Alimkin — aktyvistu Rabianku ŭ sudzie: «Vy ž apazicyjanier. Vam nie zapadło vystupać razam z uładaj?»

U Minskim haradskim sudzie praciahvajecca razhlad kryminalnaj spravy «prarasijskich publicystaŭ», jakich abvinavačvajuć u raspalvańni rasavaj, nacyjanalnaj abo relihijnaj varožaści abo roźni. Na łavie padsudnych — dacent BDUIR Juryj Paŭłaviec, brescki achoŭnik Dźmitryj Alimkin i hałoŭny redaktar časopisa «Novaja ekanomika» Siarhiej Šypcienka, piša Tut.by.

Siońnia ŭ sudzie dapytvajuć Dzianisa Rabianka, jaki ŭ kastryčniku 2016 hoda napisaŭ na adnaho z aŭtaraŭ «Rehnuma» zajavu ŭ Hienprakuraturu.

— Ja pračytaŭ artykuł Ały Broń (psieŭdanim Dźmitryja Alimkina) na «Rehnumie» i ŭ kancy kastryčnika 2016 hoda napisaŭ zajavu ŭ Hienprakuraturu. U artykule aŭtar pisaŭ, što biełarusy — nie nacyja, movy niama, a biełarusy — unuki palicajaŭ. Heta ŭsio mianie aburyła, i ja napisaŭ zajavu, bo ja liču, što takija artykuły raspalvajuć nacyjanalnuju varažnieču. Mnie dali adkaz z Hienprakuratury, što zavodzić kryminalnuju spravu, jak ja prasiŭ, nie buduć, błakavać resurs — taksama.

U Ministerstva infarmacyi i inšyja orhany Rabianok nie źviartaŭsia. Tekstaŭ inšych abvinavačanych Rabianok nie čytaŭ. U svaim adkazie Hienprakuratura pakazała, što sama źvierniecca ŭ Mininfarmacyi nakont publikacyi.

— U tekstach biełaruskamoŭnych nazyvajuć unukami palicajaŭ, a biełaruskaj movaj, piša aŭtar, karystajucca tolki rusafoby. Ja nie chaču, kab žychary Rasii dumali tak. Zaŭtra nasielnictva Rasii, jaki-niebudź Mataroła, pačytaje takoje i pajedzie ŭ Biełaruś vyzvalać ruskamoŭnych. Ja takoha nie chaču, — skazaŭ Rabianok.

— Moža, Ała Broń nastalhuje pa tych časach, kali biełaruskaj movaj karystałasia bolš ludziej, 30 hadoŭ tamu? Moža, u svaich tekstach zaklikaje viarnuć ich? — udakładniŭ abaronca Dźmitryja Alimkina.

— Vy čytali artykuł? Tam aŭtar piša, što biełaruskaj movy naohuł niama.

U samoha Alimkina taksama było niekalki pytańniaŭ da Rabianka.

— Vy ž apazicyjanier. Vam z uładaj razam vystupać nie zapadło? — pačaŭ Alimkin.

— Ja nikoli nie chavaŭ svaich palityčnych pohladaŭ. Ale pry čym tut heta?

— Heta pytańni nie pa sutnaści, palityčnyja pohlady śviedki da spravy nie adnosiacca, — adrezaŭ sudździa.

Alimkin taksama spytaŭ, ci staŭ śviedka paśla čytańnia tekstaŭ horš stavicca da ruskich abo biełarusaŭ. Rabianok kateharyčna adkazaŭ, što horš staŭ stavicca tolki da ludziej, jakija pišuć padobnyja teksty.

• 0
• 0
• 0
• 0
• 0
• 0
• 0
• 0