabaraŭ kiraŭnika sietki hazietnych kijoskaŭ sudzili za kradziažy pry afarmleńni kamandzirovak.
Užo ŭ sudzie Leninskaha rajona Hrodna fihurant častkova pryznaŭ vinu ŭ chabarach, fihurantka kateharyčna admaŭlała. Choć aboje pahadzilisia z abvinavačvańniem u kradziažach i dobraachvotna pakryli pryčynieny ŭron.
Sud prysudziŭ byłoha dyrektara da 8,5 hadoŭ pazbaŭleńnia voli, a jaho namieśnika da 7,5 hadoŭ. U ich taksama kanfiskavana majomaść, na praciahu 5 hadoŭ zabaroniena zajmać peŭnyja pasady.
